Titus 1 - Ɓwaatiye New Testament

¹ Hɨnə Bulus kɨsa da Həmɨnpwa a kpa-lagbe da Yesu Ma Həmɨnpwa a Yaɓwarən. Həmɨnpwa a taɗi gə na nyerədə mwadiyale da ji-kottə, a kənərən sa kana təna ɗa a vor kottə.

² Wule kottɨngɨn kangə nə myente kaaru-kaaru, ite Həmɨnpwa ndi ma aawa kət-jeronye a bwe ləngrə, a nzadə kɨnɨnɨng, itɨngɨn myaa nda kwak vɨratə.

³ Shezə a kanata Həmɨnpwa Nzə-mbəsəm a shi ka ləməgye dan bwang dɨ ha lyente nda vi na dɨ hiwa kaarə.

⁴ Hɨnə dɨ wunakəw kwe Titus, a hye nze de a diyale a na mwasa a vor kottə. Maa wuladəha ka ɗolte dɨ haka Həmɨnpwa Baagəm ka Yesu Ma Həmɨnpwa a Yaɓwarən Nzə-mbəsəm a nza ɓwaa kəw.

Lyente Titus ɓa ɗa a luutɨ Kɨret

⁵ Sa ɗa na ɓə ɗakəw a luutɨ Kɨret sɨnə atɨ hye kpawa shee mbiɗi a ɗadərən. Hye nggɨl mi kpan-kpani vəni hiwtə 'ye ɓawa nidə mbiɗitɨ ji-kottə a nagi ndo vɨrati, ɓətɨya na boyu.

⁶ Nagi ndo ma mya nggɨlə, ɓe myaawa ɗɨmgən alə hasə. Nda kɨt sɨsən a nza ka metə hiɗə ɓəmbə, jingɨn mgban a gəə 'ye mwadiyale ka Həmɨnpwa nə. Ɓe tənaa gəə wule je aawa kɨl byelə satə nə, tən ta kɨl baagərən a kɨl gɨraha dan.

⁷ Ma dɨ jin ji-kottə mbak-mbak sɨnə Həmɨnpwa a mwakan a vən lyentə. Aa kana mya kɨlgən alə hasə, ɓe ndaa gə nzə-yedi gbɨlɨmi, ɓe ndaa gəə nzə-kpasə ka vwe. Ɓe ndaa gəə nzə-nyahe, ɓe ndaa gəə nzə-mwo shi vɨrati ka tɨmbɨrha gə om taa.

⁸ Shezə ndɨka nda gəə nzə-luu ɓwaare dɨ gwadərən, nzə-mwo ɗa səfemə, ma dɨ kɨt nəngɨn ka diyale, ɗəmɗəm ka tikɨstə.

⁹ Mbak-mbak mangɨn ɓa kɨt ləmə femə diyala nda luwo dwat gə nda mba kəntə kənə imi ləməgi twaye da Həmɨnpwa. Nda mgbal myee dɨ ɗa ndəle kwo le da Həmɨnpwa.

¹⁰ Gəkɨlə imi nee də mgbɨləha nza ka byelə ɓaye a kwaamɨngrən a taa naarə kan, ka byelə vwakaha kaarən ɓətɨ wule myee kangə nə byelə lakəwne nə.

¹¹ Ɗɨkdə wule mingɨn təna gbə kwaamɨngrən, gə tənə dɨ kɨɗa hwoda ji-kottə dɨ ha kəndəshee aa kana təna kəndərən. Təna dɨ kəndəshingɨn gə ɨl gɨnətə dɨ ha tɨmbɨrha.

¹² Ama hiɗə dɨ vor kpalye darən a Kɨret a sa atɨ, “Ndeyi mi Kɨret nee mba-dɨ-mba ka kər-jeronye kɨr-kɨr, tənə ɓətɨ sɨkaakə, ji-nyaɗəti, gɨluwe.”

¹³ Ləməgingɨn diyalə! Gə ləngɨn hye mgbaltɨrən a dɨkarən kɨr-kɨr gələ ji-kotte a hangɨn, a kangə nə diyalə kəndəshi twaye.

¹⁴ Ɓe tənaa sardə kwakingrən gə gbaamita Yawude kat ka gɨraha da wule myee kwo tɨfə diyale da Həmɨnpwa.

¹⁵ Myee ɗəmɗəm, nagi ndo sə kat sɨne ɗəmɗəm a hakarən, myee mgban gunam taa mwadiyalə kaarən, nagi ndo sə kat səhasə a hakarən gəkɨlə ɗyangale darən kat ka səɗə-yedye darən nə tukut.

¹⁶ Təna dɨ boyə ka kwaamɨngrən atɨ tən lee Həmɨnpwa, shezə lyentɨ darən nee dɨ məntəmə Həmɨnpwa. Tən mi hashi, tənaawa koddə le da Həmɨnpwa, tənaa dɨ mba asə femə a ɗa.