Filimon 1 - Ɓwaatiye New Testament

¹ Hɨnə Bulus ma a vor gbərəwe gə le da Yesu Ma Həmɨnpwa a Yaɓwarən, hɨnə ɓwaa ka Timoti nzə-nuwogəm a vor kottə. Hinə dɨ wunakəw hye Filimon ndewegi, hyenə nduwa nzə-lyenti a tɨfe da Həmɨnpwa.

² Hɨnə dɨ wunakarə nggi Afiya nji-nuwogəm a vor kottə ka Akibus kpeyəsenə nzə-pakawati ka le da Həmɨnpwa. Hɨnə dɨ wunakəw kat ka peta ji-kotte a hwodəw.

³ Maa wuladəha ka ɗolte dɨ haka Həmɨnpwa Baagəm ka Həmɨmiye Yesu Ma Həmɨnpwa a Yaɓwarən, a nza ɓwaa kəwnə.

Usəkətə ka hiwtə

⁴ Nagi a ndo fərə, na dɨ ɗyanga kəw a vor hiwtɨ de, na dɨ ɗa Həmɨnpwa usəkətə gə le dəw,

⁵ gə hɨn kɨl lə mwadiyale dəw ka Həmɨmiye Yesu ka mwote hye dɨ mwo myee Həmɨnpwa a vomiyərən kat.

⁶ Hɨnə dɨ ɗa hiwtə atɨ, pedə ne dəw kenə a vor kottə ɓa nyerə, baa lele dəw a kuɓukə a vor nagi ndo sə pepeyə a Ma Həmɨnpwa a Yaɓwarən a ɗam.

⁷ Nzə-nuwo, hanɨnyi kɨr-kɨr ka mwoha dəw, angɨn a gwadi a nyerədi gəkɨlə hye piyadə hubo myee da Həmɨnpwa.

Nyitta Bulus gə Onisimus

⁸ Gə-angɨn nagi a nə sate atɨ a vor kwakɨ Ma Həmɨnpwa a Yaɓwarən hɨne ka gətə na gbənzɨmtə a ɗɨkda hye ɗa sa kana hye ɗa,

⁹ kat ka angɨn na sa atɨ ndɨka na nyisu mya ɗa nagi ndo sə ka mwoha. Aa ndəng ama som dɨ boyu ləməginə, soɓwo hɨnə Bulus makpana nə a vor gbərəwe ɓəgəng, gəkɨlə na dɨ koɗə Yesu Ma Həmɨnpwa a Yaɓwarən.

¹⁰ Hɨnə dɨ nyisu gə nze de Onisimus, a gəə sɨnə nze de a ite mya ɗɨkdi a vor gbərəwa nə.

¹¹ Kɨnɨnɨng a hakəw ndi ɓwaara ɓayə ɓaa, ndaawa mba asə pepeyə a ɗəw, ɓəgəng ɓə gəə ma pepeyə dɨ gwadəm dɨ kpeyə.

¹² Hɨn mworən ka huboshi hiɗə, kat ka angɨn hɨnə dɨ mɨndən a hakəw.

¹³ Hɨn mwa atɨ na nda kɨttən nda nza hake gə ndi ta ɗe wule lyente hye Filimon ɓa nda wa ɗe a gətɨnə na gə vor gbərəwe gə ləmə feme da Həmɨnpwa.

¹⁴ Hɨn mgban taa mwi atɨ na ɗa asə aa ka mwosa gə ɓe angɨn aa gə ɓətɨ mbamti, ndɨka hye ɗa nagi ndo sə ka mwosa.

¹⁵ Ndəng sa ɗɨki ndi Onisimus a giɓə a ɗakəw a vor nzɨ bətə ɓyeləng nə atɨ, gə ndi kana mɨna a hakəw ndi ɓa nza hakəw kaaru-kaaru

¹⁶ aa yə ɓətɨ kɨsa, gə ɓə pɨrgə fukatɨ kɨsa, sɨnə ɓətɨ nzə-nuwoti a hakəw. Hɨne dɨ mworən kɨr-kɨr, hɨn leyə atɨ ɓəgəng hye ɓa mworən a pɨrgi gə ndi kɨsa ndi mɨni nzə-nuwoti a vor Həmɨmiye.

¹⁷ Anda hye mwake atɨ hɨn nduwanga nə a vor lyenta Ma Həmɨnpwa a Yaɓwarən, hye ɓa lurən ɓətɨ hye ɓa luri.

¹⁸ Anda ɓə ɗəw a səhasə, naasə mgban ɓə kɨɗəw a asə, hye koɗi kiire.

¹⁹ Hɨnə Bulus ka nəna dɨ doru malɨmtɨnə hɨn ɓa mbow sa nda kɨɗəw awan. Hye mgban zə leyi atɨ gə le de hye gəə nzə-kotti supo.

²⁰ Nzə-nuwo Filimon, hɨnə dɨ hɨmagə gwadəha dəw gə le da Həmɨmiye Yesu, ɗe səfema hye ɓa piyadə huboshi kan gə le da Ma Həmɨnpwa a Yaɓwarən.

²¹ Hɨn mwakəw atɨ hye ɓa koɗə ləməginə na boyu gə hɨn leyə atɨ hye ɓa ɗa sa pɨrgə a na nyisu.

²² Ɓe myenshi aa ngguro, hye ɗedə haa jangatə a hwodəw, gə hɨn bədə myenshi atɨ Həmɨnpwa ɓa dɨma di gə gbərəwe gə hiwte hwuna dɨ ɗa gə le de.

²³ Abafaras nduwa nzə-gbərəwo gə le da Yesu Ma Həmɨnpwa a Yaɓwarən nə dɨ wunakəw.

²⁴ Sə mgban yə Markus ka Aristakus ka Dimas ka Luka ndeyi ji-lyenti nə dɨ wunakəw.

²⁵ Maa wuladəha da Həmɨmiye Yesu Ma Həmɨnpwa a Yaɓwarən a nza ɓwaa kəwnə.