Afise 1 - Ɓwaatiye New Testament

¹ Hɨnə Bulus kpa-lagbe da Yesu Ma Həmɨnpwa a Yaɓwarən dɨ ha kanata Həmɨnpwa. Hɨnə dɨ wunakəwnə hwun myee Həmɨnpwa a vomiyərən a vor vɨra Afisus, a hwun myee dɨ koddə Yesu Ma Həmɨnpwa a Yaɓwarən ka tikɨstə.

² Maa wuladəha ka ɗolte dɨ haka Həmɨnpwa Baagəm ka Həmɨmiye Yesu Ma Həmɨnpwa a Yaɓwarən, a nza ɓwaa kəwnə.

Shi-pepeye mya dɨ ɗɨməm dɨ haka Ma Həmɨnpwa a Yaɓwarən

³ Ɓondiyəm Həmɨnpwa ndi Baagə Yesu Həmɨmiye dam Ma Həmɨnpwa a Yaɓwarən. Sɨnə wulakam ka wule pepete a vor pwa ka nagi ndawula pepeti a vor pitə dɨ haka Ma Həmɨnpwa a Yaɓwarən.

⁴ Həmɨnpwa nə nggɨltəm ite myaa nda kwak vɨratə gə hɨm a gəm hiɗə ka Ma Həmɨnpwa a Yaɓwarən, nda nam shet-shet a humwasən taa mgbaalə səhasə kam. Gə mwoha dan,

⁵ kɨnɨnɨng nda nggutəm a gəədəm jingɨn nə dɨ haka Yesu Ma Həmɨnpwa a Yaɓwarən, angɨn kanatɨ dan nə, hanɨngsən nə mgban.

⁶ Həmɨnpwa a ɗaasə gə mya humwan a ndukodən gə fukatə ka wuladəha dan a nda wulakam kan dɨ haka Ma nda dɨ mworən.

⁷ Gələ hɨm nə ɓwaa kan, Həmɨnpwa a dɨmdəm gə kɨsawne dɨ ha zaambəngɨn, a nggurəmgə səhase dam dɨ ha gbaktɨ wuladəha dan,

⁸ nda mɨna pukamdə lele ka leetə kat.

⁹ Hanɨngsən nə nda bɨləm kpəshi kanatɨ dan. Kanasən nə nda ɗaasə dɨ haka Ma Həmɨnpwa a Yaɓwarən.

¹⁰ Gə fəre kana kənə nda ɗadə shee a paya dərən a pukə Ma Həmɨnpwa a Yaɓwarən a wule shirə gaarə a pwa ka inə ganə a njiya.

¹¹ Həmɨnpwa a ɗa shee kat ɓətɨ nda mwo a kanatɨ dan. Gəkɨlə Yesu nda nggɨltəm hɨm nə mingɨn 'ye nda leerəm kɨnɨnɨng ite myaa nda sɨra vɨratə.

¹² Nda ɗaasə gə hin Yawude humwan, a hin myee tiya bədə myensenə a haka Ma Həmɨnpwa a Yaɓwarən, hin ɓondi fukatɨ dan.

¹³ Hwun mgban Afise a hwun myee aa hwun Yawude, ite hwuna kɨl ləmə feme da Həmɨnpwa a mwadiyale kan, a ləmə femə mbəha, mya ɗɨkəwnə ɗuwo Pitɨ Ɗəmɗəmtə ite Həmɨnpwa a boyownə le a nəngrə a nzadən sə.

¹⁴ Pitɨ Ɗəmɗəmtɨngɨn nə kwamətɨ sa Həmɨnpwa a bɨləm atɨ mbak-mbak hɨm ɓa mɨnəmə mbiɗitɨ shee kat a fəra ndi ɓa vəm ɗɨmne də a kpawtə, hɨm myee hɨnggə Həmɨnpwa nə kɨnɨnɨng. Shinə kat gə ɓondiha ka fukasən nə.

Hiwta Bulus gə le da ji-kottə

¹⁵ Gə-angɨn, ite na kɨl le a nə mwadiyala hwuna gə kan a nə Həmɨmiye Yesu, ka wule mwoha hwuna dɨ bɨlə myee Həmɨnpwa a vomiyərən,

¹⁶ mba-dɨ-mba na dɨ ɗa Həmɨnpwa usəkətə gə le dəwnə, myenshi aawa nggurgəwnə a vor hiwtɨ de.

¹⁷ Mba-dɨ-mba na dɨ nyisə Baagə Həmɨmiye dam Yesu Ma Həmɨnpwa a Yaɓwarən, a Baate ka fukatə kan. Hiwtɨ de nə atɨ nda vəwnə pitɨ lele, a wunəwnə diya gə hwuna leerən.

¹⁸ Hiwtɨ de mgban nə atɨ nda wuna kwa-hubosəwnə gə hwuna lee mgbaalə bəə myente nda warəwnə a vorsə ka fukatɨ gɨnətɨ shee hwun ɓa mɨnərən ɓwaa ka myee nda vomiyərən.

¹⁹ Mwoshinə hwuna leyə atɨ, wule gbaktɨ gəte nda gə kaarə ite taa iti tɨlkarə, ite dɨ lyeni kam hɨm myee mwakan. Gətɨngɨn nə ite bɨldə lyentɨ gbaktɨ maase dan.

²⁰ Wule gətɨngɨn nə nda ɗa lyentə kaarə a maddə Ma Həmɨnpwa a Yaɓwarən gə we ka myentə, a nzadən a tɨfə zɨməngən gaarə a vor pwa.

²¹ Ma Həmɨnpwa a Yaɓwarən nə həmne ka gətə ka nyerəte a vor pitə kat. Gəte a vor kwakɨngɨn nə pɨrgə nagi ndo kwakə a nzatɨnə ɓəgəng kat ka ite ɓaga shi.

²² Həmɨnpwa a ɗɨkdə nagi ndo sə a pukəngɨn. A ɗɨkdən nda gəə sɨnə ne a nə nagi ndo sə kat gələ petɨ ji-kottə.

²³ Gələ tənə sɨsən, sɨne a wakasərən nagi a ndo haa, a vor nagi ndo sə kat.