2 Timoti 1 - Ɓwaatiye New Testament

¹ Hɨnə Bulus kpa-lagbe da Yesu Ma Həmɨnpwa a Yaɓwarən, ɓətɨ Həmɨnpwa a kana, a vor kanatɨ dan nda boyo a nzadən atɨ ndi ɓa və myee mwadiyale kan myente kaaru-kaaru dɨ haka Yesu Ma Həmɨnpwa a Yaɓwarən.

² Zə haka nze de Timoti a na dɨ mworən. Maa wuladəha ka purutə ka ɗolte dɨ haka Həmɨnpwa Baatə ka Həmɨmiye dam Yesu Ma Həmɨnpwa a Yaɓwarən a nza ɓwaa kəw.

Nyerədəha a nə nzaa mwadiyale

³ Na ɗa Həmɨnpwa usəkətə ndi ma na dɨ ɗan lyentə ka huboshi hiɗə ɓətɨ yə jigi a ɗa. Hɨnə dɨ ɗyanga kəw mba-dɨ-mba a vor hiwtɨ de tukotə ka fəre.

⁴ Na ɗyanga ka kawatɨ dəw a ite hye tuwo ka hɨritə, gə ləngɨn na dɨ hɨmagə ite atɨ na nəw gə haa a nɨnyi.

⁵ Myenshi aa nggurgə wule mwadiyalə tikɨsa hye gə kan, wule mwadiyaləngɨn nə kəgu Loyis a gə kan, sɨnə mgban nuwogu Yunis a gə kan. Hɨn bəl yedi mbak-mbak mgban atɨ, wule mwadiyaləngɨn nə hye gə kan.

⁶ Gə ləngɨn na dɨ ɗyangəw atɨ hye fɨda ɗiyə gəte Həmɨnpwa a vu a ite hye ɗɨmə dɨ ha tyefye na puku a nanga.

⁷ Pitɨ Ɗəmɗəmte Həmɨnpwa a və miye aa i gəə kala, pitɨngɨn a dɨ və miye gətə, mwoha ka kɨt sɨtə.

⁸ Gə-angɨn ɓe sopye aa gu ka takale a nə Həmɨmiye dam, ɓe sopye aa gu mgban ke hɨn manə a gbərəwe gəkɨlə na dɨ koɗən ndi Həmɨmiye. Zə gi ɓwaa ke a vor tənətə gə bwe ləmə feme da Həmɨnpwa dɨ vor gətɨ dan,

⁹ ndi ma mbədəm, warəm gə hɨm a gəm ɗəmɗəm, aa gəkɨlə səfeme dam, gəkɨlə sa nda kana kam ka wuladəha dan shi hakam. Wule wulahangɨn nə nda vəm dɨ haka Yesu Ma Həmɨnpwa a Yaɓwarən a ite myaa nda kwak vɨratə.

¹⁰ Ɓəgəng nə Həmɨnpwa a shea dɨmaadə wulahangɨn bwang a vor pɨrate Nzə-mbəsəm a Yesu Ma Həmɨnpwa a Yaɓwarən a pɨra a vor vɨratə. Sɨnə gbaagə maasə we shikam ka myentə, a wule ite aa diyə mbəə dɨ ha ləmə feme da Həmɨnpwa.

¹¹ Ləmə feməngɨn nə ɗɨki Həmɨnpwa a nggɨlti na gəə kpa-lagbe gə na hiwa kaarən, na gəə nzə-kəndəshi.

¹² Səngɨn nə ɗa na dɨ tənəə wule tənətɨnə ɓəgəng. Kat ka angɨn, sopye aa gi gə hɨn lee ma na mwadiyale kan, hɨn leyə mbak-mbak atɨ mgban ndi ɓa kɨshi myenshi ite na vəntɨrə baa zə kpawtɨ fəre.

¹³ Ləməgyee kat hye kɨlə dɨ hake, kɨshi pɨp, sɨnə tɨfa hye ɓa koɗən gə hye kəndəshe twai, kat ka mwadiyale ka mwoha a vor Yesu Ma Həmɨnpwa a Yaɓwarən.

¹⁴ Le da Həmɨnpwa a mya vu a ɗakəw kan, kɨshi dwat nidən pepe ka gwadəha da Pitɨ Ɗəmɗəmtə ite ɓwaa kam.

¹⁵ Hye leyə atɨ minə na gə kaarən a vor njiya Asiya, kat ka yə Fijalus ka Hamojinis təkəsə ɗake dɨsəri.

¹⁶ Maa puruta Həmɨnpwa a gə nə Onisifarus ka mi hwodan kat, gə sɨne mba-dɨ-mba dɨ nyerədi ndaa ɗa sopi gbərəwa nə na gə vorsən.

¹⁷ Hɨnggən ite nda shi a pɨra a vor vɨra Roma, nda woyo a ɨlti kɨr-kɨr baa nda nee.

¹⁸ Maa Həmɨmiye Yesu a gwadən a bɨlən purutə baa kpawtɨ fəre. Timoti hye leyə twa atɨ gwate Onisifarus a gwadi ganə a vor vɨra Afisus nee kɨr-kɨr.