2 Bitrus 1 - Ɓwaatiye New Testament

Wunakaha

¹ Dɨ haka Siman Bitrus, kɨsa ka kpa-lagbe da Yesu Ma Həmɨnpwa a Yaɓwarən. Zə haka myee luu mwadiyale ka fyemtə ɓətɨya hina luwo dɨ ha pepeta Həmɨnpwa ndi Nzə-mbəsəm Yesu Ma Həmɨnpwa a Yaɓwarən.

² Maa wuladəha ka ɗoltə a ləkə nəngəwnə, dɨ ha lee Həmɨnpwa ka mɨni Yesu Həmɨmiye.

Koɗə Həmɨnpwa ka hubotə hiɗə

³ Gəta Həmɨnpwa venə nagi ndo sə a hina dɨ mwo gə nzaa pepetə dɨ ha leete hina leerən ndi ma warenə a vor pepetə ka fukatɨ dan.

⁴ Dɨ vor gətɨngɨn nda venə zərgi gbaktɨ kɨləsəte ka tikɨstə, gə dɨ ha kɨləsətɨngɨn hwun ɓa gə ɓətɨ ndi gə hwuna mbəgə tukuttə ka ɗongə diyale gə mwo ɗashi hashe da mi vɨratə.

⁵ Gə-angɨn, ɓa wula hwuna ɓərə a ɗɨkdə pepetə a nə mwadiyale dəwnə, hwuna ɗɨkdə lele a nə pepetə.

⁶ Sə mgban beetɨ lele hwuna nza ka kɨt sɨtə, beetɨ kɨt sɨtə, hwuna ɗɨkdə mbasɨtə, beetɨ mbasɨtə nzam hwun ta koɗə Həmɨnpwa ka hubotə hiɗə,

⁷ beetɨ angɨn, hwun ta wula ka sə, beetɨ wulatə ka sə, hwuna nza ka mwoha.

⁸ Gə hwun kana ɗɨm wule nzatɨnə, mba-dɨ-mba angɨn ɓa ɗɨkə hwuna gəə ɓwaare twayi ka tikɨstə a vor lee Həmɨmiye dam Yesu Ma Həmɨnpwa a Yaɓwarən.

⁹ Shezə ma kat ɗongə wule shi nzaa pepetɨnə, mangɨn welə, ɗyangale dan aawa muɗə ɓong-ɓong, myensən ɓa nggurgə sate atɨ Həmɨnpwa suɓwagən gə səhase dan a kɨnɨnɨng.

¹⁰ Gə-angɨn ji-nuwo, ɓərəm kɨr-kɨr gə hwuna kangə dwat a vor mwadiyala Həmɨnpwa a tattəwnə a warəwnə kan. Hwun kana ɗaasə, hwunaa dɨ pawo a fokə,

¹¹ sə mgban mya wayadəwnə pepe a vor həmne da Həmɨmiye a Nzə-mbəha Yesu Ma Həmɨnpwa a Yaɓwarən a kaaru-kaaru.

Ləməgye mbak-mbak dɨ kwaamɨ kpalye da Həmɨnpwa

¹² Tee mgban hɨn ɓawa ɗyangəwnə mba-dɨ-mba a nə shingɨn, nagiya hwuna leetɨrən, diyaləngɨn mgban ɗɨm nzatə a hubosəwnə.

¹³ A gi atɨ ɓə kana hɨn taawa nggala ɗyangale dəwnə a nə shingɨn a ite hɨnə nda nza ka myentə,

¹⁴ gələ hɨn leyə atɨ taa diyə ɓongə vɨratə, ɓətɨya Həmɨmiye Yesu Ma Həmɨnpwa a Yaɓwarən a bɨli bwang.

¹⁵ Dɨ ha dorshinə na ɓərə gə nagi hɨn təkəsə ka vɨratə, hwun ɓawa ɗyanga ka shingɨn nagi ndo fərə.

¹⁶ Hinaa lyenə ka səɗə ɓaye ɓətɨ gbaamite ɓwaara a tusatɨrə a ite hina shikəwnə ka ləmə shita Həmɨmiye dam Yesu Ma Həmɨnpwa a Yaɓwarən ka gətə, shezə hinə myee naa gətə ka gbaktɨ fukata Həmɨmiye ka diingenə.

¹⁷ Gə ɓə luu ndukoha ka fukatə dɨ haka Həmɨnpwa Baatə ite korme dɨ fukatɨ gbaktə a sa atɨ, “Nze de a na dɨ mworən nə anə, haa dɨ nɨnyi kɨr-kɨr kan.”

¹⁸ Hin ka nənəngenə hin kɨl kormɨngɨn a shi dɨ vor pwa ite hine ɓwaa kan a nə mwe da Həmɨnpwa.

¹⁹ Mɨni ɓə hinə ka ləməgye mbak-mbak dɨ kwaamɨ kpalye da Həmɨnpwa, angɨn kənə hwuna mɨnadə ɗyangale dəwnə a nə ləməgingɨn. Naa angɨn a gəwnə ɓətɨ ɓɨrti dɨ ɓɨra a vor kulitə ɓa muɗə a zə haa kɨɗatə a ite Ma Həmɨnpwa a Yaɓwarən ɓa mɨnakan. Sɨne ɓətɨ nggɨrata tikɨlə sɨkɨɗaha a ɓa ɓɨra a hubosəwnə.

²⁰ Pɨrgə anə kat, mbak-mbak hwuna lee sate atɨ, taa ndəng kpalti də a vor Malɨmtɨ Ɗəmɗəmtə dɨ ha lelə duwo nə a kpalə da Həmɨnpwati.

²¹ Gə taa ndəng ləməgi kpalti də 'ye dɨma dɨ haka ɓwaara dunge. Ə'ə, Pitɨ Ɗəmɗəmti jiriya ɓwaare təna byelə ɓətɨya Həmɨnpwa a vərən gətɨ bwe ləməgingɨn.