1 Timoti 1 - Ɓwaatiye New Testament

¹ Hɨnə Bulus kpa-lagbe da Yesu Ma Həmɨnpwa a Yaɓwarən ka kormi Həmɨnpwa Nzə-mbəsəm, ka ndi Yesu Ma Həmɨnpwa a Yaɓwarən a hɨm a dɨ bəmdə myensəm a nəngɨn.

² Hɨnə dɨ wunakəw hye Timoti nze de a diyale a vor kottə. Maa wuladəha ka purutə ka ɗolte dɨ haka Həmɨnpwa Baatə ka Yesu Ma Həmɨnpwa a Yaɓwarən Həmɨmiye dam a nza ɓwaa kəw.

Fyel-kwakye a nə ji-kəndə ɓashitɨ jeronye

³ Ɓətɨ na boyu ite na dɨ muɗə njiya Masɨdoniya, hye nza vɨra Afisus, sə mgban na dɨ mɨna dɨ boyu atɨ hye ta gɨra wule myee dɨ kəndəshi jeronye.

⁴ Tən mingɨn a dɨ pedə ləməgye da Həmɨnpwa ka gbaamitə kat ka byelə ɓaye a nə kwirə jijiyi kaɗəngtə. Wule kəndəshingɨn nə dɨ shi ka məntəmətə, tənaawa ɗɨkdə lyenta Həmɨnpwa ite ka mwadiyale ngga pɨrə humwa.

⁵ Mgbaalə gɨrahanə nə mwoha, a wule mwoha dɨ vor hubo shet-shettə ka səɗə-yedi pepeye ka mwadiyalə diyale.

⁶ Imi a ɗaka ləmə diyale da Həmɨnpwa a pɨrə wule ləməgi ɓaye taa naarən.

⁷ Təna dɨ mwo kəndə ɓashita Musa, shezə tənaa lee wule ləməgyee təna dɨ boyo. Kat ka angɨn, təna dɨ bwe le a nzadən a nə ɓaa.

⁸ Hɨm leyəm atɨ ɓashita Musa nee pepe, anda hɨm ɗam lyentə kaarə a tɨfa kana.

⁹ Hɨm leyəm mgban atɨ myaa vədə ɓashitə gə myee ji-ɗa səfemə, shezə mya vədə gə wule myee ji-ɓiya ɓashiti, 'ye dɨ kanggə Həmɨnpwa. Wule myee aawa koɗə Həmɨnpwa, ji-ɗa səhase, myee tam ɗəmɗəm, tənə wule myee dɨ ɓəl yə sɨnggərən, ji-ɓəl wogye,

¹⁰ sharye, a wule morye dɨ ɗa sharawne ka ndeyingrən moryi, ji-ɓodəkha gə təna ɗɨm kɨse. Tən ji-kər jeronyi, təna dɨ kəsəsə jeronye a vəni ɓashitə. Nagi ndawula kəndəshi twayi, təna dɨ kwo ləngɨn.

¹¹ Kəndəshingɨn nə 'ye bɨldə ɓɨrtɨ ləmə feme da Həmɨnpwa ka fukasən ka pepetɨ dan ite nda mwake a vi.

Gwaha da Həmɨnpwa a nə Bulus

¹² Hɨnə dɨ ɗa Yesu Ma Həmɨnpwa a Yaɓwarən Həmɨmiye dam usəkətə, ndi ma vi sɨtɨ dwattə nyerədi gəkɨlə nda mwake a vi lyentɨ ləmə feme dan.

¹³ Kat ka sate atɨ, kɨnɨnɨng na kɨɗa kwakɨ Həmɨnpwa a tənədə ji-kottə a ɗa sɨmwarashe gə hɨn nzə-ɗa sɨmwarashi. Kat ka angɨn, Həmɨnpwa a bɨli gwadəha dan a ɗa purushi, gə shee na ɗa kat, na ɗatɨrən a vor ɗongə leetə ka ɗongə mwadiyale.

¹⁴ Həmɨmiye a wulake kɨr-kɨr ka wuladəha dan, dɨ ha mwadiyale ka mwoha dan, a wule a dɨ haka Yesu Ma Həmɨnpwa a Yaɓwarən.

¹⁵ Ləmanə diyalə a kana nagi ndo ma a luwo, atɨ Yesu Ma Həmɨnpwa a Yaɓwarən a shi vɨratə gə nda mbədə ji-ɗa səhase, 'ye mgban a vorsərən hɨn pɨrgərən ka ɗa səhase.

¹⁶ Gə ləngɨn nə mgban Həmɨnpwa a ɗa purushi gəkɨlə wule ma ɓətɨ hɨn, a pɨrgə mbiɗitɨ ɓwaare kat ka ɗa səhase. Yesu Ma Həmɨnpwa a Yaɓwarən a bɨldə mbasɨtɨ dan kɨr-kɨr a nəngɨn gələ myee ɓaga mwadiyale kan a humwa, təna ɗɨm myente kaaru-kaaru.

¹⁷ Maa Həma taa mbati kan, ndi ma ka myentə kaaru-kaaru, ndaawa mbɨrə, myaawa nan, sɨnə Həmɨnpwa hiɗə kal-kal, hɨnggən nə ndukotə ka fukatə nagi goɗi. Amin.

¹⁸ Nze de Timoti, hɨnə dɨ lama kəw dɨ fyel-kwakinga ɓətɨya mya kpalə nanga gə hye kana ɗyanga ka ləməgingɨn, hye ɓawa kangə dwat a ɓərə,

¹⁹ hye kɨt mwadiyale dəw kərəng-kərəng ka səɗə-yedi pepeye. Wule mwadiyaləngɨn nə imi a ɗongdən a yerə ɓaa.

²⁰ Wule mingɨn nə yə Himinaya ka Alezanda, 'ye na dɨmdərən gə vor ji-kottə a vədərən a gəta Shetan, gə ɓe tənaa yə kɨɗa kwakɨ Həmɨnpwa.