ZEPHANIAH 1 - Bawm Common Language Bible Version

¹ Amon fapa Josiah Juda lal asi liauah Zephaniah sinah LALPA nih thuchah a pêk mi chu hi hi asi: (Zephaniah thlâktu tla chu lalchem Hezekiah, Amariah, Gedaliah leh Kusi tla an si.)

LALPA Lâirêlnâk Ni

² LALPA nih, “Tual tlûnah thil zawzawng,

³ minung leh ramsa zawzawng, va leh nga tla ka veih hep awt, misual tla niamnâk ka tlungtir awt. Minung zawzawng pakhat khawm âk lo hen ka veih hep awt. Kei, LALPA nih ka sim mi asi.

⁴ “Jerusalem mi leh Juda mi zawzawng ka rêp na awt. Chunah Baal sawnhtu tla thu chu ka veih lai le, lunglotu tla sawnhnâk ah bâwlpu mang mi tla chu âukhawm nih an theih lai lo rawh.

⁵ Nî, thlâ leh ârfi tla sawnh ding hen in tlûnah kâitu vial chu ka veih hep na awt. Keimah hawng ka sawnhtu leh zumhkâi tak hen thutiamtu sikhawmsele, Milkom pathian an ti mi min hen thutiamtu tla chu ka veih na lai.

⁶ Hawng ka kîrtâk hen hawng ka zûl lo rawhtu tla, ka sinah hawng lotu mawh anmah rui ding hen hawng ka ngiar lotu tla chu ka veih na lai,” a ti.

⁷ LALPA ni, Pathian nih thil a ti ding mi ni chu a nâi rawh; churuangah a mâika ah dâisip hen um u. Bâwlnâk ah mang mi hâwi hen a mi tla chu LALPA nih thah ding hen a timhtuah.

⁸ LALPA nih, “Thahnâk ni ah chun, rianṭuantu tla leh lal fapa tla, ramdang umdân châwngtu tla chu ka rêp na awt.

⁹ Lunglotu pathian sawnhtu tla hawi hen mi thil fîr leh mi thah hen thil-le-rî lâk mi hen an hotu in khattir tumtu tla chu ka rêp na awt,” a ti.

¹⁰ LALPA nih, “Chu ni chun Jerusalem ah Nga Kawtkâ thawk hen ṭap hâu nan theih lai, khuapi tharh mi leikângah lungfâk hâu nan theih lai, tlâng tlûnah thil râwk fâk tak hâu nan theih lai.

¹¹ Nannih khuapi tanglei dauh a umtu tla, chu chu nan theih rawh chun, sawlehtu tla an thi awt ruangah lungfâk tak hen ṭap u!

¹² “Chu tikah chun khâwnvâr ka lâk lai le, Jerusalem ka hâwl awt. Mah khim lâwng dawn hen â zûm mi tla, an thinlung hen ‘Zei tin kâng hen khawm LALPA nih thil a ti lai lo, ti tu tla chu ka rêp na awt.

¹³ An neih tla chu lâk piak hen a um lai le, an in tla veih piak hen a um lai. An sak mi in lak khawm, an um lai lo, grep an phun mi uain khawm an din lai loh,” a ti.

¹⁴ LALPA ni rokual chu a nâi thlo rawh, a tlung tuan lai! Chu ni chu ni hamhkâi tak asi lai le, kawrsen râlṭha chem tla men lungdawng tuk ruangah an ṭap lai!

¹⁵ Chu ni chu thinthawknâk ni, lawksawngnâk leh hamhnâk, siatnâk leh râwknâk ni, mûinâk leh thimnâk ni, vândâwm thim pang ni,

¹⁶ râltuknâk tâwtawrâwt tum hâu hen khat mi leh kawrsen tla nih khua kulh leh in sâng tla an do liau a mi âu hâu tla a um lai.

¹⁷ LALPA nih, “Minung tlûnah chubang hâwi siatnâk ka tlungtir lai le, mi zawzawng mitchâw hâwi hen anna dap sup lai. Ka lakah an sual ruangah, tu chun an thî chu tî hâwi hen a tlê lai le, an ruak chu tual ah thû nuai hen a um lai,” a ti.

¹⁸ LALPA nih a thinthawknâk a hawng langhtir ni ah chun, an tangka leh ngûn tla nih a hum kho na ding asi lo. Tual pumpi chu a thinthawknâk mei nih a râwk lai. Tual tlûnah um mi zawzawng lakah dawngh sawmnâk a hawng tlungtir lai.