2 CHRONICLES 1 - Bawm Common Language Bible Version

Lalchem Solomon Nih Finghnâk Deih Hen Thla A Cham

¹ Lalchem David fapa Solomon nih chun, Israel lalram chu bir tak hen a zauhkhenh le, LALPA, a Pathian nih mal a sâwm le, thiltikho tak hen a siam.

² Lalchem Solomon nih murui kip ah hotu tla, sâng lakah hotu leh zâ lakah hotu, sawrkar rianṭuantu zawzawng, dâwngsungkhur lakah lukhâi dauh zawzawng leh zapi dang zawzawng tla chu,

³ Pathian sawnhnâk mun Gibeon ah kal chiau ding hen thu a pêk na. Chunah chun LALPA to-aw Mosi nih ramkaro ah a siam mi LALPA umnâk Puanin chu a um ruangah an va kal rawh.

⁴ (Lalchem David nih Thudântuk Bâwm Keriath Jearim thawk hen a lâk mi chu Jerusalem Puanin ah a siah mi kha.)

⁵ Dâr mâichâm, Bezalel, Uri fapa, Hur tupa nih a siam mi khawm kha Gibeon ah mi LALPA umnâk Puanin tualmâi ah a um. Chunah chun Lalchem Solomon leh mi zawzawng nih LALPA chu an sawnh rawh.

⁶ Chu Puanin tualmâi ah chun lal nih dâr mâichâm tlûnah bâwlnâk ap hen LALPA a sawnh le, ran sâng khat a thah le, a duah hep.

⁷ Chu zân chun Solomon sinah Pathian â langh le, a sinah, “Zei an pêk sele na duh?” ti hen a deih.

⁸ Solomon nih a sâng le, “Ka pa David chu na dâwt kumza le, tu chun kei hi amah ruangrûl ah na hawng ka laltir rawh.

⁹ LALPA, Pathian, ka pa sinah thu na tiamh mi chu hawng puitlingtir rawh. Rêl châwklo rê, zapi lakah lal ah na ka siam.

¹⁰ An tlûnah lâi ka rêl khonâk ding hen finghnâk ka herh mi hawng ka pêk rawh. Chu hâwi asi lo chun na mi le zawzawng lakah hin zeitin lâi ka rêl kho lai?” a ti.

¹¹ Pathian nih Solomon chu a sâng le, “Na thîm mi chu a dik asi. Neih-le-siahnâk mawh, minthangnâk leh na mêlma tla thihnâk mawh san sâunâk mawh na ka deih lo le, ka mi le tla lâirêltu ding hen lal ah kan thîm ruangah finghnâk leh theihnâk na hawng ka deih mi chu a dik asi.

¹² Finghnâk leh theihnâk ka nan pêk lai. Chu lo khawm neih-le-siahnâk, minthangnâk, a lânah âu lal khawm nih an nei dahlo mi leh âukhawm nih hi nunthâi khawm ah an nei lo ding mi ka nan pêk lai,” a ti.

Lalchem Solomon Thiltikhonâk Leh Neihnâk

¹³ Churawhchun, lalchem Solomon chu LALPA umnâk Puanin Gibeon ah mi Pathian sawnhnâk mun chu a kaltâk le, Jerusalem leiah a kîr rawh. Chunah chun Israel tlûnah lâi a rêl rawh.

¹⁴ Solomon nih kari sâng khat leh zali, rang tlûn chuan mi sîng khat leh sâng nih a timhtuah. Chu lakah mi zeimaw zat chu Jerusalem ah a siah le, a dang tla chu khuapi dangah a siah na.

¹⁵ A lâirêl sung zawzawng chu ngûn leh tangka tla chu Jerusalem ah lung salam hâwi asi, sidar thing tla chu Theipi kûng salam hâwi hen thungâi a tam.

¹⁶ Lal hen tlâinâk nei mi tla, Musri leh Silisia thawk hen ram dangah zuar mi tla leh,

¹⁷ Aigupta thawk hen kari kuat mi tla lakah thu an nei. Hit mi tla leh Siria lal tla chu rang leh kari tla an pêk na le, kari chu tangka zaruk vima, rang chu zâ leh sâwmnga vima asi.