Yuda 1 - Bokanda Bona Yakomba Bon’ototo

¹ Yuda, boombo bona Yesu Masiya, ko bakune’ona Yakobo, eneyali iy’anelelama, banalangama eneyali Yakomba Bafango, ko banamonyedyama Yesu Masiya:

² Isei la mwi la nganji ifudyamake eneyal’ino.

³ In’analangama, eneki’m’Oyalaka la mposa mene lacina nkotengel’ino ena likambo lina liiko lon’isatu, mosomyama losomo lacina nkotengel’ino ko nkosengeny’ino lacina bookane yoka bita la mposa mene lacin’en’imeedyo inifamaki bofa bomoko bona locela eneyali ban’oeka.

⁴ Lacina bato’amoi bamotua la longo, banaki ekoiyelo ene eniyo otengamaka en’oso’ale, bato banafakumya Yakomba, banahelengola isei ina Yakomba iyalame etelo en’aoyi bana nsefo, ko baangana Yesu Masiya, onoyali nk’ende kei Bomene la Nkolo eniso.

⁵ Lalanga nkoofody’ino, kanga bomeya baoyi’ane bahatu fololo, bokotua bonoki Nkolo otungolaka bato en’onyanga bona Ejipeto, ko ena mbusa aehyak’iyo banatimedya.

⁶ Ko bikima bina loola banatayala ena lifoka liniyoamene njalama, ohonde baumbelaki litonga liniyoamene, amolamonya en’enyolo bena bisike bihitu ena bilima, yengoko etendelo en’akambo ena bina bin’okolo.

⁷ Nko bosamb’onoki Sodomo la Amola l’enyanga benoli la beho oyolekyak’iyoamene ena lisamba, ko baitanaki la bonufo’okina, koko bamilama yoka ndembi ena lilako, bayene bino bina nsisodya ena nkoi enefakale tu.

⁸ Koko nk’osamb’oho bato’ane banaseki lilotwa balotwa baehya yonge, ko batembola bato bana lifoka, ko basaiya bana-bokonde.

⁹ Ohonde Mikaele, ekima ena loola en’iyome, eneki’nd’oseelaka la Satana bembondo, ko aatanaki l’ende ntango lacin’ena boduo bona Mose, atakolana yakol’ende la besao, ohonde ailaki, ate, Yawe akofelake lofeli!

¹⁰ Kokobato’ane basaiya baoyi banafanongany’iyo; ko en’aoyi’amoi baney’iyo l’okotua bona yonge, yoka bosamb’oneya nyama inifana lokanyi, baehyama l’aoyi’aho.

¹¹ Bino eneyal’iyo! lacin’oka bamocoa ena mboka ena Kaina, ko bamolindimwa la loyenge ena liunga lina Bilama lacin’ena boluko, ko bamolehyama ena ntango ena Kola.

¹² Bato’ane bayali nko baufe banafisi ena bilambedya binino bina nganji; batombanyi banayoley’iyoamene toma, ko bafaange tu; bailo banafan’asi, banatolama nko la mpongo; bete ben’esike ena luma benefana bemamo, bemowa bewa befe, bemoluolama beluo;

¹³ bafukumo ban’olema bana lose l’okwa banafodya bafulo bana nsoi iniyoamene; bayali nko tooto tonatounga: bilima bona kocukombe bomomonyama lacin’eniyo bisike bihitu.

¹⁴ Koko Anoka, onoyaaki boto’ona nsambo ena mbusa ena Adama, atendaki’ale baoyi lacin’ena bato’ane, ate, Lenda, Yawe aoya la nkese la nkese ina ban’oeka banande,

¹⁵ lacina atende bakambo ban’ato bahatu, ko aakol’iyatu banafakumya Yakomba likambo lina bikambwa biniyo bihitu binifan’ekumedyo ena Yakomba binik’iy’okambaka efana nkumya ena Yakomba, ko lacin’en’aoyi bahatu bana locili banaki bato ban’owe otangak’ende.

¹⁶ Bato’ane bayali nko beninginingi, bato banamemesana bike, ko bayakende nko la mposa iniyo inay’owe inileki (ko bonyu’oniyo boyatende baoyi ban’akolo bana njengo dya), ko bakumya bato’amoi lacin’ena nkita kei.

¹⁷ Koko in’analangama, bokanedyaka baoyi banaki bikima bina Nkolo eniso Yesu Masiya otendaka en’oso,

¹⁸ bosamb’onok’iy’okosumolaka, iy’ate, En’esike ena nsimbo basiseli bangenya, banangokenda la mposa iniyo inileki inifan’ekumedyo ena Yakomba tu.

¹⁹ Bane nk’iyo banakambwany’ato en’eloi, bato bana yonge kei, baninda Bolimo bon’olotsi.

²⁰ Koko in’analangama, boyokikyak’inoamene en’imeedyo inino in’oeka mene, ko boondaka ena Bolimo bon’olotsi,

²¹ boyotombanyak’inoamene ena nganji ena Yakomba, ko bolengedyak’isei ina Nkolo eniso Yesu Masiya lacin’ena liiko lonelofakale.

²² Bokamela bamoi banakandakanda isei,

²³ koko biky’amoi nk’eyoka bakudy’iyo ena nkoi; koko eneyali bamoi bambanya isei la mbanga, boka nko le bokoto mene bowe yombo boho bomambola baanda ena yonge.

²⁴ Isanga, eneyal’ende oninya likotombany’ino lacina bofakumbe, ko ainya likeemady’ino en’oso bon’elongi enande ena bokoka bonande nko l’ekiko mene eneleki, ko efana lianda tu,

²⁵ eneyali Yakomba nk’eh’emoko kei, Boiki’oniso—bokonde, la lokumo, la lifoka, la mpamba bayalamake eneyal’ende, en’oso bona bisike bihitu, ko l’en’esik’ene, ko l’ena bisike bihitu. Ndoho.