Tito 1 - Bokanda Bona Yakomba Bon’ototo

¹ Paulo, boombo bona Yakomba l’ekima ena Yesu Masiya, yoka bosamb’onoyali imeedyo iniyo banasonama la Yakomba, nko la njeya ena solosolo eho enakolana l’ekumedyo ena Yakomba,

² lacin’ena lolendedyo lona liiko lonelofakale, loneloki Yakomba onofafote tu osembyak’ale esemba en’oso bona bisike bihitu;

³ koko ena bisike binandamene amila yoi linande ena fololo, nk’osimo bon’olotsi bonofamaki eneyal’emi la lotomo lona Yakomba, Boiki’oniso:

⁴ boeso bone eneyali Tito, bon’onami bona solosolo en’imeedyo inis’atu: Isei la mwi eneyali Yakomba Bafango la Masiya Yesu, Boiki’oniso.

⁵ Nkocikaki ena Kulete nko la ncina ene, lacina oongya baoyi banaciki, ko lacina oile bingambe bin’ekelesia en’onyanga l’onyanga, yok’onoki’m’okosumolaka;

⁶ boto onokoli nk’onofana likambo lina lofeli, ko ayali bome bon’ooli’omoko, ko ayali’l’ana banimedya banafatangama l’akambo bana loyenge ko la lopoko.

⁷ Lacin’oka akoli eneyali botombanyi ayalame boto onofana likambo lina lofeli, yoka bomonyi onosaela Yakomba, onofana bopokatoi, onofoke nkele yaya, onofalangwa bina l’ina l’aana, onofafome bato, onofoke nkita ena nsefo mposa;

⁸ ohonde asangel’ato l’isei, boto onolangamel’aoyi ban’olotsi, boto’ona cilili, boto’ona mbongi, boto onofekya mposa inandamene;

⁹ boto onundamela yoi lina solosolo yok’onoki liho olakamaka, lacin’eho ainya likiky’ato la lilako lineyonga, ko lacin’eho aakole iy’anata ntango.

¹⁰ Lacina bike bon’ato bana lopoko bayali, banayatende baoyi banafana ncina ko bafot’ato nko mpota; banaleki nk’iy’anakesama yonge;

¹¹ ekoli lacina benyu’eniyo bemumame. Iyo bakakanza bemboi betu tuma, eneyalak’iyo baoyi banafakoli, nko lacin’ena nkita ena nsefo.

¹² Omoi’oniyo, nkanga eniyoamene, amila, ate, Ba-Kulete bayali nko bafoci bana mpoci, nyama in’owe, balei bana toma banaseki mponya.

¹³ Yoi line liyali nko solosolo. Lacin’eho, oafele lofeli lona locili, lacina baonge en’imeedyo,

¹⁴ batalofamelake basai ban’a-Yuda ko la beeka ben’ato banatumela solosolo eho mbusa.

¹⁵ Eneyali bato bana soto baoyi bahatu bayali nko soto; ohonde eneyali bato bana nsefo l’eneyali bato banafimedya efana nko le yoi limoko liyali soto, koko lokanyi loniyo la juge eniyo en’otema baehyama la nsefo.

¹⁶ Iyo bail’oka baeya Yakomba, ohonde baangan’ende l’ikambw’iniyo, eneyal’iyo bato bana nsefo mene, l’ana lopoka, ko bafakolana likambisa ekambwa emoko en’olotsi tu.