Malako 1 - Bokanda Bona Yakomba Bon’ototo

¹ Limatsako lin’osimo bon’olotsi bona Yesu Masiya, Bon’ona Yakomba.

² Yok’onoki baoyi otengamaka en’okanda bona Yesaya bosumoli, Lenda, latoma ekima enami en’oso bon’elongi ene; Ende angokoongedya mboka ene.

³ Lofoso lon’oto’omoi onololua ena sengelenge: Boongya mboka ena Yawe, Bociedya mboka inande.

⁴ Yoane ayaki, ko ainaki’ato en’okala bona sengelenge, ko alakaki lilako lin’eumbelo en’aoyi’owe lacin’en’etungwelo ena baho.

⁵ Ko bato ban’onyanga bona Yudea bahatu la baise Yelusalema baocoa eneyal’ende, ko bainamaki l’ende ena lose lona Yoladane, enek’iy’ofisolaka baoyi’owe’aniyo.

⁶ Yoane aolota bisenda bina besa bena ngamela, ko la bokoli bon’ekoto ena nyama ena litenaka linande; ko toma tonande tona ndaka nko mpalika la bohe.

⁷ Ko aosekody’osimo, ate, Boto’omoi onondek’emi locili ayayi ena mbusa enami; emi mpakoli lacina nsuname oyolitola bekoli bena tombwaku tonande.

⁸ Emi lakin’ino ena lose solosolo; koko ende angokin’ino ena Bolimo bon’olotsi.

⁹ En’esik’eho Yesu aoya ena Nazaleta, nk’eluku emoi ena Ngalilaya; ko ainama la Yoane ena Yoladane.

¹⁰ Ko isasanga, enem’end’otefwa ena lose, aena loola lokombwa, ko Bolimo boyakite eneyal’ende nko la yonge yok’ekoso.

¹¹ Ko lofoso lookana ena loola, ate, E oyali Bon’onami ona nganji, onombatel’emi ekiko mene.

¹² Isasanga Bolimo amotoma ena sengelenge.

¹³ Ko ayaaki ena sengelenge bekolo ntuk’inei, ayamekame la Satana; ayaaki meho ende la nyama in’olema; ko bikima bina loola bamokambya.

¹⁴ Eneki Yoane otungamaka en’onyolo, Yesu aoya ena Ngalilaya, ko aosekody’osimo bon’olotsi bona Yakomba,

¹⁵ ate, Esike emoyela, lifoka lina Yakomba limoolama; boyosume en’aoyi’owe, ko bimedya bosimo bon’olotsi.

¹⁶ Enem’end’oeta en’oseleka bona lose lona Ngalilaya, aena Simona ko la Andelo onotwa l’ende, bayafuse lisangi liniyo ena lose, lacin’oka iyo bayaaki bakembi bana nse.

¹⁷ Ko Yesu amasumola, ate, Boyaka, bonkile, ko nongokoil’ino boyalame bakembi ban’ato.

¹⁸ Ko isasanga baumbela basangi’aniyo ko bamokila.

¹⁹ Ko eneki’nd’olindak’isisali, aena Yakobo, bon’ona Zebedayo, la Yoane onotwa l’ende, bayatele basangi nk’en’atu.

²⁰ Isasanga amaelela, ko baocika Zebedayo bafango’oniyo ko l’asali en’atu, ko baokila nk’ende.

²¹ Ko baocoa ena Kapalanauma; ko isasanga en’ina bona Sabata aotua ena sunagoga ko amalaka;

²² ko baofefa la lilako linande, lacin’oka amalaka yoka boto’ona lifoka, efa yoka batengi ban’ekanda.

²³ Ko boto’omoi onoyaaki la lifoi lina nsefo ayaaki ena sunagoga; ko aololua,

²⁴ ate, Iso l’e, Yesu ona Nazaleta, tond’oya? Omoya nde oyoteehya? Lakey’e, On’oeka ona Yakomba.

²⁵ Ko Yesu amofela lofeli, ate, Yala mwi, ko fola eneyal’ende.

²⁶ Eneki lifoi okambolak’ende, liho yololua la lofoso lona lokolo, ko yofola eneyal’ende.

²⁷ Ko bato bahatu baofefa mpefa mene, ko baufolana, iy’ate, Yoi line lind’oya? Noka, lilako lina litoto nde liho! Asumola bafoi mene bana nsefo yoi, ko baimedya!

²⁸ Isasanga lokumo lonande lolinda ena bekala l’ekala en’onyanga bona Ngalilaya bohotu.

²⁹ Isasanga, enem’iy’ofolaka ena sunagoga, baotua en’otumba bona Simona l’ona Andelo, iyo la Yakobo la Yoane.

³⁰ Koko nyango en’ooli bona Simona aeci la nkangi en’efefe ena yonge, ko isasanga baosumola Yesu lacin’enande.

³¹ Ko aoya, amounda la likasa, ko ameetola; ko isasanga nkangi en’efefe eosila eneyal’e nde, ko amakambela.

³² Ko la likolo, eneki bina oilaka, bamoyela bato bahatu banayaaki la nkangi ko l’iyo banayaaki la bademona.

³³ Ko bonyanga bohotu bosusana en’onyua bon’otumba.

³⁴ Ko aikya bike bon’ato banayaaki la nkangi ina bekotua l’ekotua, ko aofodya bademona bike; ko aofekya bademona batatendake, lacin’oka baho baeyak’ende.

³⁵ Ko l’okulu mene, nko l’akel’ina, aetwa, ko aofola lacina acu ena sengelenge, ko aonda meho.

³⁶ Koko Simona l’iyo banayaaki l’ende bamokemba bili l’ili;

³⁷ ko enek’iy’osungyaka, bamosumola, iy’ate, Bato bahatu bakokemb’e.

³⁸ Ko amasumola, ate, Tocoake en’ili ben’enyanga ben’oli lacina nsekodya bosimo meho: ncina eneki’m’oyaka nd’eho.

³⁹ Ko aocoa oyosekody’osimo ena basunagoga baniyo bahatu ena Ngalilaya endotu, ko aofodya bademona.

⁴⁰ Ko boto’omoi onoyaaki la nkangi en’okenge aoya eneyal’ende, amoonda, ko amoosamela, ate, Nk’olanga yok’oho, onsongisa.

⁴¹ Ko Yesu amookamel’isei, aonanola likasa linande ko amosuka, amosumola, ate, Lalanga, songwaka.

⁴² Ko nk’enem’end’otenda, bokenge bosila eneyal’ende, ko aokulwa.

⁴³ Ko isasanga amoutodya, ko amofekya,

⁴⁴ ate, Lenda, tasumolake boto’omoko yoi line tu; koko coaka, oyotume eneyali nkanga, ko lekya toma lacin’en’esongwelo ene, nko toho tonatoki Mose otendak’ale, yoka ndembi eneyal’iyo.

⁴⁵ Koko ende aocoa, ko aomatsa lisekodya yoi liho, ko aolinza liho bike mene; ko la ncina eho, Yesu ataata etuelo en’onyang’oho la fololo: aocikala ena mbiolo en’onyanga, nk’en’ekala bena sengelenge; ko bato baoy’eneyal’ende nk’en’ili behetu.