Filemona 1 - Bokanda Bona Yakomba Bon’ototo

¹ Paulo, lisungu lina Masiya Yesu, la Timoteo efili eniso, eneyali Filemona onolangama l’iso ko onambana l’iso en’ekambelo,

² ko eneyali Apia mbangela eniso, l’eneyali Alukipo onambana l’iso en’ita, ko l’eneyali ekelesia eneyali en’otumb’one:

³ Isei la mwi eneyal’ino eneyali Yakomba Bafango’oniso ko la Nkolo Yesu Masiya.

⁴ Lakanga Yakomba enami lokango bina l’ina eneyakoondel’emi ena beondo’enami,

⁵ lacin’oka loka bosimo bona nganji ene ena lolango l’imeedyo inimedy’e Nkolo Yesu ko la ban’oeka bahatu.

⁶ Laonda lacin’eho eambanelo enamban’iyo en’imeedyo ine eonge ena njeya ena yoi la yoi lin’olotsi liniyali eneyal’iso lacin’ena Masiya.

⁷ Lacin’emi molata enyanga la ncicimodya en’otema bik’ike, efili, lacin’ena nganji ene ena lolango, lacin’oka betema bena ban’oeka bemocicima l’e.

⁸ Lacin’eho, kang’emi njali l’etelo ehatu eneyali Masiya lacin’eho nkosumole yoi linakolana nko nsumola,

⁹ ohonde, lacin’ena nganji ena lolango, emi Paulo, ngolosombo mene, ko isanga lisungu lina Masiya Yesu, lakoond’e nko mbonda.

¹⁰ Lakoonda lacin’ena bon’onami onoki’m’ootaka en’onyolo’onami, nko Onesimo.

¹¹ En’oso ende atakoatel’e nkita, ohonde isanga atoatel’is’afe nkita, l’emi l’e.

¹² Lomoutodya eneyal’e, nk’ende onoyali nk’eyoka botem’onamamene.

¹³ Nsokolanga lacina njomonya eneyal’emi, lacin’eho ankambya en’onyolo bon’osimo bon’olotsi, nk’ena mpuku ene;

¹⁴ koko ntalanga yila yoi limoko enetok’emi bonyu’one; lacina ekambwa ene en’isei ine iyalame nko l’eango eneamene, efa lacin’oka omosomyama losomo.

¹⁵ Yombo ende aalanaki l’e isisali lacin’eho oate nko locela:

¹⁶ efa lakina yoka boombo, ohonde onolekiboombo, nk’efili onolangama bike l’emi, ko l’e nko bike bonoleki, l’ena yonge l’eneyali Nkolo.

¹⁷ Yombo ontang’emi efili mene, otambe nk’eyoka ontamb’emamene.

¹⁸ Koko yombo akiilelaki yoi lin’owe, yombo ayali l’osilo eneyal’e, ondekedy’emi likambo liho;

¹⁹ emi, Paulo, latenga yoi line la likasa linamamene: nongokoutodya boho bonociki. (Mpakoofody’oka oyali l’osilo eneyal’emi, nk’e eamene.)

²⁰ O, efili, onjilele yoi line lacin’ena Nkolo. Cicimodya botem’onami eneyali Masiya.

²¹ Mokotengel’e baoyi’ane lacin’emi limedy’oka ongokamba, ko ley’oka ongoleka baoyi banakosumol’emi nko ndeka.

²² Koko onkoedya ekisel’ase nkoho, lacin’oka njali la lolendedyo, emite nongofama eneyal’ino lacin’ena beondo’enino.

²³ Epafala onoyali l’emi en’onyolo eneyali Masiya Yesu akeesa;

²⁴ ende la Malako la Alisitaluko la Dema la Luka banambana l’emi en’ekambelo.

²⁵ Isei ina Nkolo eniso Yesu Masiya iyalame l’olimo’onino. Ndoho.