Yona 1 - Bibilia Buk na Ŋun nagon koti luŋu a

Yona a wökön kago ko MATAT i komor

¹ A kulyaet lo MATAT poki ko Yona ŋuro lo Amitai adi,

² Ŋine ki, iti i köji duma nagon a Ninewe, tuköki ŋutu kanyit adi toronjin kase aje ’duruŋdyö ki koyo i komor.

³ Ama a Yona ŋine ki yopo wökön Tarasisa i lwöggu na mugun kogwon kulya ti MATAT. A nye lulurara kak tojo Yaŋo, a nye ryeji ki ’bo logon tu Tarasisa; a nye robbi ki ’bo, a kije lukata, a moraddi ko ŋutu lo gwon i ki ’bo kulo anyen tu tojo Tarasisa, i lwöggu na mugun kogwon kulya ti MATAT.

⁴ A MATAT gubakiŋdye kobuŋot duma i tor, a yala ya ’yi ya ’yu a duma i tor kata, a ki ’bo metani gwoso logon ’bu ’buköŋ.

⁵ A tomonok ti kare kujo-noni kujono, a ŋutu liŋ gwiki i ŋunyen kase; a se gumbe tito nagon gwon i ki ’bo kune i tor kata, anyen tiŋdu ki ’bo gwon pa ’de ’de. Ama a Yona aje ’beron lupö kak i ’dutet na ki ’bo, a piriki kak, a doto adi mwon.

⁶ A duma lo ki ’bo iti ko lepeŋ yu, a pipije lepeŋ adi, Do kado-tonit, kulya kunok gwon ada? ŋine ki, gwiki i ŋun ilot. Kode ŋona ŋilo ŋun de yeye yi, an yi twatwa.

⁷ A se tokulyaki ko ’borik adi, Po ta, ti yi gumbe ta guralan anyen yi de-ŋdi ko pa lo jakiŋdya yi ŋina toron. A se gumbe guralan, a gura ’duki a na Yona.

⁸ A se pipije lepeŋ adi, Boŋo taki yi, kita inot a nyo? Koti do po ya? Jur losu liya? Koti gweyari ilot a nyo?

⁹ A nye takiŋdye lepeŋat adi, Nan a Eberetyo; nan twoju MATAT ŋun lo ki, logon a gweja ko tor duma na ’balaŋ se ko kak lo.

¹⁰ A kulu ŋutu iŋge kujono parik, a se pipije lepeŋ adi, Yi ’dek deŋdya ko pa lo jakiŋdya yi ŋia a toron. Boŋo taki yi ŋo a nyo nagon do a kon? Kogwon kulu ŋutu a den adi nye a wokon i lwököddu na mugun kogwon kulya ti MATAT, kogwon nye aje takin se.

¹¹ A se pipije lepeŋ adi, Yi de konakin do nyo anyen tor boŋo gwo ’dan taliŋ kayaŋ? Kogwon tor ya ’yu parik lwö-lwöŋgu.

¹² A nye waddi lepeŋat adi, ’Dumu ta nan ko gubaddi ta nan i tor; a tor de boŋo gwo ’de taliŋ ko ta; kogwon nan a den adi ŋilo yala duma a pokin kasu kogwon kulya kwe.

¹³ Ama a kulu ŋutu kambi parik anyen ’dur i kijit, ama a se tine bulo kogwon tor ya ’yi parik Iwolwoŋgu.

¹⁴ A se gwiki ko MATAT adi, Pon MATAT, yi mo ’yu do, an do ko kolokin yi i twatwa kogwon yi kulo ’dek tolikiŋdyo ru na ŋilo ŋuto, an do ko tiŋdu rima kanyit kayaŋ i kusik adi yi a tatuja lepeŋ ko kana; kogwon do MATAT aje koŋdya gwoso na ’deggi do na.

¹⁵ A se ’dumun-dye Yona, a gubaddi lepeŋ i tör kata; a tor iŋge gwo ’dan i ya ’yu.

¹⁶ A kirut kulu ŋutu iŋge kujono MATAT bia parik, a ’duŋokiŋdye MATAT rubaŋga, a milyeji milyeju i konakiŋdya na lepeŋ na nene ŋo.

¹⁷ A MATAT wulökiŋdye sumuti duma anyen wiloddu Yona ’buluŋ; a Yona gwe ko sumuti i pele perok musala, ko tuparan ko tukwaje.