2 Timoteo 1 - Bibilia Buk na Ŋun nagon koti luŋu a

Romesi

¹ Nan Paulo a luyökie lo Kristo Yesu kogwon Ŋun ’de ’dekan sona, anyen gwiliŋit lo gwon ko Kristo Yesu i mugun logon nye a rukökin ŋutu lo boŋo tokuki se.

² Nan a roman ko do Timoteo ŋuro lio lo nyanyara, adi, Ti ’busan, ko yatet, se ko taliŋ na po ko Ŋun Monye na po ko Kristo Yesu Matat likaŋ na ti gwe ko do.

An do ko yu kwe i kulya ti Matat likaŋ

³ Nan a puŋa Ŋun logon nan a kitakiŋdya nye ko töili denet lo ’but lo gwoso nagon merenyejin kwe köju a kitakiŋdye lepeŋ nu. Nan puŋa lepeŋ na yeyeŋ nan do tuparan ko tukwaje koyo i kwasesi nu.

⁴ Nan yeye ŋolitan kunök, a nan gwe ko pusök i meddya na do, anyen nan böŋö lyölyöŋön parik.

⁵ Nan yeye yupet inot na to ’diri nagon pipiluŋdya ko yakanyu nagon a Loisi, koti ko nagon pipiluŋdya ko ŋuti nagon a Eunike, a nan iŋge yuŋ adi ŋina yupet kata konut.

⁶ Ko ŋina kwe nan toyiyikiŋdyö do, anyen do gwon gwoso ŋuto lo toregga kimaŋ i toŋiju na ’doket nagon Ŋun a tikin do, na gwon konut i mugun ŋina i diŋit na sopakiŋdye nan könisi kwe konut loki nu.

⁷ Kogwon Ŋun a ko tiŋdu yi toilyet kujönöesi, ama kölumbö lepeŋ tiŋdu yi toilyet logon ko riŋit, ko a ti nyaŋu, ko a ti teŋgu na mugun.

⁸ Nyenagon ti kwe inot gwe ti yu i tökoŋu na kulya ti Matat likaŋ, köti kwe inot gwe ti yu i kulya kwe nan logon a lo rereka lonyit, kölumbö paruŋdye ŋoŋga kogwon kulya ti Loŋe Lo ’but i riŋit na Ŋun.

⁹ Lepeŋ a lwöggu yi a luŋgi yi i gwon a Ŋutu kanyit loke. Lepeŋ a ko luŋgu yi kogwon ŋo na kon yi kune, ama kogwon yeyeet nanyit se ko ’busan na nyaŋu nanyit nagon nye a tiŋdu yi ko Kristo Yesu i mugun koju ’beron ti kak nyuŋ ’bayin.

¹⁰ Ŋina ’busan soŋinana aje kweki yi kogwon pukun na Kalwokönit likaŋ logon a Kristo Yesu. Kristo aje to ’duddyo riŋit na twan a paruŋdye ru na yeŋ nyin i Loŋe Lo ’but kata na.

¹¹ Ŋun a wuluŋdyo nan a katokuonit, ko a luyökie, ko a katodipönit lo ŋilo Loŋe Lo ’but,

¹² a nan iŋge ŋoŋga ko ŋina kwe. Ama kwe nio ti yu, kogwon nan deden nye logon nan yuyuŋ lo, a nan iŋge den ’bura adi nye bubulo tiju ŋo nagon nan a yinikin lepeŋ kune tojo ko ŋilu lor lo ’dutet.

¹³ Kulyaesi logon tiŋdu ŋutu i gwon ’bura logon do a yiŋun köyo kilo, tiŋdi se konut i komŋo a miret; si ’dani i yupet ko i nyaŋu nagon a kaŋ ko Kristo Yesu i mugun kine.

¹⁴ Tiji ŋo na ’but nagon a yiniki do kine ko riŋit na Mulökotyo Loke lo gwon kayaŋ i mugunya lo.

¹⁵ Do deden adi ŋutu liŋ ti Asia aje kolokin nan, kegga Pugelo se ko Ermŋgene.

¹⁶ Ti Matat gwe a lo ’but ko mede na Onesiporo, kogwon lepeŋ a togo ’yu nan daŋin jore, a kwe nanyit tine yu i gwon nio i kadi rereket,

¹⁷ ama ko nye a ’durökin Roma ni, a nye suluje ga ’yu nan tojo nye a ryo nan.

¹⁸ Do deden ’bura kitajin jore nagon nye a konakin nan Epeso yu kunu. Ti Matat tiki lepeŋ i ryeju na yatet nanyit na Matat i ŋilu lor lo ’dutet.