You7anna 1 - Bible bil 3arabe App

Kelmet ALLAH

¹ Bel-bideye ken el-kelme, wel-kelme ken 3end ALLAH, wel-kelme houe ALLAH.

² Houe bel-bideye ken 3end ALLAH.

³ Bi-wasteto sar kell shi, bidouno ma ken sar shi min yalle sar.

⁴ Minno ejet el-7ayet, w-7ayeto nour lal-nes.

⁵ Wel-nour dawwa bel-3atme, wel-3atme ma edrit 3le.

⁶ Zahar rasoul min ALLAH esmo You7anna.

⁷ Eja yesh'had lal-nour 7atta y2ãmno el-nes 3ala 2ido.

⁸ Ma ken houe el-nour, bass eja ta-yesh'had lal-nour.

⁹ El-kelme houe el-nour el-7a2i2e, eja 3al-3alam la-ynawwir kell 2ensen.

¹⁰ W-ken bel-3alam, w-bi-wasteto sar el-3alam, bass el-3alam ma 3erfo.

¹¹ Eja 3ala beyto, w-ma 2eblouh ahl beyto.

¹² Bass yalle 2eblouh, ye3ne el-mou2minin bi-esmo, 3atahon soultan enno ysiro wled ALLAH,

¹³ w-henne yalle khel2o mish min la7m w-damm wala min shahwet el-jesm wala min iradet 2ensen, khel2o min ALLAH.

¹⁴ Wel-kelme sar bashar w-sakan baynetna, w-shefna majdo majd melyen ne3me w-7a2, akhado el-2eben el-wa7eed min el-Ãb.

¹⁵ Shehedlo You7anna w-neda: "hayda houe yalle 2elt 3anno: byeje min ba3de w-houe a3zam minne, li2anno ken abl ma enwejid."

¹⁶ Min fayd ne3amo akhadna kellna ne3me fo2 ne3me,

¹⁷ li2anno ALLAH bi-Moussa 3atana el-shari3a, bass bi-YASOU3 el-MASI7 3atana el-ne3me wel-7a2.

¹⁸ Ma 7ada shef ALLAH. El-Ileh el-wa7eed yalle bi-7odn el-Ãb houe yalle khabbar 3anno.

Shahedet You7anna el-ma3maden

¹⁹ Hayde shahedet You7anna, lamma ba3atoulo el-Yahoud min Ourashalim kahane w-lawiyyin ta-yes2alouh: "meen enta?"

²⁰ 3taraf w-ma nakar, 2al: "ana mish el-MASI7."

²¹ 2alo: "meen enta, fa-ezan? Enta Eliyya?" 2al: "ana mish Eliyya." 2alo: "enta el-nabe?" Jewab "la2."

²² 2aloulo: "meen enta, 7atta nekhod el-jaweb la-yalle ba3atouna. Shou bit2oul 3an 7alak?"

²³ 2al: "ana, metl ma 2al el-nabe Ashe3ya: "sawt 3am yesrokh bel-barriye: jallso tari2 el-RAB."

²⁴ W-ken bayneton ferrisiyyin,

²⁵ 2alo la-You7anna: "keef 3am bit3ammed w-enta mish el-MASI7 wala Eliyya wala el-nabe?"

²⁶ Jewabon: "Ana b3ammed bel-may, bass fi baynetkon wa7ad ma bta3erfouh.

²⁷ Houe yalle byeje min ba3de, bikoun a3zam minne, w-ana ma best7e2 fekk shrit sandalo."

²⁸ Sar kell hal-shi bi-Beyt-3anya, wara Nahr el-Ordon, matra7 ma ken You7anna 3am bi3ammed.

YASOU3 7amal ALLAH

²⁹ W-tene nhar shef You7anna YASOU3 jeye sawbo, 2al: "hayda houe 7amal ALLAH yalle bisheel khatiyyet el-3alam.

³⁰ Hayda houe yalle 2elt 3anno: byeje min ba3de rejjel a3zam minne, li2anno ken able.

³¹ W-ma kent ba3erfo, jeet 3ammed bel-may 7atta yezhar la-Isra2il."

³² W-shehed You7anna, 2al: "sheft el-rou7 nezil min el-sama bi-shakl 7ameme w-hede 3le.

³³ W-ma kent ba3erfo, bass yalle ba3atne la-3ammed bel-may 2alle: "yalle bitshouf el-rou7 byenzal w-byehda 3le houe yalle ra7 y3ammed bel-ROU7 el-2ODOS.

³⁴ W-ana sheft w-sh'hedet enno houe 2eben ALLAH."

Tlemiz YASOU3 el-ouwal

³⁵ W-bel-yawm el-tene ken You7anna we2if honik, w-ma3o tnen min tlemizo.

³⁶ Ettalla3 3a-YASOU3 yalle ken meri2 w-2al: "hayda houe 7amal ALLAH."

³⁷ Sem3ouh el-telmizen, w-le7'2o YASOU3.

³⁸ Ltafat YASOU3 w-shefon le7'2ino, 2allon: "shou badkon?" 2alo: "Rabbi (ye3ne ya mou3allim) wayn sèkin?"

³⁹ 2al: "ta3o shoufo." Ra7o w-shefo wayn sèkin, w-be2yo ma3o bi-haydak el-yawm, w-kenit el-se3a shi arb3a ba3d el-dohr.

⁴⁰ W-ken Endrawos khayy Sem3an Boutros wa7ad min el-telmizen yalle sem3o kalem You7anna w-le7'2o YASOU3.

⁴¹ W-lta2a Endrawos bi-khayyo Sem3an, w-2allo: "l2ina el-Messiya", ye3ne el-MASI7.

⁴² W-jebo la-3and YASOU3, ettalla3 fih YASOU3 w-2al: "enta Sem3an 2eben You7anna, w-ra7 sammik "Kifa" (ye3ne sakhr)."

YASOU3 byed3e Filippos w-Nathana2il

⁴³ W-tene nhar ken YASOU3 baddo yrou7 3al-Jaleel. Lta2a bi-Filippos, w-2allo: "l7a2ne."

⁴⁴ W-ken Filippos min Beyt-Sayda, madinet Endrawos w-Boutros.

⁴⁵ W-lta2a Filippos bi-Nathana2il, 2allo: "l2ina yalle zakaro Moussa bel-shari3a, wel-anbiya bel-ketob, w-houe YASOU3 2eben Youssef min el-Nassira."

⁴⁶ 2allo Nathana2il: "leysh el-Nassira byetla3 minna shi mni7?" Jewabo Filippos: "ta3a w-shouf."

⁴⁷ W-shef YASOU3 Nathana2il jeye sawbo, 2al: "hayda Isra2ile 7a2i2e ma fiyo ghesh!"

⁴⁸ 2allo Nathana2il: "keef 3refetne?" Jewabo YASOU3: "sheftak ta7t el-teene abl ma ynedik Filippos."

⁴⁹ 2al Nathana2il: "enta ya mou3allim 2eben ALLAH. Enta malik Isra2il!"

⁵⁰ Jewabo YASOU3: "2ãmanet li2anno 2eltellak: sheftak ta7t el-teene? Ra7 tshouf a3zam min hek."

⁵¹ W-2allo: "b2elkon el-7a2i2a, ra7 tshoufo el-sama maftou7a w-maleyket ALLAH tal3in w-nezleen fo2 2eben el-2ensen."