Titos 1 - Bible bil 3arabe App

Ta7iyye

¹ Min Boulos khadim ALLAH w-rasoul YASOU3 el-MASI7 kermel yehde yalle khtaron ALLAH lal-imen w-la-ma3rifet el-7a2 yalle byetwefa2 ma3 el-ta2wa

² 3a-raja el-7ayet el-abadiyye yalle wa3ad ALLAH el-sade2 fiya min el-azal,

³ w-2al kelmto bel-wa2et el-m7addad bel-tebshir yalle houe amene bayn 2ideyye bi-2amr min ALLAH moukhallisna,

⁴ la-Titos 2ebne bel-imen el-moushtarak. Elak el-ne3me wel-salem min ALLAH el-Ãb wel-MASI7 YASOU3 moukhallisna.

Titos bi-Krit

⁵ Taraktak bi-Krit 7atta tkammil tonzim el-eshya el-be2ye w-tersom shyoukh bi-kell madine metl ma wassaytak,

⁶ w-tersom yalle bikoun mnazzah 3an el-lawm, w-mzawwaj mara we7de, w-wledo bi2ãmno, ma byettehemon 7ada bel-taysh wala metmarrdin.

⁷ Li2anno el-motran, bi-sifato wakeel ALLAH, lezim ykoun mnazzah 3an el-lawm, mish mitkabber wala ghadoub wala sekkir wala 3aneef wala tem3an bel-reb7 el-rkhis,

⁸ lezim ykoun medyaf bi7ebb el-kheyr, razin, 3adel, ta2e, byedbat nafso

⁹ byetmassak bel-kalem el-sade2 el-mouwefe2 la-ta3alimna, ta-ykoun edir enno you3az bel-ta3lim el-sa7i7 w-yredd 3al-m3ardin.

¹⁰ Sar fi ktir nes metmarrdin, letletin, dejjelin w-khsouse bayn el-Yahoud,

¹¹ nes metl hawde lezim tsakkerlon temmon li2anno 3am bikharbo byout bi-kemila lamma 3am bi3allmo yalle mish lezim y3allmouh kermel el-reb7 el-rkhis.

¹² Wa7ad minnon 2al, w-houe el-nabe taba3on: "ahl Krit deyman kezzebin, w-w7oush khabithe, fej3anin w-keslenin."

¹³ W-hayde shahede sad2a, kermel hek lezim twabbekhon ktir 7atta ykoun imenon sa7i7,

¹⁴ w-ma yetmassako bi-khourafet Yahoudiye w-wassaya sha3b byerefdo el-7a2.

¹⁵ El-an2iya, kell shi 3endon na2e, bass el-nejsin wel-keffar, ma 3endon shi na2e, 7atta 3ou2oulon w-damayeron nejse.

¹⁶ Byedde3o enno bya3erfo ALLAH, bass henne byenekrouh bi-a3melon. W-henne ashrar metmarrdin mish edrin ya3emlo shi mni7.