Filimon 1 - Bible bil 3arabe App

Ta7iyye

¹ Min Boulos el-ma7bous kermel el-MASI7 YASOU3 w-min khayyna Timothawos la-Filimon, yalle min7ebbo w-rfi2na bel-3amal,

² w-lal-knise yalle 3am tejteme3 bi-beytak, w-la-ekhetna Apifiyya w-la-rfi2na bel-kife7 Arkhipos.

³ Elkon el-ne3me wel-salem min ALLAH bayyna w-min el-RAB YASOU3 el-MASI7.

Ma7abbet Filimon w-imeno

⁴ Kell ma zakartak bi-salawete shakaret Ilehe

⁵ 3a-yalle sme3to 3an imenak w-ma7abbtak lal-RAB YASOU3 w-la-kell el-ekhwe el-2eddisin,

⁶ 3a-2amal enno mousheraktak bel-imen tef3al fe3la, se3eta bta3rif mni7 mada el-kheyr yalle fik ta3emlo kermel el-MASI7.

⁷ W-mada el-fara7 wel-ta3ziye yalle 7asseyton bi-fadl ma7abbtak, ya khayye, li2anno 2loub el-ekhwe el-2eddisin akhado fik rou7.

Shafe3it Boulos la-Onisimos

⁸ Kermel hek, w-ma3 enno 3ende kell el-jer2a bel-MASI7 enno e2emrak shou lezim ta3mil,

⁹ faddalet enno etrajjek bi-esm el-ma7abbe, ana Boulos el-sheykh el-kbir wel-ma7bous halla2 kermel el-MASI7 YASOU3,

¹⁰ bi-khsous Onisimos yalle sar 2ebne bel-imen, ana w-bel-7abs,

¹¹ w-houe bel-made ma ken yenfa3ak la-shi, bass liom sar yenfa3ak w-yenfa3ne.

¹² Badde reddellak yeh, 2balo ka2anno sha2fe min 2albe,

¹³ w-kent 7abeb khallih hon ma3e ta-yekhdemne badelak enta, ana w-ma7bous kermel el-injil,

¹⁴ bass ma 7abbeyt a3mil shi bidoun mwefa2tak, 7atta el-mni7 yalle baddak ta3emlo ykoun 3an tibet khater mish ghasb 3annak.

¹⁵ W-yemken hal-medde min el-wa2et yalle 3asha Onisimos b3id 3annak, ma kenit ella ta-testarej3o lal-abad,

¹⁶ bass min liom w-raye7 mish ra7 ykoun 3abd, ra7 ykoun afdal min 3abd, ra7 ykoun ka-khayy 7abib bel-MASI7, bi3ezz 3leyye, w-addeysh bel-a7ra ra7 y3ezz 3leyk, enken ka-khayy bel-jesm aw ka-khayy bel-RAB.

¹⁷ W-eza kent bte3teberne shrikak bel-imen, 2balo ka2annak 3am te2balne ele.

¹⁸ W-eza ken gholit bi-7a'2ak aw madyoun elak bi-shi, 7sebon 3leyye.

¹⁹ W-ana Boulos bouwfe bi-kaleme, w-hal-shi katabto bi-khatt 2ide w-ma b2ellak enno enta madyoun ele 7atta bi-nafsak.

²⁰ Eh, ya khayye, 3mol ma3e hal-kheyr kermel el-RAB w-farre7le 2albe kermel el-MASI7.

²¹ W-3ende thi2a, ana w-3am bekteblak, enno ra7 tlabbe talabe, w-m2akkad ennak ra7 ta3mil aktar min yalle 3am betolbo minnak.

²² W-bi-zet el-wa2et 7adderle beyt, li2anno bitmanna enno salatkon yesma3a ALLAH w-erja3 la-3andkon.

Ta7iyyet akhira

²³ Bisallem 3leykon Abafras el-ma7bous ma3e kermel el-MASI7 YASOU3,

²⁴ w-Mercos w-Aristarkhos w-Dimas w-Lou2a rife2e bel-tebshir.

²⁵ Ne3met el-RAB YASOU3 el-MASI7 tkoun ma3 rou7kon.