Colossi 1 - Bible bil 3arabe App

Ta7iyye

¹ Min Boulos Rasoul el-MASI7 YASOU3 bi-iradet ALLAH w-min khayyna Timothawos

² lal-2eddisin yalle bi-Colossi, el-ekhwe el-mou2minin bel-MASI7. Elkon el-ne3me wel-salem min ALLAH bayyna.

Salat Shokr

³ Mneshkor ALLAH bayy RABNA YASOU3 el-MASI7, kell ma sallayna kermelkon,

⁴ 3ala yalle wossilna 3an imenkon bel-MASI7 YASOU3 w-ma7abbetkon la-kell el-ekhwe el-2eddisin

⁵ kermel el-raja yalle 7addaro ALLAH elkon bel-sama, el-raja yalle sme3to fih min abl, bi-kelmet el-7a2, ye3ne bel-injil

⁶ yalle wossilkon metl ma wossil lal-3alam kello, w-sar yethmor w-yenteshir fih metl ma 3am yethmor w-yenteshir baynetkon min wa2et ma sme3to bi-ne3met ALLAH w-3reftouwa kell el-ma3rife.

⁷ W-hal shi t3allamtouh min Abafras, rfi2na el-7abib bel-khedme la-ALLAH wel-khadim el-ameen lal-MASI7 3endkon.

⁸ W-houe yalle khabbarna addeysh el-ROU7 el-2ODOS 7atit fikon ma7abbe.

El-MASI7 el-fadi

⁹ Kermel hek minsalle bi-kell wa2et kermelkon, min wa2et ma sme3na hal-shi 3annkon, w-mnes2al ALLAH enno ymallikon bi-ma3rifet iradto, w-bel-7ekme wel-fehm el-rou7e,

¹⁰ 7atta t3isho bi-7ayetkon metl ma bili2 lal-RAB w-byordih kell el-rida w-btethemro kell 3amal sale7 w-btekbaro bi-ma3rifet ALLAH,

¹¹ w-edrto yalle kella majd, ta3tikon kell shi fi 2ouwwe, ta-tet7ammalo bi-fara7 kell shi bi-kell thabet w-sabr,

¹² w-teshekro el-Ãb li2anno 3atakon el-7a2 ennkon tourato bi-malakout el-nour ma3 el-2eddisin.

¹³ Houe yalle khallasna min soultet el-zalam w-na2alna la-malakout 2ebno el-7abib,

¹⁴ yalle fadena, ye3ne ghafarelna el-khataya.

¹⁵ Houe souret ALLAH yalle ma byenshef bel-3ayn, el-mawloud abl kell el-khali2a.

¹⁶ Bi-wasteto khala2 ALLAH kell shi bel-sama w-3al-ard, yalle byenshef w-yalle ma byenshef: enn keno as7ab 3arsh aw siyede aw ri2ase aw soulta. Bi-wasteto w-kermelo khala2 ALLAH kell shi.

¹⁷ Ken abl kell shi w-bi-wasteto byetkawwan kell shi.

¹⁸ Houe ras el-jesm, ye3ne ras el-knise, w-houe el-bideye w-awwal el-2eymin min bayn el-mawta, ta-ykoun el-awwal bi-kell shi,

¹⁹ li2anno ALLAH arad enno ykoun 7ader bi-kell oulouhto bi-2ebno.

²⁰ W-enno ysale7 bi-wasteto kell shi 3al-ard w-bel-sama, w-bi-dammo 3ala el-salib t7a'2a2 el-salem.

²¹ Min abl kento ghouraba 3an ALLAH w-a3de2 elo bi-afkarkon w-a3melkon el-3atle,

²² bass halla2 sala7kon bi-jesm el-MASI7 el-bashare, lamma sallamo lal-mawt ta-tou2afo eddemo 2eddisin bidoun zanb wala lawm,

²³ 7atta tethbato bel-imen reskhin mish mza3za3in wala btet7awwalo 3an raja el-injil yalle sme3to fih w-wossil la-kell khali2a ta7t el-sama, w-sert ana Boulos khadim elo.

Jihed Boulos

²⁴ W-ana halla2 befra7 bel-ãlem yalle b3aniya kermelkon, ta-kammil bi-jesme yalle ba3do na2is min ãlam el-MASI7 kermel jesmo yalle houe el-knise

²⁵ yalle sert khadim ela bi-tedbir min ALLAH kermelkon, w-bkhalle kelmet ALLAH ma3roufe kell el-ma3rife,

²⁶ w-hiye el-serr yalle katamo ALLAH toul el-douhour wel-ajyel w-kashafo halla2 la-2eddisino

²⁷ yalle arad ALLAH elon enno ya3erfo addeysh ken hal-serr ghane w-kello majd 3end el-mish Yahoud, ye3ne enno el-MASI7 fikon w-houe raja el-majd.

²⁸ Hal-serr yalle 3am minbasher fih kell el-nes w-min3allemon bi-kell 7ekme ta-nkhalle kell 2ensen kemil bel-MASI7.

²⁹ W-kermel hek bet3ab w-bjehid bi-fadl edrto yalle bteshteghil fiyye bi-2ouwwe.