YAMISI 1 - Bisã Bible 2005

Yɔ̃ogwanaa

¹ Yamisi, Luda kũ Dikiri Yesu Kirisio zɔ̀bleri mɛ́ à fɔ kpà Isaraila buri mɛ̀n kuri awɛɛpla kũ ò fãkɔ̃ananɔa.

² Ma gbɛ̃nɔ, wari burinɔ dasi. À pɔ́ kũ ani á le ditɛ pɔnna yã ũ,

³ zaakũ á dɔ̃ kũ á ludanaanikɛna yɔ̃ogwana ni mɛna iárɛ.

⁴ À tó mɛna papaáwa, de àgɔ̃ de gbɛ̃ kàsaranɔ ũ swáswa yãke kĩanaáwa sari.

⁵ Tó ɔ̃ndɔ̃ tɛn kĩa á gbɛ̃kea, à wɛ́ kɛ Ludaa, ani a gba, zaakũ àdi gbɛ̃ sĩnda pínki gba pɔ́ kũ nɛ̀sɛɛo do taari'enaa sari.

⁶ Tó à wɛ́ kɛ̀a sɔ̃, à a náani kɛ sikaa sari, zaakũ sikade de lán ko vlã bàmɛ. Gu kũ ĩa kàkan, gwen àdi litɛn.

⁷ Gbɛ̃ bire taka súngɔ̃ da áni pɔ́ le Dikiriaro,

⁸ zaakũ a nɛ̀sɛ kun plaplamɛ, akũ àdigɔ̃ sika kɛ yã kũ àtɛn kɛ gũn pínki.

⁹ Takaside kũ à kú ó tɛ́ pɔnna kɛ, kũ Luda a kàra yãi.

¹⁰ Aruzɛkɛde pɔnna kɛ, kũ Luda a làgo yãi, zaakũ aruzɛkɛdenɔ ni gɛ̃tɛ lán lávu kɔtɛnaa bàmɛ.

¹¹ Ifãntɛ̃ dì futɛ kũ a puusu gbãnao, à lánɔ dì kori kɛ, a vu dì kɔ́tɛ, a manakɛ dì láka. Lɛn aruzɛkɛde ni kpágui a bɔkɔtɛnanɔ gũn lɛ.

¹² Arubarikaden gbɛ̃ kũ àdi yɔ̃ogwana fɔ̃ ũ, zaakũ a bona mana gbɛra Luda ni wɛ̃̀ndi kũ à a lɛ́ sɛ̀ gbɛ̃ kũ ò yeainɔnɛ kɛnɛ yàri ũ.

¹³ Tó yɔ̃ogwana gbɛ̃ lè, àsun pi Ludamɛro, zaakũ oni fɔ̃ ò Luda lɛ́ ò gwà kũ a vãnioro, akũsɔ̃ àpii dì gbɛ̃ke yɔ̃ à gwa kũ a vãnioro.

¹⁴ Baadi yɔ̃ogwanaa dì bo a pɔ́nidɛna kĩnaamɛ, akũ àdi a wɛ́ ble à a gátɛ.

¹⁵ Akũ pɔ́nidɛnaa pìi dì nɔ̀ sí à nɛ́ i durunna ũ. Tó durunna zɔ̃kɔ̃ kũ̀ sɔ̃, àdi ga imɛ.

¹⁶ Ma gbɛ̃ yenyĩdenɔ, àsun á zĩda sãtɛro.

¹⁷ Gba mana swáswa sĩnda pínki dì bo musu, De Luda pɔ́gupurinɔ Kɛ̀ri kĩnaamɛ. Àdi litɛro, a gupura i dì lagoro.

¹⁸ A pɔyenyĩnaa gũn à ó í kũ a yã yãpuradeo, de ò le ògɔ̃ arɛ a pɔ́ kũ à kɛ̀nɔ tɛ́.

Yãmana kũ a kɛnaao

¹⁹ Ma gbɛ̃ yenyĩdenɔ, à yã dí ma. Àgɔ̃ yã ma likalika á pínki, ama àsun yã o likalikaro, àsungɔ̃ pɔ fɛ̃ likalikaro.

²⁰ Zaakũ bisãsiri pɔfɛ̃ dì su kũ yã mana kũ Luda yeiioro.

²¹ Abire yãi à ɔ gbarɛ dà vãni kũ yã pãsĩ kũ à dàgulanɔi pínki. À yã kũ ò tɔ̃̀ á swɛ̃̀n, kũ ani fɔ̃ à á sura ba sí kũ zĩdabusanaao.

²² Àsun á zĩda sãtɛro, àsun yã pì ma kũ são pãro, à zĩ kɛa.

²³ Zaakũ gbɛ̃ kũ àdi yã ma, akũ àdi zĩ kɛoro de lán gbɛ̃ kũ àtɛni a zĩda gwa dígi gũn bàmɛ.

²⁴ A zĩda gwanaa gbɛra, tó à gɛ̃̀ zɛ́la, lákũ à de nà dì sãagu gɔ̃̀nɔmɛ.

²⁵ Gbɛ̃ kũ a wɛ́ pɛ́ Luda doka papanaaa kũ àdi tó ò gɔ̃ zĩdadenɔ ũ, akũ àdigɔ̃ gɛ́o arɛ, àdi ma à sãaguro, àdi zĩ kɛamɛ, Luda ni arubarika da adegu a yãkɛnaa gũn.

²⁶ Tó gbɛ̃ a zĩda dìtɛ donyĩri ũ, akũ àdi a lɛ́ fɔ̃ro, àtɛni a zĩda kɛkɛmɛ, àtɛn donyĩ kɛ pãmɛ.

²⁷ Donyĩkɛna swáswa kũ à taari vĩ De Ludanɛron dí: Ò tonɛnɔ kũ gyaanɔnɔ gwa ń wɛ̃ndakɛ gũn, ògɔ̃ ó zĩda kũna dɔ̃ gbãsĩ sari andunia yã musu.