Aanlyn Bybel

RUTU 4 - Bisã Bible 2005

Rutu zãkɛna kũ Bɔazao

¹ Bɔaza gɛ̀ɛ à vùtɛ wɛ̃tɛ bĩnilɛa, akũ à è danɛ kãni bòri kũ à a yã òo pì tɛn su. Akũ à pì: Ma gbɛ̃, ǹ mɔ́ ǹ vutɛ.

² Akũ à wɛ̃tɛ gbɛ̃ zɔ̃kɔ̃nɔ sìsi gbɛ̃nɔn kuri à pì ò vutɛ.

³ Akũ à pì danɛ kãni kũ ani a sura ba pìinɛ: Naomi kũ à sù kũ Mɔabunɔ bùsuuo tɛni ó vĩ̀ni Ɛlimɛlɛki bura kpado yía.

⁴ Akũ ma è à mana mà a yã onnɛ, de ǹ lú ó gbɛ̃ zɔ̃kɔ̃ kũ ò vutɛna lanɔ wára. Tó ń ye ǹ lúmɛ, ǹ lú. Tó ń ye ǹ lú sɔ̃ro, ǹ omɛnɛ mà ma, zaakũ mɔkɔ̃n mɛ́ ń a luna zɛ́ vĩ. Tó n bakanlo, séde makũ mà lú. Akũ gɔ̃gbɛ̃ pìi pì: Mani lú.

⁵ Akũ Bɔaza pì: Tó n bura pìi lù Naomi kũ Mɔabu nɔgbɛ̃ Rutuoa, ĩni gbɛ̃ kũ à gà gyaanɔ le dɔ, de a tɔ́ le à gɔ̃ a túbia.

⁶ Akũ danɛ kãni bòrii pìi pì: Tó lɛn à de lɛ, mani lúro, de màsun ma zĩda túbi yakaro yãi. Ǹ n pɔ́ lú, zaakũ mani fɔ̃ mà lúro.

⁷ Isarailanɔ bùsun yã tó gbɛ̃ tɛn bura lú ke tó àtɛni a lilin kɛ, tó àtɛn yã mì láka, àdi a kyate gbá do bo à kpá gbɛ̃amɛ yã pì lakana sèeda ũ Isarailanɔnɛ.

⁸ Kũ danɛ kãni bòrii pìi pì Bɔazanɛ à lú, akũ à a kyate bò à kpà Bɔazaa.

⁹ Akũ Bɔaza pì gbɛ̃ zɔ̃kɔ̃ɔ pìnɔnɛ kũ gbɛ̃ kparanɔ ń pínki: Ákɔ̃nɔmɛ sèedadenɔ ũ gbãra, kũ ma Ɛlimɛlɛki kũ Malonuo kũ Kiliɔ̃o pɔ́nɔ lù Naomia pínki.

¹⁰ Akũ ma Malonu gyaanɔ Rutu, Mɔabu nɔgbɛ̃ lè nɔ ũ dɔ, de gbɛ̃ kũ à gàa pì tɔ́ le àgɔ̃ kú a túbia, de a tɔ́ sún ga a gbɛ̃nɔ tɛ́ ke a wɛ̃tɛ díkĩna gũnlo. Ákɔ̃nɔmɛ yã pìi sèedadenɔ ũ gbãra.

¹¹ Akũ gbɛ̃ zɔ̃kɔ̃ɔ pìnɔ kũ gbɛ̃ kũ ò kú gãnu gũnnɔ pì ń pínki: Ókɔ̃nɔmɛ sèedadenɔ ũ. Dikiri tó nɔgbɛ̃ kũ àtɛn gɛ̃ n ɔnn pì gɔ̃ lán Rahila kũ Leao bà, kũ ò Isarailanɔ buri kɛ̀. Ani tó ǹ gbãna kũ Ɛflata bùsun ǹ tɔ́ bo Bɛtilihamu.

¹² Dikiri tó buri kũ ani kpámma kũ nɔgbɛ̃ pìionɔ gɔ̃ lán Pɛrɛzi kũ Tama ì Yudanɛɛ burinɔ bà.

Dauda buri bozirɛ

¹³ Akũ Bɔaza Rutu sɛ̀ nɔ ũ. À wùtɛ kãao, akũ Dikiri tò à nɔ̀ɔ sì, akũ à nɛ́ ì gɔ̃gbɛ̃ ũ.

¹⁴ Akũ nɔgbɛ̃nɔ pì Naominɛ: O Dikiri sáabu kɛ̀, adi n tó buri sari gbãraro. Luda tó nɛ́ pì tɔ́ bo Isarailanɔ tɛ́.

¹⁵ Ani n laakari kpátɛnnɛ, ani n gwa n zĩkũnaa gũn, zaakũ n nɛ́ gyaanɔ kũ à yenyĩ mɛ́ à a ìnnɛ, akũsɔ̃ à manannɛ de nɛ́gɔ̃gbɛ̃ gbɛ̃nɔn supplanɔla.

¹⁶ Akũ Naomi nɛ́ pìi sɛ̀ à kpà a kùla à gɔ̃̀ a gwàri ũ.

¹⁷ Akũ nɔgbɛ̃ kũ ò kú gwenɔ pì: Ò nɛ́gɔ̃gbɛ̃ ì Naominɛ. Akũ ò tɔ́ kpànɛ Ɔbɛdi. Àkũmɛ Yɛsɛ de, Dauda dizi ũ.

¹⁸ Pɛrɛzi burinɔ tɔ́n dí: Pɛrɛzi mɛ́ à Ɛzɛrɔnu ì,

¹⁹ Ɛzɛrɔnu Ramu ì, Ramu Aminadabu ì,

²⁰ Aminadabu Nasɔ̃ ì, Nasɔ̃ Salamɔ ì,

²¹ Salamɔ Bɔaza ì, Bɔaza Ɔbɛdi ì,

²² Ɔbɛdi Yɛsɛ ì, akũ Yɛsɛ Dauda ì.

« Vorige

Volg ons:

Geborgde skakels

Advertensies