Aanlyn Bybel

RUTU 3 - Bisã Bible 2005

Rutu kũ Bɔazao zaa pɔ́wɛgbɛ̃kia

¹ Naomi pì a nɛ́ gyaanɔ pìinɛ: À mana mà bɛ wɛtɛnnɛ, gu kũ ĩni le ǹgɔ̃ kunwa aafia.

² Bɔaza kũ ń kú kũ a zĩkɛrinɔ bi ó danɛnloo? Àkũ mɛ́ àtɛn pɔ́wɛ gbɛ̃ ɔkɔsiala.

³ Ǹ zú o ǹ nísi dɔkɔ. Ǹ n aso mana da ǹ gɛ́ pɔ́wɛgbɛ̃kia. Ǹsun tó à dɔ̃ ń kú gwero ari à pɔ́ blè à í mì à làkao.

⁴ Tó à wùtɛ, ǹ gu kũ à wùtɛn gwa, ǹ gɛ́ ǹ a biza lɛ́ sɛ́ ǹ wútɛ a gbá sarɛ. Ani yã kũ ĩni kɛ onnɛ.

⁵ Akũ à pìnɛ: Yã kũ n ò pínki, mani kɛmɛ.

⁶ Akũ à gɛ̀ɛ pɔ́wɛgbɛ̃kia à yã kũ a zã da ònɛɛ pìi kɛ̀ pínki.

⁷ Bɔaza pɔ́ blè à í mì, a pɔ kɛ̀ nna. À gɛ̀ɛ à wùtɛ pɔ́wɛ tuku sarɛ dire kpa, akũ Rutu lɔɔtɛ̀i tɛɛnɛ, à biza gò a gbáa à wùtɛ gwe.

⁸ Lizãndo kũ Bɔaza kɛ̀ gìri, à vù kũ io à lìtɛ, akũ à lè nɔgbɛ̃ mɛ́ à wutɛna a gbá sarɛ.

⁹ Kũ à pì, dímɛɛ, akũ Rutu wèa à pì: N zĩkɛri Rutumɛ. Ǹ n biza lɛ́ kúmala, zaakũ ma danɛ kãni kũ ani ma bomɛ n ũ.

¹⁰ À pìnɛ: Dikiri arubarika dangu! Gbɛ̃kɛ kũ n kɛ̀ kpɛkpɛ díkĩna de a káakupɔla. Ńdi gɛ́ kɛfɛnna wɛtɛro, takaside kesɔ̃ aruzɛkɛde.

¹¹ Ǹsun tó vĩna n kũro. Pɔ́ kũ n wɛ́ kɛ̀ pínki, mani kɛnnɛ, zaakũ wɛ̃tɛdenɔn dɔ̃ kũ nɔ manamɛ n ũ ń pínki.

¹² Yãpuramɛ! N danɛn ma ũ, ama danɛ kãni pãnde kun à kãni demala.

¹³ Ǹ i la gwãaniala, zia kɔnkɔ tó à ye à n bomɛ, à mana, à n bo. Ama tó adi wero, ma sì kũ Dikirio mani n bo. Ǹ i la ari gu dɔ.

¹⁴ À wutɛna a gbá sarɛ gwe ari gudɔo, akũ à fùtɛ ari gu gɔ̃ gɛ́ kɛ̃, zaakũ Bɔaza pìnɛ àsun tó gbɛ̃ke dɔ̃ kũ à sù pɔ́wɛgbɛ̃kiaro.

¹⁵ À pìnɛ dɔ: Ǹ n pɔ́dangãa poro ǹgɔ̃ kũna. Kũ à kũna, akũ Bɔaza nagã kànɛ zaka lɛ́ suddo à dìnɛ, akũ à tào bɛ.

¹⁶ Kũ à kà bɛ, à zã da a là à pì: Yã kɛ̀ deraa? Akũ à yã kũ gɔ̃gbɛ̃ pìi kɛ̀nɛɛ ònɛ pínki,

¹⁷ à pì: À ma gba nagã zaka lɛ́ suddo díkĩnamɛ. À pì à mana mà tá ma zã da kia ɔkoriro.

¹⁸ Akũ Naomi pì: Ǹ vutɛ tɛɛnɛ ari ǹ yã pì lakana dɔ̃, zaakũ gɔ̃gbɛ̃ pì ni kámma bo gbãra yã pì lakanaa sariro.

Volg ons:

Geborgde skakels

Advertensies