Aanlyn Bybel

RUTU 1 - Bisã Bible 2005

Naomi kũ Rutuo

¹ Gɔrɔ kũ yãgɔ̃gɔ̃rinɔ tɛn kí ble Isarailanɔ bùsun, nàa gɛ̃̀, akũ gɔ̃gbɛ̃ ke bò Bɛtilihamu, Yudanɔ bùsun, à gɛ̀ɛ à gɔrɔ pla kɛ̀ Mɔabunɔ bùsun kũ a nanɔo kũ a nɛ́gɔ̃gbɛ̃ gbɛ̃nɔn planɔ.

² Gɔ̃gbɛ̃ pì tɔ́n Ɛlimɛlɛki. A nanɔ tɔ́n Naomi. A nɛ́nɔ tɔ́n Malonu kũ Kiliɔ̃o. Ɛflata bùsu gbɛ̃nɔmɛ. Ò gɛ̀ɛ Mɔabunɔ bùsun, akũ ò kú gwe.

³ Gwen Naomi zã Ɛlimɛlɛki gàn, akũ à gɔ̃̀ gwe kũ a nɛ́ gbɛ̃nɔn pla pìnɔo.

⁴ Ò Mɔabu nɔgbɛ̃nɔ sɛ̀ nɔnɔ ũ, a do tɔ́n Opa, a do sɔ̃ Rutu. Ò kú gwe lán wɛ̃̀ kuri taka bà, a gbɛran

⁵ Malonu kũ Kiliɔ̃o gà ń pla ń pínki, akũ Naomi gɔ̃̀ gɔ̃ sari nɛ́nɔ sari.

⁶ Kũ à kú Mɔabunɔ bùsun gwe, à mà kũ Dikiri a gbɛ̃nɔ wɛ̃nda gwà à ń gbá pɔ́ble, akũ à soru kɛ̀ à ta kũ a nɛ́ nanɔ pìnɔo.

⁷ Akũ à fùtɛ gu kũ à kunwa à dà zɛ́n kũ a nɛ́ nanɔ pìnɔo, òtɛn tá Yudanɔ bùsun.

⁸ Akũ à pì a nɛ́ nanɔ pìnɔnɛ: À ɛra à tá á danɔ kĩnaa. Dikiri gbɛ̃kɛ kɛárɛ lákũ a kɛ̀ á gɔ̃ kũ ò gànɔnɛ nà kũ makũo.

⁹ Dikiri tó á baadi ɛra à zã kɛ à vutɛki le. Kũ à lɛ́ zàḿma, akũ ò ɔ́ɔ dɔ̀ manamana.

¹⁰ Ò pìnɛ: Óni gɛ́ kũnwo n gbɛ̃nɔ kĩnaamɛ.

¹¹ Akũ à pì a nɛ́ gyaanɔ pìnɔnɛ: À ɛra! Bɔ́yãi áni gɛ́ kũmaoo? Mani ɛra mà nɛ́gɔ̃gbɛ̃nɔ i de à le à zã kɛḿma dɔn yá?

¹² À ɛra à tá! Ma zĩ kũ̀, mani le mà zã kɛ doro. Bee tó ma pì mani wɛ́ dɔ zãkɛnaai, akũ ma lè ɔkɔsiala ma nɛ́gɔ̃gbɛ̃nɔ ì kãao,

¹³ áni fɔ̃ à ń dã ari ò kɛ zɔ̃kɔ̃ yá? Áni fɔ̃ àgɔ̃ kun pose ń yãi yá? Oi, ma nɛ́nɔ! Dikiri kpɛ lìmɛnɛmɛ. Yã kũ à á lé pì dí kɛmɛnɛ nnaro fá!

¹⁴ Ò ɛ̀ra ò nà ɔ́ɔ dɔa, akũ Opa lɛ́ zà a zã daa, ama Rutu gì à nàa.

¹⁵ Akũ Naomi pìnɛ: Ǹ gwa, n gbɛ̃ndo tɛn tá a gbɛ̃nɔ kũ a tãnanɔi. Ǹ ɛra ǹ tá kãao.

¹⁶ Akũ Rutu pìnɛ: Ǹsun nakarama mà n tó mà táro. Gu kũ n gɛ̀sɛɛ pɛ̀tɛn, ónigɔ̃ lɛɛlɛmɛ. Gu kũ n kipan, gwen mani kipan. N gbɛ̃nɔ ni gɔ̃ ma gbɛ̃nɔ ũ, n Luda ni gɔ̃ ma Luda ũ.

¹⁷ Gu kũ n gan, gwen mani gan ò ma vĩ gwe. Ga baasiro pɔ́ke ni ó kɛ̃kɔ̃aro. Tó ma kɛ̃mma, Dikiri yã kɛmɛnɛ pãsĩpãsĩ.

¹⁸ Kũ Naomi è à zɛ̀o kũ à tá kãáomɛ, adi yãke onɛ doro.

¹⁹ Akũ ń pla ń pínki ò gɛ̀ɛ arɛ ari ò kà Bɛtilihamu. Kũ ò kà gwe, wɛ̃tɛ wã̀ ń yã musu. Gbɛ̃nɔ pì: Naomin gwe sɔ̃ yá?

²⁰ Akũ à pìńnɛ: Àsungɔ̃ ma sísi Naomi doro, séde Mara, zaakũ Gbãnasĩndapinkide pɔsirayã kɛ̀mɛnɛ.

²¹ Ma gɛ wɛ̃tɛa kũ pɔ́nɔ, akũ Dikiri sù kũmao ɔkori. Bɔ́ yã mɛ́ à tò áni ma sísi Naomii? Dikiri bò ma kpɛmɛ, Gbãnasĩndapinkide pì yã'ũmmanaa kpàmai.

²² Lákũ Naomi sù kũ Mɔabunɔ bùsuuo nàn gwe kũ a nɛ́ nanɔ Rutu, Mɔabu burio. Ò kà Bɛtilihamu gɔrɔ kũ ò nà nagãkɛ̃naaamɛ.

« Vorige

Volg ons:

Geborgde skakels

Advertensies