ROMUDENƆ 1 - Bisã Bible 2005

Pɔlu fɔkpana Romudenɔa

¹ Makũ Pɔlu, Kirisi Yesu zɔ̀bleri, Luda ma sisi à ma dítɛ a zĩ̀ri ũ, baaru nna

² kũ à gĩnakɛ à a lɛ́ sɛ̀ a annabinɔnɛ ò kɛ̃̀ a yãn kpàri ũ.

^3-4 A Nɛ́ Yesu Kirisi ó Dikiri yãmɛ baaru nna pì ũ. A bisãsirikɛ gũn à bò Dauda buri gũmmɛ. A ludaninikɛ gũn a bona gan mɛ́ à mɔ̀wɛrɛ kũ gbãnao kũ Luda Nɛ́mɛ a ũ.

⁵ Kirisi ma gba zɛ́ màgɔ̃ de a zĩ̀ri ũ buri sĩnda pínkinɛ, de ò le ò a náani kɛ ò gɔ̃ a yãmarinɔ ũ, de à tɔ́ bo.

⁶ Á kú gbɛ̃ kũ Yesu Kirisi ń sísi à ń sɛ́nɔ tɛ́ se.

⁷ Ma takada díkĩna kɛ̃̀árɛ, ákɔ̃nɔ Romude kũ Luda yeái à á sísi a gɔ̃ a gbɛ̃nɔ ũ pínki. Luda ó De kũ Dikiri Yesu Kirisio gbɛ̃kɛ kɛárɛ, à á gba aafia.

⁸ Káaku gĩa ma Luda sáabu kɛ̀ Yesu Kirisi gãi á pínki yã musu, kũ á ludanaanikɛnaa dà anduniala pínki yãi.

⁹ Tó matɛn adua kɛ gɔrɔ sĩnda pínki, á yã dì sãmaguro. Ludamɛ ma sèedade ũ. Àpiin matɛn doi kũ nɛ̀sɛ mɛ̀n doo matɛni a Nɛ́ yã baaru kpá.

¹⁰ Madìgɔ̃ wɛ́ kɛa à zɛ́ kɛkɛmɛnɛ lákũ à yei nà de mà le mà su á gwa sà.

¹¹ Wɛ́sinaálɛ ni tɛni ma dɛ manamana, de mà le mà Luda Nini gba ke daágu á zĩnipɛtɛna yãi,

¹² de á ludanaanikɛna kũ ma pɔ́o le à ó baadi gba swɛ̃̀ɛ.

¹³ Ma gbɛ̃nɔ, má ye àgɔ̃ dɔ̃ kũ madìgɔ̃ gɔrɔ ditɛ gɛ̃̀n baaakɔ̃ mà su á gwa, de mà a zĩ gbɛ̀ e á tɛ́ lákũ ma è buri pãndenɔ tɛ́ nà, akũ ari tera mádi zɛ́ ero.

¹⁴ Girikiyãmarinɔ kũ Girikiyãmarisarinɔ ń pínki, dɔ̃̀rinɔ kũ dɔ̃̀risaridenɔ ń pínki, ń yã gɔ̃̀ ma yã ũ.

¹⁵ Abire yãi ma mɛ̀ɛ wã̀ mà baaru nna pì kpá ákɔ̃nɔ Romudenɔnɛ se.

¹⁶ Madì wé'i kũ kũ baaru nna pì yãoro, àkũmɛ gbãna kũ Luda dì gbɛ̃ kũ òtɛni a náani kɛnɔ sura bao ũ, atɛ̃nsa Yudanɔ, ń gbɛra buri pãndenɔ.

¹⁷ Baaru nna pìi dì owɛrɛ lákũ Luda dì tó yã bo kũńwo nna nà. À de ludanaanikɛna yã ũ adomɛ, lákũ ò kɛ̃̀ Luda yãn nà ò pì: Gbɛ̃ kũ Luda tò yã bò kãao nna a náani kũ àtɛn kɛ yãi nigɔ̃ kun.

Bisãsirinɔ bi taaridenɔmɛ Luda kĩnaa

¹⁸ Zaa musu Luda dì a pɔfɛ̃na kipa bisãsiri kũ ń vãnikɛna dì zɛ́ zɔ̃ yãpuranɛnɔa ń pãkpaina kũ ń vãnikɛnaao yãi.

¹⁹ Yã kũ oni fɔ̃ ò dɔ̃ Luda yã musu utɛnańnɛro, Luda mɛ́ à yã pìi bòńnɛ gupuraa.

²⁰ Zaa gɔrɔ kũ à andunia kàtɛ, a gbãna kũ àdi lákaro kũ a ludakɛna kũ òdi e kũ wɛ́oro bò gupuraa a zĩnɔ gũn swáswa. A yã mɛ́ à tò bisãsirinɔ kutɛkɛna vĩro.

²¹ Ò Luda dɔ̃, ama òdi bɛ̀ɛrɛ línɛ a zɛ́a ò a sáabu kpáro. Ń laasunnɔ kɛ̀ pã, akũ ò gɔ̃̀ gusiran ń mìsari yãi.

²² Ò ń zĩda dìtɛ ɔ̃ndɔ̃rinɔ ũ, akũ ò gɔ̃̀ yɔ̃nkɔnɔ ũ.

²³ Òdi kútɛ bisãsiri kũ òdi ganɔ kũ bãnɔ kũ nɔ̀bɔnɔ kũ pɔ́ kũ òdi táa o kũ kùaonɔ takanɛ Luda kũ àdi garo gɛ̃nɛ ũ.

²⁴ A yã má à tò Luda ń kpá gbãsĩkɛnaai, de ò wé'isariyã kɛ kũ kɔ̃o, lákũ òdi a ni dɛ ń nɛ̀sɛɛ gũn nà.

²⁵ Ò Luda yãpurade lilin kɛ̀ kũ ɛ́kɛo. Òdi donyĩ kɛ Luda pɔ́kɛnanɔnɛ ò dońyĩ Luda kũ à pɔ́ sĩnda pínki kɛ̀ gɛ̃nɛ ũ. Arubarikaden a ũ gɔrɔ sĩnda pínki! Aami.

²⁶ Abire yãi Luda ń kpá wé'isariyã nidɛnaaa. Bee ń nɔgbɛ̃nɔ yã kũ òdi kɛ lilin kɛ̀ kũ yã kũ òdi kɛroo.

²⁷ Lɛmɛ se gɔ̃gbɛ̃nɔ, ò yã kũ òdi kɛ kũ nɔgbɛ̃nɔo tò, òdi lukakɔ̃i. Gɔ̃gbɛ̃ kũ gɔ̃gbɛ̃o dì wé'isariyã kɛ kũ kɔ̃o, òdi a gbɛ̀ le ń zĩdaa ń sãtɛna lɛ́n.

²⁸ Lákũ odi we ò zɛ̀ kũ Luda dɔ̃naaoro nà, akũ à ń laasun kɛ̀ lɛ́kpɛrɛ, de ò yã kũ à de ò kɛronɔ kɛ.

²⁹ Yã vãni sĩnda pínki pɛ̀kɛrɛḿma: Nɛ̀sɛ pãsĩ, wãkũ, ĩnikɛna kɔ̃o, nɛ̀sɛgɔ̃ba vĩna kɔ̃o, gbɛ̃dɛnaa, fìtii, gbɛ̃blena kũ manafikikɛnaao. Kɔrɔmɔtɔdenɔmɛ ń ũ,

³⁰ gbɛ̃yakarinɔ, Luda ibɛrɛnɔ, gbɛ̃ takikɛrinɔ, yɔ̃̀gɔ̃denɔ, ĩadãrinɔ, vãni laasunlɛrinɔ, de kũ dao yãdarisarinɔ,

³¹ mìsaridenɔ, náanisaridenɔ, gbɛ̃yãkɛrisaridenɔ, wɛ̃ndasaridenɔ.

³² Ò dɔ̃ kũ Luda dìtɛ kũ yã bire taka kɛ̀rinɔ kà ò ń dɛdɛ, ama òdi zɛ kũ a kɛnanɔ adoro, òdi tɛ́ ká a kɛ̀rinɔgumɛ dɔ.