NƐƐMAYA 1 - Bisã Bible 2005

Nɛɛmaya Yurusalɛmu damukɛnaa

¹ Akalia nɛ́ Nɛɛmaya yãn dí. Atasɛsɛ kíblena wɛ̃̀ barode mɔ kũ òdi pi Kisilɛvi gũn má kú kínabɛa Susa wɛ́ran.

² Akũ ma dakũna Anani bò Yudanɔ bùsun à sù kũ gbɛ̃kenɔ. Ma yã làlaḿma Yuda gbɛ̃ kpara kũ ò bò zĩ̀zɔkɛnannɔ musu kũ Yurusalɛmuo.

³ Ò wèma ò pì, gbɛ̃ kũ ò bò zĩ̀zɔkɛn ò tà Yudanɔ bùsuu gũnnɔn tɛn wari kɛ manamana, òtɛni ń lalandi kɛ, zaakũ Yurusalɛmu bĩni gborona akũsɔ̃ a bĩnilɛ gbànɔ tɛ́kũna.

⁴ Kũ ma yã pìi mà, ma vutɛ, akũ wɛ́'i bòma. Ma ɔ́ɔ dɔ̀ gɔrɔ pla, matɛn lɛ́ yĩ matɛn wɛ́ kɛ Luda Musudea

⁵ ma pì: N yã nna Dikiri Luda Musude! Ń zɔ̃kɔ̃ akũsɔ̃ ń naasi vĩ. Gbɛ̃kɛ gũn n bàka dìgɔ̃ kú kũ gbɛ̃ kũ ò yenyĩ ò n yãditɛnanɔ kũnanɔo.

⁶ Ǹ wɛ́ tɛ́ makũ n zɔ̀bleriii ǹ sã kpá adua kũ matɛn kɛ fãnantɛ̃ kũ gwãanio n zɔ̀bleri Isarailanɔnɛɛa. Matɛn durunna kũ o kɛ̀nnɛ yã o. Bee makũ kũ ma de bedenɔ o durunna kɛ̀ se.

⁷ O yã vãni kɛ̀nnɛ manamana, ódi n yãditɛnanɔ daro, ódi n ɔdɔki gwaro, ó n doka kũ n dìtɛ n zɔ̀bleri Musanɛ yã kũnaro.

⁸ Ǹ tó yã kũ n dìtɛ n zɔ̀bleri Musanɛ díkĩna dɔngu. N pì tó o bo n kpɛ, ĩni ó fãkɔ̃a burinɔ tɛ́.

⁹ N pì dɔ tó o ɛra o arɛ dɔ̀mma akũsɔ̃ ó n yãditɛnanɔ kũna ótɛn zĩ kɛa, bee kũ n pɛ̀wá ari andunia lɛ́a, ĩni ó kakara ǹ su kũoo gu kũ n sɛ̀ n tɔ́ kúaa kũ̀n.

¹⁰ Gbɛ̃ pìnɔ bi n zɔ̀blerinɔmɛ, n gbɛ̃ kũ n ń bó kũ n iko zɔ̃kɔ̃ɔo kũ n gã̀sã gbãnaonɔmɛ.

¹¹ N yã nna Dikiri, ǹ sã kpá makũ n zɔ̀bleri aduakɛnaai kũ n zɔ̀bleri kũ n yã dì kɛńnɛ nna akũsɔ̃ ò n vĩna vĩnɔ aduakɛnaao. Ǹ tó makũ n zɔ̀bleri sa'a kũ gbãra de kína ma wɛ̃nda gwa. Gɔrɔ birea sɔ̃, kína pì wɛ̃kpaatɛriimɛ ma ũ.