MATIU 1 - Bisã Bible 2005

Yesu Kirisi buri bozirɛ

¹ Ibrahĩ kũ Daudao buri Yesu Kirisi bozirɛn dí:

² Ibrahĩ Isaaku ì, Isaaku Yakubu ì, Yakubu Yuda ì kũ a vĩ̀ninɔ kũ a dakũnanɔ,

³ Yuda Pɛrɛzi kũ Zɛrao ì kũ a nɔ Tamao, Pɛrɛzi Ɛzɛrɔnu ì, Ɛzɛrɔnu Ramu ì,

⁴ Ramu Aminadabu ì, Aminadabu Nasɔ̃ ì, Nasɔ̃ Salamɔ ì,

⁵ Salamɔ Bɔaza ì kũ a nɔ Rahabuo. Bɔaza Ɔbɛdi ì kũ a nɔ Rutuo, Ɔbɛdi Yɛsɛ ì,

⁶ akũ Yɛsɛ kína Dauda ì. Akũ Dauda Sulemanu ì kũ Uria nanɔo,

⁷ Sulemanu Reoboamu ì, Reoboamu Abia ì, Abia Asa ì,

⁸ Asa Yosafata ì, Yosafata Yehoramu ì, Yehoramu Uzia ì,

⁹ Uzia Yotamu ì, Yotamu Aza ì, Aza Ɛzɛkaya ì,

¹⁰ Ɛzɛkaya Manase ì, Manase Amɔ ì, Amɔ Yosia ì,

¹¹ Yosia Yoyakini ì kũ a dakũnanɔ gɔrɔ kũ ò gbɛ̃nɔ kũ̀kũ ò tà kũńwo Babilɔnu.

¹² Tana kũ gbɛ̃nɔ Babilɔnu gbɛran Yoyakini Sealatiɛli ì, Sealatiɛli Zɛrubabɛli ì,

¹³ Zɛrubabɛli Abiudu ì, Abiudu Ɛliakimu ì, Ɛliakimu Azɔ ì,

¹⁴ Azɔ Zadɔki ì, Zadɔki Akimu ì, Akimu Ɛliudu ì,

¹⁵ Ɛliudu Ɛlɛaza ì, Ɛlɛaza Matã ì, Matã Yakubu ì,

¹⁶ Yakubu Mariama zã Yusufu ì, akũ Mariama Yesu kũ òdi pinɛ Arumasihu ì.

¹⁷ Zaa Ibrahĩ gɔrɔa ari à gɛ̀ɛ pɛ́ Daudaa, de kũ a nɛ́o kun gɛ̃ro donsarimɛ. Zaa Dauda gɔrɔa ari gɔrɔ kũ ò tà kũ gbɛ̃nɔo Babilɔnu, de kũ a nɛ́o kun gɛ̃ro donsarimɛ. Zaa tana kũ gbɛ̃nɔo Babilɔnu ari à gɛ̀ɛ pɛ́ Arumasihua, de kũ a nɛ́o kun gɛ̃ro donsarimɛ.

Yesu Kirisi inaa

¹⁸ Deran ò Yesu Kirisi ì nàn dí: A da Mariama kun Yusufu nɔkpamma ũmɛ. Ari àgɔ̃ gɛ́ zã kɛ, à nɔ̀ sì kũ Luda Nini gbãnao.

¹⁹ A gɔ̃kpamma Yusufu bi gbɛ̃ manamɛ, à ye à wé'i daaro, akũ à zɛ̀o kũ áni bo a yãn asiri gũn.

²⁰ Gɔrɔ kũ àtɛn laasun lɛ́ yã pìia, Dikiri malaika bò à sùa nana gũn à pìnɛ: Dauda buri Yusufu, ǹsun bídi kɛ n nɔkpamma Mariama sɛna yã musuro, zaakũ nɔ̀ kũ à sinaa bò Luda Nini kĩnaamɛ.

²¹ Ani nɛ́ i gɔ̃gbɛ̃ ũ, ĩni tɔ́ kpánɛ Yesu, zaakũ ani a gbɛ̃nɔ bo ń durunnanɔ gũn.

²² Abirekũ kɛ̀ pínki, de yã kũ Dikiri dà annabii gãi kɛ, à pì:

²³ Nɔkpare lési mɛ́ ani nɔ̀ sí à nɛ́ i gɔ̃gbɛ̃ ũ, oni tɔ́ kpánɛ Imanuɛli. Tɔ́ pìi pì, Luda kú kũoo.

²⁴ Kũ Yusufu vù, à kɛ̀ lákũ Dikiri malaika dìtɛnɛ nà, à a nɔ pìi sɛ̀.

²⁵ Ama adi a dɔ̃ nɔgbɛ̃ ũro ari à gɛ̀ɛ à nɛ́gɔ̃gbɛ̃ pìi ì. Akũ à tɔ́ kpànɛ Yesu.