MALAKI 1 - Bisã Bible 2005

Sa'ona yã

¹ Yã kũ Dikiri ò Isarailanɔnɛ Malaki gãin dí.

² Makũ Dikiri ma pì má yeái, akũ a pì ma yeái deramɛɛ? Makũ Dikiri ma pì Isau bi Yakubu vĩ̀ninloo? Bee kũ abireo Yakubun má yei

³ ma gi Isaui, akũ ma a gusĩsĩde lì gugbagaraga ũ, ma a bùsuu kɛ̀ gbáranna gbɛ̃gbonnɔ kúki ũ.

⁴ Ɛdɔmu gbɛ̃ pìnɔ pì ò ń wɛ̃tɛnɔ dúgu zɔ̃̀, oni ɛra ò ń bɛzĩnɔ futɛ. Akũ makũ Dikiri Zĩ̀karide ma pì: Tó ò kɛ̀kɛ ò kàtɛ, mani gboro, oni pińnɛ Bùsu Vãnidenɔ, gbɛ̃ kũ Dikiri pɛ̃tɛ̃ kɛ̀ kũńwo ari gɔrɔ sĩnda pínkinɔ!

⁵ Á wɛ́ ni yã pì e à pi Dikiri zɔ̃kɔ̃ ari Isarailanɔ bùsu lɛ́ dire kpa.

⁶ Nɛ́ dì a de kpe ta akũsɔ̃ zɔ̀blerii dì a dikiri kpe ta. Kũ má de á De ũ, átɛni ma kpe ta yá? Kũ má de á Dikiri ũ, á ma vĩna vĩ yá? Makũ Dikiri Zĩ̀karide makũ mɛ́ matɛni á la. Ákɔ̃nɔ sa'orinɔ ákɔ̃nɔ mɛ́ átɛni ma gya bo. Adì pi: Deran o n gya bòo?

⁷ Kũ a ma teburu gya bò yãimɛ. Adì su ma gbagbakia kũ pɔ́ble gbãsĩo. Adì pi: Deran o n gbagbaki gbã̀a lɛ̀ɛ?

⁸ Kũ a su sa oma kũ pɔ́ vĩ̀nanɔ, yã vãnin gweroo? Kũ a sa òma kũ pɔ́ ɛrɛnɔ kũ a gyãrenɔ, yã vãnin gweroo? À gɛ́ kpá bùsu gbɛ̃ zɔ̃kɔ̃ɔa à gwa! Á yã ni káagu yá? Ani á sáabu kpá yá? Makũ Dikiri Zĩ̀karide makũ mɛ́ matɛni á la.

⁹ À kútɛ kɛmɛnɛ mà á wɛ̃nda gwa. Ama tó pɔ́ dí takanɔn kú á ɔĩ, mani sí yá? Makũ Dikiri Zĩ̀karide makũ mɛ́ matɛni á la.

¹⁰ Ò pi á gbɛ̃ke gɛ̀ɛ à ma ɔn zɛ́ tàta yã, de òsun gɛ̃ ò tɛ́ ká ma gbagbakia pãro. Abirekũ sã̀na. Makũ Dikiri Zĩ̀karide makũ mɛ́ ma ò. Á yã tɛn kɛmɛnɛ nnaro, mani á gba síro.

¹¹ Zaa ifãboki kpa ari a lɛ́tɛ kpa ma tɔ́ nigɔ̃ zɔ̃kɔ̃ burinɔ tɛ́. Oni turaretiti kpátamɛnɛ oni sumɛnɛ kũ gba gbãsĩsarinɔ gu sĩnda pínkia, zaakũ ma tɔ́ nigɔ̃ zɔ̃kɔ̃ burinɔ tɛ́. Makũ Dikiri Zĩ̀karide makũ mɛ́ ma ò.

¹² Ama ákɔ̃nɔ adì dɔkɛ kũ ma tɔ́o adì pi ma teburuu gbãsĩ vĩ, akũ adì sa oa kũ pɔ́kãde ginanɔ.

¹³ Makũ Dikiri Zĩ̀karide ma pì: Adì pi á kpasa kũ yã pìio, akũ adì lɛ́zuki kɛa. Tó a su ma gbagba kũ pɔ́ kɔ̃̀nɔkunanɔ kũ pɔ́ ɛrɛnɔ kũ pɔ́ gyãrenɔ, mani abirenɔ sí yá? Makũ Dikiri makũ mɛ́ matɛni á la.

¹⁴ Manafikide kũ à pɔ́ sà vĩ a kpàsan kũ à lɛ́ sɛ̀mɛnɛ, akũ à gɛ̀ɛ à ma gbagba kũ pɔ́ mamberudeo a gɛ̃nɛ ũ, ma láari bò adea. Zaakũ makũmɛ Kína zɔ̃kɔ̃ ũ, ma tɔ́ dì burinɔ naasi kũ. Makũ Dikiri Zĩ̀karide makũ mɛ́ ma ò.