Aanlyn Bybel

MAAKU 1 - Bisã Bible 2005

Yahaya Da'itɛkɛri waazikɛnaa
( Mat 3:1-17 ; Luk 3:1-22 ; Yuh 1:19-28 )

¹ Luda Nɛ́ Yesu Kirisi baarun dí.

² À nàa lákũ à kú annabi Isaya takada gũn nà à pì: Mani ma zĩ̀ri gbarɛ n ã à zɛ́ kɛkɛnnɛ.

³ À baarukparii kòto ma dɔ gbárannan àtɛn pì: À zɛ́ kɛkɛ Dikirinɛ, à zɛ́ kotinanɔ poronɛ súsu.

⁴ Lɛn Yahaya Da'itɛkɛri sù gbárannan lɛ, àtɛn waazi kɛ gbɛ̃nɔnɛ à pì ò nɛ̀sɛ litɛ ò da'itɛ kɛ, Luda ni ń durunnanɔ kɛ̃ḿma.

⁵ Yudea bùsudenɔ kũ Yurusalɛmudenɔ gɛ̀ɛ a kĩnaa ń pínki. Òdi ń durunnanɔ o gupuraa, akũ àdi ń da'itɛ kɛ Yodai.

⁶ Yahaya dìgɔ̃ pɔ́kasa kũ ò tã̀ kũ lakumi kãonɔ dana, àdi bára asa dɔ a pi. Kwa kũ zɔ́'ioomɛ a pɔ́ble ũ.

⁷ À waazi kɛ̀ à pì: Gbɛ̃ke ni su ma gbɛra a gbãna demala. Mádi ká mà kútɛ mà a kyate bobonɛro,

⁸ madì á da'itɛ kɛ kũ íomɛ, àkũ mɛ́ ani á da'itɛ kɛ kũ Luda Ninio.

Yesu da'itɛkɛna
( Mat 3:13-4:11 ; Luk 3:21-22 )

⁹ Gɔrɔ birea Yesu bò Nazɛra, Galili bùsun, à sù, akũ Yahaya a da'itɛ kɛ̀ Yodai.

¹⁰ Kũ Yesu bikũ̀ gɔ̃̀nɔ, à è ludambɛ tɛn wɛ̃kɔ̃a, Luda Nini tɛn suawa lán potɛ̃nɛ bà.

¹¹ Akũ à kòtoo mà bona ludambɛ à pì: Mɔkɔ̃mɛ ma nɛ́ mɛ̀n do légelege yenyĩde ũ, kũ ma pɔ nnamma manamana.

Yesu yɔ̃ogwanaa
( Mat 4:1-11 ; Luk 4:1-13 )

¹² Akũ Luda Nini a gbàrɛ gbárannan gɔ̃̀nɔ,

¹³ akũ à kú gwe kũ nɔ̀bɔsɛ̃ntɛnɔ ari gɔrɔ bupla, Setan tɛni a yɔ̃ à gwa. Akũ malaikanɔ sù ò kpài.

Yesu ìba káakunɔ sisinaa
( Mat 4:18-22 ; Luk 5:1-11 )

¹⁴ Yahaya kũnaa gbɛran Yesu tà Galili, àtɛn baaru nna kũ à bò Luda kĩnaa kpá

¹⁵ à pì: A gɔrɔ kà, kpata kũ à bò Luda kĩnaa kà kãni. À nɛ̀sɛ litɛ à baaru nna pì sí.

¹⁶ Kũ Yesu tɛn do Galili sɛ̀bɛɛi, à Simɔ kũ a dakũna Anduruoo è, òtɛn birigi kpá sɛ̀bɛɛ pìn, zaakũ sɔrɔkɔnɔmɛ.

¹⁷ Akũ Yesu pìńnɛ: À mɔ́ à tɛ́mai, mani á kɛ gbɛ̃wɛtɛrinɔ ũ.

¹⁸ Zaa gwe gɔ̃̀nɔ ò ń biriginɔ tòn ò bò ò tɛ̀i.

¹⁹ Kũ à gɛ̀ɛ arɛ fíti, à Zebedi nɛ́ Yamisi è kũ a dakũna Yuhanao. Ò kú gó'itɛ gũn, òtɛni ń biriginɔ kɛkɛ.

²⁰ À ń sísi gɔ̃̀nɔ, akũ ò ń de Zebedi kũ zamalingakɛrinɔ tò gó gũn gwe ò bò ò tɛ̀i.

Yesu tãnade werekɔ̃ana Kapɛnamu
( Luk 4:31-37 )

²¹ Ò gɛ̀ɛ Kapɛnamu. Kũ kámmabogɔrɔ kà, Yesu gɛ̀ɛ aduakɛkpɛn, àtɛn yã dańnɛ.

²² A yãdannɛnaa bò ń sarɛ, zaakũ àdi dańnɛ kũ ikooomɛ, adi kɛ lán ludayãdannɛrinɔ pɔ́ bànlo.

²³ Gɔrɔ birea gɔ̃gbɛ̃ tãnade ke kú aduakɛkpɛn gwe. À wiki lɛ̀ à pì:

²⁴ Bɔ́n ó vĩ kɔ̃ ɔ̃ii, Yesu Nazɛra? N su ǹ ó kakatɛn yá? Má dɔ̃ gbɛ̃ kũ ń de a ũ, mɔkɔ̃mmɛ Luda gbɛ̃ kũ à kú adona ũ.

²⁵ Akũ Yesu gì tãna pìinɛ à pì: Ǹ yĩtɛ! Ǹ go gbɛ̃ pìia.

²⁶ Akũ tãna pì a yĩ̀gãyĩgã à wiki gbãna lɛ̀, akũ à gòa.

²⁷ Bídi gbɛ̃nɔ kũ̀ ń pínki, òtɛn kɔ̃ lala: Bɔ́ taka buri yãn díi? Yãdannɛna dufun yá? Àdi yã dańnɛ kũ ikooo fá! Bee kũ tãnanɔ, tó à yã dìtɛńnɛ, òdi a yã mamɛ.

²⁸ Akũ kãnto a tɔ́ dà Galili bùsula pínki.

Yesu gyãrenɔ werekɔ̃ana dasi
( Mat 8:14-17 ; Luk 4:38-41 )

²⁹ Kũ Yesu bò aduakɛkpɛn, akũ à tà Simɔ kũ Anduruo bɛa gɔ̃̀nɔ kũ Yamisio kũ Yuhanao.

³⁰ Simɔ nanɔ da wútɛna, mɛ̀wãna a kũ̀, akũ ò a yã ò Yesunɛ gɔ̃̀nɔ.

³¹ À gɛ̀ɛ a kĩnaa à a kũ̀ a ɔa à a fùtɛ. Akũ a sikonnaa pìi wèrea ari à pɔ́ble kɛ̀ńnɛ.

³² Kũ ɔkɔsi kɛ̀, ifãntɛ̃ tɛn gɛ̃ kpɛ́n, ò sùnɛ kũ gyãrenɔ kũ tãnadenɔ ń pínki.

³³ Wɛ̃tɛdenɔ kàkara a kpɛ́ kpɛ́lɛlɛa ń pínki.

³⁴ À gbɛ̃nɔ kɛ̃̀kɔ̃a dasi kũ gyã buri sĩnda pínkio, à tãnanɔ gò gbɛ̃nɔa dasidasi. Àdi tãnanɔ gba zɛ́ ò yã oro, zaakũ ò dɔ̃ gbɛ̃ kũ à de a ũ.

Yesu waazikɛna zaa Galili
( Luk 4:42-44 )

³⁵ Kɔnkɔkɔnkɔ Yesu fùtɛ à bò à gɛ̀ɛ sɛ̃̀n gusarɛ, àtɛn adua kɛ gwe.

³⁶ Akũ Simɔ kũ a gbɛ̃nɔ pɛ̀tɛi.

³⁷ Kũ ò bòa, ò pìnɛ: Gbɛ̃ sĩnda pínki tɛni n gbɛka.

³⁸ Akũ à pìńnɛ: Ò gɛ́ gu pãndea lakutu kũ à kú ó sarɛnɔ gũn, mani waazi kɛ gwe dɔ, zaakũ abire yãin ma su.

³⁹ Lɛmɛ àdigɔ̃ kure Galili bùsu gu sĩnda pínkia lɛ, àdigɔ̃ waazi kɛ ń aduakɛkpɛnɔ gũn àdigɔ̃ tãnanɔ gogoḿma.

Kusude werekɔ̃anaa
( Mat 8:1-4 ; Luk 5:12-16 )

⁴⁰ Akũ kusude ke sù a kĩnaa à kùtɛ à wɛ́ kɛ̀a à pì: Tó ń yei, ĩni fɔ̃ ǹ ma werekɔ̃a swáswa.

⁴¹ À kɛ̀ Yesunɛ wɛ̃nda, akũ à ɔ bò à kɛ̀a à pì: Má yei, ǹ gɔ̃ swáswa.

⁴² Zaa gwe gɔ̃̀nɔ a kusu làka à gɔ̃̀ swáswa.

⁴³ Akũ Yesu a gbàrɛ gɔ̃̀nɔ à gìnɛ à pì:

⁴⁴ Ǹsun o gbɛ̃ke maro. Ǹ gɛ́ ǹ n zĩda mɔ sa'oriinɛ, ǹ sa'opɔ kũ Musa dìtɛ kpá n werekɔ̃ana sèeda ũ gbɛ̃nɔnɛ.

⁴⁵ Kũ à bò, à gɛ̀ɛ àtɛn yã pì o'ońnɛ. Yã pìi dàgula, akũ Yesu dì fɔ̃ à gɛ̃ wɛ̃tɛn gupuraa doro. Àdigɔ̃ kú sɛ̃̀n gusarɛmɛ, akũ òdigɔ̃ bo gu sĩnda pínkia ògɔ̃ su a kĩnaa.

« Vorige

Volg ons:

Geborgde skakels

Advertensies