LAASUNDE 1 - Bisã Bible 2005

A pínki pãmɛ

¹ Laasunde Dauda nɛ́, Yurusalɛmu kína yãn dí.

² Makũ laasunde ma pì: Yã pã búgubugu, yã pã búgubugu, a pínki pãmɛ.

³ Bɔ́ àreen bisãsiri dì le andunia gũn wari kũ àtɛn kɛ a zĩ sĩnda pínki gũnwaa?

⁴ Kpàinɔ dì gɛ̃tɛ, wurenɔ dì su, ama andunia dìgɔ̃ kun gɔrɔ sĩnda pínkimɛ.

⁵ Ifãntɛ̃ dì bo àdi gɛ̃, àdi wã à ɛra à gɛ́ gu kũ àdi bon.

⁶ Ĩa dì káka gɛ̀nɔmidɔki kpa, àdi ɛra à su gugbãnduru kpa, àdigɔ̃ likara àgɔ̃ gɛ́ àgɔ̃ su.

⁷ Swa sĩnda pínki í dìgɔ̃ ká ísira gũmmɛ, ama ísira dì paro, í pìnɔ dì ɛra ò su swa pìnɔ mìiamɛ.

⁸ Pɔ́ sĩnda pínki dì ń kpasa, kpasa pì yã gɛ̃̀ onala. Gugwana dì mɔ́ wɛ́aro, yãmana dì sã paro.

⁹ Yã kũ à kun yã mɛ́ ani ɛra àgɔ̃ kun dɔ, yã kũ ò kɛ̀ yãn oni ɛra ò kɛ dɔ. A dufu ke kú andunia gũnlo.

¹⁰ Pɔ́ke kun kũ oni pi: Ǹ pɔ́ dufu ke gwa yá? Oi! À gĩnakɛ à kun ó ã zaa zĩ kɔ̀.

¹¹ Gbɛ̃ káakunɔ yã dìgɔ̃ dɔ gbɛ̃ken doro. Bee gbɛ̃ kũ onigɔ̃ kun zianɔ, ń yã ni dɔ gbɛ̃ken ziakpɛzĩro.

¹² Makũ laasunde ma kí blè Isarailanɔa Yurusalɛmu.

¹³ Ma mɛ̀ɛ kpà yã kũ òtɛn kɛ andunia gũn pínki tàasikanaaa, ma gwàgwa ɔ̃ndɔ̃'ɔ̃ndɔ̃ ma è Luda zĩ pãsĩ dà bisãsirinɔnɛ ò kɛ.

¹⁴ Ma yã kũ òtɛn kɛ andunia gũn è pínki, a pínki bi pãmɛ, pɛna gukoriamɛ.

¹⁵ Pɔ́ fĩkarana porona vĩro, òdi le ò pɔ́ kũ à kunlo naroro.

¹⁶ Akũ ma ò ma swɛ̃̀ɛ gũn ma pì: Ǹ gwa! Ma ɔ̃ndɔ̃ zɔ̃kɔ̃ de gbɛ̃ kũ ò kpata blè Yurusalɛmu ma ãnɔla ń pínki, ma ɔ̃ndɔ̃ kũ ma dɔ̃naao wɛ́ bò manamana.

¹⁷ Akũ ma mɛ̀ɛ kpà ɔ̃ndɔ̃ asiri dɔ̃naaa de mà yɔ̃nkɔkɛ kũ mìsariyão asiri dɔ̃, akũ ma è abirekũ bi pɛna gukoriamɛ dɔ.

¹⁸ Ɔ̃ndɔ̃ zɔ̃kɔ̃ɔ dì su kũ nɛ̀sɛyakana zɔ̃kɔ̃ɔomɛ, òdi yã'ũmmana le ń dɔ̃na lɛ́mmɛ.