KƆLƆSEDENƆ 1 - Bisã Bible 2005

Sáabukpana kũ aduakɛnaao

¹ Makũ Pɔlu, Kirisi Yesu zĩ̀rii Luda pɔyenyĩnaa gũn kũ ó gbɛ̃ Timɔtio, ókɔ̃nɔ mɛ́ o takada dí kɛ̃̀

² ó gbɛ̃ náanide kũ ò kú adona Kirisi gũn zaa Kɔlɔsenɔnɛ. Luda ó De gbɛ̃kɛ kɛárɛ, à á gba aafiaa.

³ Gɔrɔ sĩnda pínki tó ótɛn adua kɛárɛ, odìgɔ̃ Luda ó Dikiri Yesu Kirisi De sáabu kpámɛ,

⁴ zaakũ o á Kirisi Yesu náanikɛna baaruu mà kũ yenyĩ kũ á vĩ ó gbɛ̃nɔnɛɛo ń pínki,

⁵ kũ á wɛ́ dɔ pɔ́ kũ à ditɛnaárɛ ludambɛi yãi. A yãpura yã mà zaa káaku baaru nna kũ o kpàárɛ gũn.

⁶ Baaru nna pì tɛn nɛ́ i àtɛn dagula andunia gũn pínki, lákũ à kɛ̀ á tɛ́ nà zaa gɔrɔ kũ a mà, akũ a Luda gbɛ̃kɛ súsu dɔ̃̀.

⁷ Ó gbɛ̃ yenyĩde ó zĩkɛri dake Ɛpafara mɛ́ à yã pìi dàárɛ ó gɛ̃nɛ ũ. Kirisi zĩkɛri náanidemɛ,

⁸ àkũ mɛ́ à yenyĩ kũ Luda Nini á káa òwɛrɛ.

⁹ Abire yãi zaa gɔrɔ kũ o á baaruu mà, odìgɔ̃ wɛ́ kɛárɛ Ludaa lakanaa sari, de à tó à a pɔyenyĩna dɔ̃ swáswa, a Nini á gba ɔ̃ndɔ̃ kũ wɛ́zɛ̃o pínki,

¹⁰ de àgɔ̃ kun lákũ Dikiri yei nà, á yã sĩnda pínki káagu, de á yã mana sĩnda pínki kɛna gɔ̃ dagula, á Luda dɔ̃na gɔ̃ kara,

¹¹ de àgɔ̃ gbãna yã sĩnda pínki gũn a gbãna gakuride lɛ́n, de à pɔ́ sĩnda pínki fɔ̃ kũ mɛnao kũ pɔnnao,

¹² de àgɔ̃ De Luda sáabu kpá, zaakũ à ó ká baka kũ à dìtɛ a gbɛ̃nɔnɛ gupuranwa.

¹³ À ó bó gusira ikon, à ó ká a Nɛ́ mɛ̀n do yenyĩde kpatan.

¹⁴ A gãin o gɔ̃ zĩdadenɔ ũ, ó durunna kɛ̃̀wá.

Kirisi de pɔ́ sĩnda pínkila

¹⁵ Kirisi bi Luda kũ òdi e kũ wɛ́oro takamɛ, Àkũmɛ daudu ũ Luda pɔ́kɛnanɔ tɛ́ pínki.

¹⁶ Luda pɔ́ kũ à kú musu kũ zĩtɛoo kɛ̀ pínki a gãi, pɔ́ kũ òdi enɔ kũ pɔ́ kũ òdi eronɔ, kpatablerinɔn yá ke dikirinɔ ke gbãnadenɔ ke ikodenɔ. Pɔ́ sĩnda pínki bò a kĩnaamɛ, akũsɔ̃ ò kun a pɔ́ ũ.

¹⁷ À kun pɔ́ sĩnda pínki ã, pɔ́ sĩnda pínki kun a gãimɛ.

¹⁸ Àkũmɛ sɔsi gbɛ̃ kũ ò de a mɛ̀ ũnɔ mì ũ. Àkũmɛ naana ũ, gàavu káaku ũ, de à gɔ̃ pɔ́ sĩnda pínki mìde ũ.

¹⁹ Zaakũ à kà Ludagu a kíkɛ pínki pɛkɛrɛa.

²⁰ À tò pɔ́ sĩnda pínki kɛ̀ kãao nna a gãi, pɔ́ kũ ò kú zĩtɛ ke musunɔn yá. A aru kũ à kɔ̀tɛ lía mɛ́ à sù kũ kɛna nna pìio.

²¹ A kɛ̃ Ludaa yã. A ibɛrɛnɔn á ũ á laasun kũ á vãnikɛnanɔ yãi,

²² akũ Luda tò a kɛ kãao nna Kirisi gana a bisãsirikɛmɛɛ gũn yãi sà, de à á kpan'arɛ kɛ gbãsĩ sari, mamberu sari, taari sari,

²³ tó á zɛna gbãna á ludanaanikɛnaa gũn yĩgãnaa sari gíngin, tó ádi kɛ̃kɔ̃a kũ tãmaa kũ á vĩ baaru nna kũ a màa gũnworo. Ò baaru nna pìi kpà gbɛ̃ kũ Luda kɛ̀ zĩtɛ lanɔnɛ pínki kũ makũ Pɔlu, ma gɔ̃ a kpàri ũ.

Pɔlu zĩkɛna sɔsi gbɛ̃nɔnɛ

²⁴ Tera sà matɛn pɔnna kɛ kũ wari kũ matɛn kɛ á yãiio. Wari kũ Kirisi kɛ̀ sɔsi gbɛ̃ kũ ò de a mɛ̀ ũnɔ yãin matɛn pɔ́ kũ à gɔ̃̀ papa ma mɛ̀ɛ gũn.

²⁵ Luda zĩ dàmɛnɛ, akũ ma gɔ̃ sɔsi gbɛ̃ pìnɔ kpanyĩri ũ. À ma zĩ mà a yã oárɛ papana.

²⁶ Asiriyã kũ à utɛna gbɛ̃nɔnɛ zaa káaku zaade Luda dí andunia kátɛro mɛ́ à bò Luda gbɛ̃nɔnɛ gupuraa sà,

²⁷ Luda ye ò dɔ̃ lákũ asiriyã pì gakuri zɔ̃kɔ̃ nà buri pãndenɔ kĩnaa. Asiri pìn dí: Kirisi kú á gũn, akũ á wɛ́ dɔ gakuria.

²⁸ A waazin odì kɛ gbɛ̃ sĩnda pínkinɛ, odì lɛ́ daoḿma, odì yã dao gbɛ̃ sĩnda pínkinɛ kũ ɔ̃ndɔ̃ sĩnda pínkio, de ò gɛ́ kũ baadio papana Luda arɛ Kirisi gũn.

²⁹ Abire yãi matɛn zĩ kɛ, matɛn kokari kɛ kũ a gbãna kũ àtɛn zĩ kɛ ma gũnwo gbãnagbãna.