Aanlyn Bybel

ƐZƐRA 1 - Bisã Bible 2005

Sirusu Isarailanɔ gbarɛnaa

¹ Pɛsianɔ kína Sirusu kíblena wɛ̃̀ káaku gũn Dikiri tɛ́ kàagu de yã kũ à dà Ilimianɛ à ò kɛ yãi. Akũ Sirusu kpàkpaa kɛ̀ a bùsun pínki, gbasa à kɛ̃̀ takadan à pì:

² Yã kũ makũ Sirusu, Pɛsianɔ kína ma òon dí. Dikiri Luda Musude tò andunia kpata sĩnda pínki gɔ̃̀ ma pɔ́ ũ, akũ à ma ditɛ mà kpɛ́ boarɛ Yurusalɛmu, Yudanɔ bùsun.

³ Gbɛ̃ kũ à de a gbɛ̃ ũ á tɛ́, Luda gɔ̃ kú kãao à tá Yurusalɛmu, Yudanɔ bùsun, à kpɛ́ bo Dikiri Isarailanɔ Luda kũ à de Dikiri ũ Yurusalɛmunɛ gwe.

⁴ Ń gbɛ̃ kũ ò gɔ̃̀ɔ pìnɔ gbɛ̃dakenɔ kpáńyĩ kũ andurufuuo kũ wuraao kũ aruzɛkɛnɔ kũ pɔ́kãdenɔ kũ Luda kpɛ́ kũ òtɛn gɛ́ bo Yurusalɛmu gbanɔ.

⁵ Akũ Yudanɔ kũ Biliaminunɔ ɔmbedenɔ kũ sa'orinɔ kũ Levinɔ kũ gbɛ̃ kũ Luda tɛ́ kàńgunɔ fùtɛ, òtɛn gɛ́ Dikiri kpɛ́ bo Yurusalɛmu.

⁶ Ń gbɛ̃dakenɔ ɔ dàḿma ò ń gbá andurufu pɔ́nɔ kũ wura pɔ́nɔ kũ aruzɛkɛnɔ kũ pɔ́kãdenɔ kũ pɔ́ ɔgɔdenɔ kũ Dikiri kpɛ́ gbanɔ pínki.

⁷ Akũ Pɛsianɔ kína Sirusu bò kũ Dikiri kpɛ́ pɔ́ kũ Nɛbukanɛza sɛ̀tɛ yã zaa Yurusalɛmu à kàtɛ a tãna kpɛ́ gũnnɔo.

⁸ À pì a ɔgɔ'utɛri Mitirɛdanɛ à pɔ́ pìnɔ naro à kpá Yudanɔ kína Sesebazaa, akũ à kɛ̀ lɛ.

⁹ Pɔ́ pìnɔ dasi lɛ́n dí: Wura ta baraakuri, andurufu ta wàa sɔɔro, tire baraakuri donsari,

¹⁰ wura toko baraakuri, andurufu toko wàa pla kũ kuriio, ta buri pãndenɔ wàa sɔɔro.

¹¹ Wura kũ andurufu tanɔ fùtɛ pínki mɛ̀n dúbu sɔɔro kpɛ́ wàa pla. Kũ zĩ̀zɔɔ pìnɔ bɔ̀tɛ Babilɔnu ò sù Yurusalɛmu, akũ Sesebaza sù kũ pɔ́ pìnɔ pínki.

« Vorige

Volg ons:

Geborgde skakels

Advertensies