Aanlyn Bybel

ƐSITA 6 - Bisã Bible 2005

Bɛ̀ɛrɛkarana Mɔdekainɛ

¹ Gwãani birea kína dí fɔ̃ à i òro. Akũ à pì ò mɔ́ kũ a bùsu gĩayãkɛna takadao. Ò a kyó kɛ̀nɛ,

² akũ ò Mɔdekai yã è gwe, lákũ kína dogari zɛ́dãkpãri gbɛ̃nɔn planɔ Bigitana kũ Tɛrɛsio lɛ́ kpàkũsũi nà, akũ Mɔdekai bòo.

³ Kína a ìbanɔ là à pì: Ò Mɔdekai bɛ̀ɛrɛɛ kàra ò a gbà gbãna yã pì yãi deramɛɛ? Ò wèa ò pì: Odi yãke kɛnɛro.

⁴ Akũ kína pì: Dí mɛ́ à kú ɔnn gwee? Gɔrɔ kũ̀a Amana gɛ̃̀ kínabɛ ɔnn gɔ̃̀nɔ de à Mɔdekai lokona lí kũ à pɛ̀tɛ pìia yã onɛ.

⁵ Akũ kína ìbanɔ wèa ò pì: Amana mɛ́ à kú ɔnn gwe. Akũ kína pì à gɛ̃.

⁶ Kũ à gɛ̃̀, kína a là à pì: Bɔ́n oni kɛ gɔ̃gbɛ̃ kũ má ye mà a karanɛɛ? Amana laasunn lɛ̀ à pì: Dín kína ye à bɛ̀ɛrɛ karanɛ de makũlaa?

⁷ Akũ à wèa à pì: Tó ń ye ǹ gbɛ̃ bɛ̀ɛrɛ kara,

⁸ oni kína arukĩmba kũ n dà yã sɛ́ ò mɔ́o kũ n sɔ̃ kũ ò kífuraa kùaao.

⁹ Ǹ arukĩmbaa pì kũ sɔ̃ pìio kpá n gbãnade bɛ̀ɛrɛdenɔ dokea, à arukĩmbaa pì da gbɛ̃ kũ ń ye ǹ a bɛ̀ɛrɛ karanɛ à a di sɔ̃a àgɔ̃ tɛ́ a arɛ wɛ̃tɛ zɛ́danɔ gũn àgɔ̃ pũtã àgɔ̃ pi: Lɛn kína dì kɛ lɛ gbɛ̃ kũ à ye à a bɛ̀ɛrɛ karanɛɛnɛ.

¹⁰ Akũ kína pìnɛ: Ǹ gɛ́ ǹ arukĩmbaa pì sɛ́ gɔ̃̀nɔ kũ sɔ̃o lákũ n ò nà, ǹ yã pì kɛ Yuda buri Mɔdekai kũ àdigɔ̃ vutɛna ma bɛ gãnu gũnnɛ. Ǹsun yã kũ n pì ò kɛnɛɛ pì ke tóro.

¹¹ Amana gɛ̀ɛ à arukĩmbaa pìi sɛ̀ kũ sɔ̃ pìio à sùo. Akũ à arukĩmbaa pìi dà Mɔdekainɛ à a dì sɔ̃a, à tɛ́ a arɛ wɛ̃tɛ zɛ́danɔ gũn, àtɛn pũtã à pì: Lɛn kína dì kɛ lɛ gbɛ̃ kũ à ye à a bɛ̀ɛrɛ karanɛɛnɛ.

¹² Kũ ò sù, Mɔdekai gɛ̀ɛ à vùtɛ kínabɛ gãnu gũn, akũ Amana ɔ kù a wɛ́a à tà bɛ kũ ɔ́ɔdɔo.

¹³ À yã kũ à a le bàba a nanɔ Zɛrɛsinɛ kũ a gbɛ̃nnanɔ ń pínki. Akũ a lɛ́dammarii pìnɔ kũ Zɛrɛsio pìnɛ: Zaakũ Mɔdekai kũ n gɔ̃ kpɛ a yãi pì bi Yuda burimɛ, ĩni a fɔ̃ doro, ĩnigɔ̃ kĩai ǹgɔ̃ gɛ́mɛ.

¹⁴ Gɔrɔ kũ òtɛn yã pì onɛ, kína dogari kũ ò ń fɛ̀rɛɛ kɛ̀nɔ kà, akũ ò a sɛ̀ likalika ò gɛ̀ɛ kãao pɔ́ble kũ Ɛsita kɛ̀ɛa.

« Vorige

Volg ons:

Geborgde skakels

Advertensies