Aanlyn Bybel

ƐSITA 5 - Bisã Bible 2005

Ɛsita wɛ́kɛna kínaa

¹ A gɔrɔ aakɔ̃de zĩ Ɛsita a kína nanɔ bizanɔ yĩ̀, akũ à gɛ̀ɛ à zɛ̀ kínabɛ ɔnn kpɛ́ kũ à kun kpɛ́lɛlɛa. Kína vutɛna kíblegbaaa kpɛ́ gũn gwe, a arɛ dɔna kpɛ́lɛlɛa.

² Kũ à a nanɔ Ɛsita è zɛna kpɛ́lɛlɛa, a pɔ kɛ̀a nna, akũ à a wura gò kũ a kũna dɔ̀a. Ɛsita nài à ɔ kɛ̀ a gòo pì lɛ́a.

³ Kína a là à pì: Ɛsita, bɔ́mɛɛ? Bɔ́n ntɛn gbɛkamaa? Bee tó ma kpata kpadomɛ mani kpámma.

⁴ À wèa à pì: Kí, tó à kɛ̀nnɛ mana, ǹ Amana sísi pɔ́ble kũ matɛn kɛnnɛa gbãra.

⁵ Akũ kína pì ò su kũ Amanao gɔ̃̀nɔ, de ò gɛ́ ò yã kũ Ɛsita gbɛ̀kaa pì kɛ. Akũ kína kũ Amanao gɛ̀ɛ de ò pɔ́ble kũ Ɛsita kɛ̀ńnɛ pì ble.

⁶ Kũ òtɛn sèwɛ̃ mi, kína Ɛsita là à pì: Bɔ́n ntɛn wɛ́ kɛ maa? Mani kɛnnɛ. Yã kpaten ntɛn gbɛkamaa? Bee tó ma kpata kpadomɛ mani kpámma.

⁷ Ɛsita wèa à pì: Yã kũ matɛn wɛ́ kɛmman dí.

⁸ Kína, tó ma n pɔnna lè, tó à kɛ̀nnɛ, ǹ yã kũ matɛn wɛ́ kɛmma kɛmɛnɛ, à mɔ́ à pɔ́ble kũ mani kɛárɛ zia ble, mani yã kũ n ma lai onnɛ.

⁹ Kũ Amana bò zĩ birea, a pɔ kɛ̀ nna àtɛn yáa dɔ. Ama kũ à Mɔdekai è kínabɛ gãnu gũn adi futɛ à zɛ̀arɛro adi vĩna kɛarɛro, akũ à pɔ fɛ̃̀i.

¹⁰ À a zĩda kũ̀ à tà bɛ. Kũ à a gbɛ̃nnanɔ sìsi kũ a nanɔ Zɛrɛsio,

¹¹ akũ àtɛn ĩa dã a aruzɛkɛ zɔ̃kɔ̃ kũ a nɛ́gɔ̃gbɛ̃ dasinɔ yã musu. À pì a karanaa lè kína kĩnaa à a gba gbãna de a ìba kparanɔla kũ gbãnadenɔo ń pínki.

¹² À pì dɔ: Madon kína nanɔ Ɛsita ma sisi à pɔ́ble kɛ̀mɛnɛ kũ kínao. À ɛ̀ra à ma sisi mà pɔ́ ble kũ kínao zia dɔ.

¹³ Bee kũ abireo tó ma Yuda buri Mɔdekai è vutɛna kínabɛ gãnu gũn, yã birenɔ pínki dì kɛmɛnɛ pɔ́ke ũro.

¹⁴ Akũ a nanɔ Zɛrɛsi kũ a gbɛ̃nnanɔ pìnɛ: Ǹ tó gbɛ̃nɔ lí pɛ́tɛnnɛ a lei kà gã̀sãkuru bupla akuri, ǹ wɛ́ kɛ kínaa zia kɔnkɔ à n gba zɛ́ ǹ Mɔdekai lokoa, gbasa ǹ gɛ́ kũ kínao ǹ pɔ́ ble kũ pɔnnao. Yã pìi kà Amanagu manamana, akũ à lí pìi pɛ̀tɛ.

« Vorige

Volg ons:

Geborgde skakels

Advertensies