Aanlyn Bybel

ƐSITA 4 - Bisã Bible 2005

Mɔdekai wɛ́kɛna Ɛsitaa de à lɛ́ da yãn

¹ Kũ Mɔdekai yã kũ ò kɛ̀ɛ pìi mà, à a pɔ́kasanɔ gà à kɛ̃̀, akũ à uta kasanɔ kùala à túbu gbɛ̃̀ a mìia, akũ àtɛn kure wɛ̃tɛ gũn àtɛn wɛ̃nda ɔ́ gbãna dɔ.

² À gɛ̀ɛ ari kínabɛ gãnulɛa, zaakũ gbɛ̃ke dì fɔ̃ à gɛ̃ kínabɛ gãnu gũn kũ uta kasanɔ danaro.

³ Ò yã kũ kína dìtɛ doka ũ pìi kpàkpaa kɛ̀ bùsu kũ bùsuuoonɛ pínki, akũ Yudanɔ nà ɔ́ɔdɔnaaa manamana gu sĩnda pínki kũ lɛ́yĩnaao. Òtɛn wɛ́tɛ̃ kɔ́tɛ òtɛn wɛ̃nda ɔ́ɔ dɔ. Ń gbɛ̃nɔ uta kasanɔ dàda dasi ò túbu gbɛ̃̀ ń mìia.

⁴ Kũ Ɛsita ìba nɔgbɛ̃nɔ kũ gɔ̃gbɛ̃nɔ sù ò ònɛ, a nɛ̀sɛɛ yàka manamana. À pɔ́kasanɔ kpã̀zã Mɔdekainɛ à da uta kasanɔ gbɛ̀n, ama adi we à sìro.

⁵ Ataka kũ ò a fɛ̀rɛɛ kɛ̀ɛmɛ dogari kũ kína dìtɛ àgɔ̃ kú Ɛsita sarɛ ũ. Ɛsita a sìsi à a zĩ̀ Mɔdekaia à gɛ́ à a lá: Bɔ́ yã mɛ́ à sùu? Bɔ́ yã mɛ́ à tò àtɛn kɛ lɛɛ?

⁶ Ataka bò kínabɛ gãnulɛa à Mɔdekai lè.

⁷ Mɔdekai yã kũ à a le bàbanɛ pínki, akũ à andurufu kũ Amana pì ani ká kína aruzɛkɛkatɛkin Yudanɔ dɛdɛna yãi lɛ́ ònɛ papana.

⁸ À yã kũ ò dìtɛ Yudanɔ dɛdɛna yã musu kũ ò a kpàkpaa kɛ̀ Susa takada kpàa dɔ de à mɔ Ɛsitanɛ à a bɔkɔtɛnɛ. À pì à o Ɛsitanɛ à gɛ́ kína kĩnaa à kútɛ kɛnɛ à wɛ́ kɛa a gbɛ̃nɔ yã musu.

⁹ Ataka tà à yã kũ Mɔdekai ò bàba Ɛsitanɛ.

¹⁰ Akũ Ɛsita pìnɛ à gɛ́ à yã dí o Mɔdekainɛ:

¹¹ Kía ìbanɔ kũ a bùsu gbɛ̃nɔ dɔ̃ ń pínki kũ tó gɔ̃gbɛ̃ ke nɔgbɛ̃ nà kínai a kpɛ́ gũn, tó adi a sísiro, doka kun mɛ̀n domɛ. Òdi ade dɛmɛ, tó adi kɛ kína a wura gòo dɔ̀ adea de à le àgɔ̃ kun baasiro. Makũ sɔ̃, à kà gɔrɔ baraakuri kũ odi ma sísi mà gɛ́ kína kĩnaaro.

¹² Kũ à gɛ̀ɛ à Ɛsita yã pì bàba Mɔdekainɛ,

¹³ akũ Mɔdekai ɛ̀ra à lɛ́gbãzã kɛ̀nɛ à pì: Ǹsungɔ̃ da mɔkɔ̃n mɛ́ ĩni bo ndo Yudanɔ tɛ́ n kunna kínabɛa yãiro.

¹⁴ Tó ń yĩtɛna gɔrɔ díkĩna taka gũn, kpányĩ ni bo gukea à Yudanɔ mì sí à ń bo. Mɔkɔ̃n kũ n de bedenɔ sɔ̃ áni gaga. Tó gɔrɔ díkĩna taka yãimɛ n gɔ̃ kína nanɔ ũ, dí mɛ́ à dɔ̃ɔ?

¹⁵ Akũ Ɛsita lɛ́gbãzã kɛ̀ Mɔdekainɛ à pì:

¹⁶ Ǹ gɛ́ ǹ Yuda kũ ò kú Susanɔ kakara ń pínki, à lɛ́ yĩ ma yã musu. Àsun pɔ́ blero àsun í miro gɔrɔ aakɔ̃ fãnantɛ̃ kũ gwãanio. Makũ kũ ma ìbanɔ óni lɛ́ yĩ lɛ se. Abire gbɛra mani gɛ́ kína kĩnaa, bee tó má gɛna zɛ́ vĩro. Tó sɔ̃ ma ga, ma gan gwe.

¹⁷ Akũ Mɔdekai tà à yã kũ Ɛsita ònɛɛ kɛ̀ pínki.

« Vorige

Volg ons:

Geborgde skakels

Advertensies