Aanlyn Bybel

ƐSITA 3 - Bisã Bible 2005

¹ Yã birenɔ gbɛra kína Asueru Amɛdata nɛ́ Amana, Agaga buri gwenaa kàra à a gbà gbãna, à vutɛki kũ à de a gbãnade dakenɔ pɔ́la ń pínki kpàa.

² Kína ìba kũ ò kú a bɛ gãnu gũnnɔ dì kútɛ ò mì natɛ Amananɛ lákũ kína dìtɛ nà, ama Mɔdekai dì kútɛ à mì natɛnɛro.

³ Akũ kína ìbaa pìnɔ Mɔdekai là ò pì: À kɛ̀ dera ńdi kína yã maroo?

⁴ Lákũ gu dìgɔ̃ dɔ nà òdigɔ̃ onɛ lɛ, ama àdi ń yã daro, à pì Yudan a ũ. Akũ ò ò Amananɛ de ò le ò dɔ̃ tó ani Mɔdekai yãkɛnaa pì fɔ̃.

⁵ Kũ Amana è Mɔdekai dì kútɛ à mì natɛarɛro, akũ a pɔ fɛ̃̀.

⁶ Kũ ò Mɔdekai buri ònɛ, akũ a dɛna ado kɛ̀nɛ fíti, akũ àtɛn zɛ́ wɛtɛ à Mɔdekai buri Yuda kũ ò kú Asueru bùsuu gũnnɔ dɛdɛ ń pínki.

Amana lɛ́kpakũsũna Yudanɔi

⁷ Kína Asueru kíblena wɛ̃̀ kuri awɛɛpladen a mɔ káaku Nisã gũn, Amana gbɛ̀ kũ òdi pi purimu zù à gu gwà, de à mɔ kũ ani yã pì kɛa dɔ̃ kũ a gɔrɔo. Akũ gugwanaa pìi bò mɔ kuri awɛɛpla kũ òdi pi Ada gũn.

⁸ Akũ Amana pì kína Asuerunɛ: Buri ke kun a gbɛ̃nɔ fã̀kɔ̃a buri pãndenɔ tɛ́ n bùsu dasinɔ gũn pínki. Ń futɛokarayãnɔ donadona kũ buri kparanɔ pɔ́o, òdi n doka daro. Adi kɔ̃ sí ǹ ń tó tɛɛnɛro.

⁹ Kí, tó à kɛ̀nnɛ nna, ǹ yã ditɛ de ò láka kũńwo, mani andurufu tɔn wàa pla kpá n ɔgɔ'utɛrinɔa ò ká n aruzɛkɛkatɛkin.

¹⁰ Kína a tãnka sèedakɛbɔɔ bò à kpà Amɛdata nɛ́ Amana, Agaga buri Yudanɔ zãngurii pìia

¹¹ à pì: Ǹ kɛ buri pìinɛ lákũ à kɛ̀nnɛ mana nà, ǹgɔ̃ andurufu pì kũna n pɔ́ ũ.

¹² Mɔ káaku gɔrɔ kuri awɛɛ'aakɔ̃de zĩ Amana kína takadakɛ̃rinɔ sìsi. Ò yã kũ Amana dìtɛ kína ìbanɔ kũ kína kũ ò kú bùsu kũ bùsuuonɔ, buri kũ burio gbãnadenɔnɛ dà takadan. Ò kɛ̃̀ buri kũ burioonɛ, baadi kũ a yã takao, bùsu kũ bùsuuo kũ a takadakɛ̃na burio. Ò kɛ̃̀ kũ kína Asueru tɔ́o, akũ ò a sèedaa kɛ̀ takada pìia kũ a tãnkao.

¹³ Ò takada pìnɔ nà zĩ̀rinɔnɛ ń ɔĩ ò ń gbárɛ kína bùsu dasinɔ gũn. Takada pìi gũn ò pì ò Yudanɔ dɛdɛ ò láka kũńwo ò ń buri bo, nɛ́ fíti gbɛ̃ zɔ̃kɔ̃, gɔ̃gbɛ̃nɔ kũ nɔgbɛ̃nɔo gɔrɔ do gũn, mɔ kuri awɛɛplade Ada gɔrɔ kuri awɛɛ'aakɔ̃de zĩ, ò ń pɔ́nɔ kakara.

¹⁴ Oni yã kũ à dìtɛ pì takada kpãzã bùsu kũ bùsuuoonɛ pínki de àgɔ̃ de doka ũ, oni a kpàkpa kɛ buri sĩnda pínkinɛ de ògɔ̃ kú soru gũn gɔrɔ pì zĩ.

¹⁵ Zĩ̀rinɔ wã̀ ò gɛ̀ɛ gɔ̃̀nɔ yã kũ kína dìtɛ pì yãi, akũ ò a kpàkpaa kɛ̀ Susa wɛ́ran. Kína kũ Amanao vùtɛ òtɛn í gbɛ̃. Susadenɔ sɔ̃ ò bídi kɛ̀ yã pìia.

« Vorige

Volg ons:

Geborgde skakels

Advertensies