ƐSITA 1 - Bisã Bible 2005

Kína Asueru nanɔ Vasati bona kpatan

¹ Kína Asueru gɔrɔa à kí blè bùsu mɛ̀n basuddo awɛɛsupplanɔa sɛna zaa India bùsun ari à gɛ̀ɛ pɛ́ Etiopia bùsuua.

² Vutɛna a bɛa Susa wɛ́ran

³ a kíblena wɛ̃̀ aakɔ̃de gũn à gbãnadenɔ kũ a ìbanɔ kàkara ń pínki dikpɛ pɔ́blea. Pɛsia kũ Midião bùsu zĩ̀kari bàdenɔn kú gwe kũ gbɛ̃ bɛ̀ɛrɛdenɔ kũ bùsu gbãnadenɔo.

⁴ À a kpata aruzɛkɛ zɔ̃kɔ̃nɔ kũ a zɔ̃kɔ̃kɛ gakurio mɔ̀ńnɛ ari mɔ suddo.

⁵ Kũ gɔrɔ birenɔ pàpa, à dikpɛ pɔ́ble kɛ̀ gbɛ̃ kũ ò kú Susanɔnɛ, kínɛnɔ kũ talakanɔ ń pínki. Ò dikpɛ pɔ́ blè ari gɔrɔ suppla a bɛ ɔn líkpɛn.

⁶ Ò biza pura kũ a búguo dɔ̀dɔ andurufu tãnkanɔa kũ bà puranɔ kũ bà gaaruradenɔ, akũ ò lòko kpɛ́ gbɛ̀gba kũ ò bò kũ gbɛ̀punɔa. Wura kũ andurufu wutɛbɔnɔ katɛna gusara kũ ò kɛ̀ kũ gbɛ̀puo kũ gbɛ̀tɛ̃o kũ gbɛ̀sirao kũ gbɛ̀ búguo.

⁷ Ò wɛ̃ kpàkpaḿma gwe kũ wura tokonɔ. Toko pìnɔ buri donadona kɔ̃nɛ pínki. Kína wɛ̃ pìi kpàḿma à gɛ̃̀ ɔla.

⁸ Kína dìtɛ kũ òsun gí wɛ̃mirinɔnɛro. À pì a bɛgwarinɔnɛ ò wɛ̃ kpá baadia lákũ à yei nà.

⁹ Kína Asueru nanɔ Vasati dikpɛ pɔ́ble kɛ̀ nɔgbɛ̃nɔnɛ kínabɛa dɔ.

¹⁰ A gɔrɔ supplade zĩ kína pɔ kɛ̀ nna wɛ̃a, akũ à pì a dogari gbɛ̃nɔn suppla kũ ò ń fɛ̀rɛɛ kɛ̀nɔnɛ: Mɛuma, Bizita, Abona, Bigita, Abagata, Zeta kũ Kakasao,

¹¹ ò suarɛ kũ a nanɔ Vasatio kũ a kí nanɔ fùraao kuna, de à a manakɛ mɔ gbɛ̃nɔnɛ kũ gbãnadenɔ, zaakũ nɔgbɛ̃ pì bi nɔmɛ.

¹² Kũ kína dogari pìnɔ yã pìi ò a nanɔnɛ, à gì sui, akũ kína pɛ̃tɛ̃ kɛ̀ a pɔ fɛ̃̀i manamana.

¹³ Kína yã pìi ò wɛ́zɛ̃ri susunɛ tàasikarinɔnɛ, zaakũ àdigɔ̃ yã sĩnda pínki gbɛka gbɛ̃ kũ ò bùsu doka dɔ̃nɔamɛ.

¹⁴ Pɛsia kũ Midião gbãnade kũ òdigɔ̃ kú a sarɛ gbɛ̃nɔn supplanɔ tɔ́n dí: Kasena, Seta, Adamata, Tasisi, Mɛrɛsi, Masena kũ Mɛmukão. Mɔ́kɔ̃nɔmɛ a kpàasinɔ ũ. A kpata gbãnadenɔn gwe.

¹⁵ À pìńnɛ: Ma a dogarinɔ zĩ̀ ma nanɔ Vasatia kũ yão, akũ à gì mai. Óni kɛ kãao deramɛɛ? Doka pì deramɛɛ?

¹⁶ Akũ Mɛmukã pì kínanɛ kũ gbãnade pìnɔo: Kí, mɔkɔ̃mmɛ n nanɔ Vasati taari kɛ̀nnɛ ndoro, à taari kɛ̀ gbãnadenɔnɛ kũ n bùsu gbɛ̃ sĩnda pínkio.

¹⁷ Yã kũ n nanɔ pìi kɛ̀ ni dagula, nɔgbɛ̃ sĩnda pínki ni ma ò ń zãnɔ gya bo ò pi: Kína Asueru pì ò a nanɔ Vasati sísiarɛ, akũ à gì sui.

¹⁸ Pɛsia kũ Midião bùsu gbãnadenɔ nɔgbɛ̃ kũ ò n nanɔ yã pìi mànɔ nigɔ̃ yã vãni we ń zãnɔa tera. Lɛ́'ɛna kɔ̃a kũ zukao ni kɛ dasi.

¹⁹ Kí, tó à kàngu, ǹ yã ditɛ Vasatinɛ àsun wɛ́ kɛ pla kũnwo doro, ǹ nɔgbɛ̃ kũ à deala ká kpatan a gɛ̃nɛ ũ. Oni yã pì kɛ̃ Pɛsia kũ Midião doka kũ òdi gbororo takada gũn.

²⁰ Tó ò yã kũ n dìtɛ kpàkpaa kɛ̀ n bùsu zɔ̃kɔ̃ɔ gũn pínki, nɔgbɛ̃nɔ ni bɛ̀ɛrɛ lí ń zãnɔnɛ, nɔ gbãnadenɔ kũ nɔ fítinnanɔ ń pínki.

²¹ Yã pìi kà kínagu kũ gbãnadenɔ ń pínki, akũ à kɛ̀ lákũ Mɛmukã ònɛ nà.

²² Akũ à lɛ́gbãzã kɛ̀ bùsu kũ à vĩnɔnɛ pínki, bùsu kũ bùsuuo kũ a takadakɛ̃na burio, buri kũ burio baadi kũ a buriyão. À pì gɔ̃gbɛ̃ mɛ́ anigɔ̃ gbãna ble ɔnn, a buriyãn ògɔ̃ o ɔnn pìi gũn.