ƐFESUDENƆ 3 - Bisã Bible 2005

Pɔlu zĩkɛna buri pãndenɔ tɛ́

¹ Abire mɛ́ à tò makũ Pɔlu, má de purusuna ũ Kirisi Yesunɛ ákɔ̃nɔ buri pãndenɔ yãi.

² Ádi ma lákũ Luda a gbɛ̃kɛkɛnnɛna zĩ dàmɛnɛ mà kɛ á tɛ́roo?

³ Luda a asiriyã mɔ̀mɛnɛ, ma kɛ̃̀árɛ fíti kɔ̀.

⁴ Tó a a kyó kɛ̀, áni fɔ̃ à dɔ̃ lákũ ma wɛ́ kɛ̃̀ nà Kirisi asiriyã musu.

⁵ Luda dí yã pì o gbɛ̃kenɛ yãro, akũ tera sà à mɔ̀ a zĩ̀rinɔ kũ a annabinɔnɛ kũ a Nini gbãnao.

⁶ Yã kũ à utɛna yã pìn dí: Kirisi Yesu gũn baaru nna mana yãi buri pãndenɔ gɔ̃̀ Luda túbiblerinɔ ũ lɛɛlɛ kũ Yudanɔ, ò gɔ̃̀ kũńwo mɛ̀dokɔ̃nɔdenɔ ũ. Ń baka kú lɛ́ kũ Luda sɛ̀ɛ gũn.

⁷ Ma gɔ̃ baaru nna pìi kpàri ũ gba kũ Luda dàmɛnɛ, a gbãna tɛ́n zĩ kɛ ma gũn yãi.

⁸ Makũ kũ má kĩana Luda gbɛ̃nɔ tɛ́, Luda gba pìi dàmɛnɛ, akũ matɛn Kirisi aruzɛkɛ lakanasari baaru kpá buri pãndenɔnɛ,

⁹ matɛn asiriyã kũ Luda tɛn wɛtɛ gbɛ̃ sĩnda pínkinɛ bońnɛ gupuraa. Asiriyã pì utɛna Luda kũ à pɔ́ sĩnda pínki kɛ̀ kĩnaa zaa káaku,

¹⁰ akũ tera sà à tò kpatablerinɔ kũ ikode kũ ò kú musunɔ a ɔ̃ndɔ̃ buri dasinɔ dɔ̃̀ sɔsi gbɛ̃nɔ gãi.

¹¹ Luda pɔyenyĩna kũ à kun zaa káaku pì lɛ́ pàpa Kirisi Yesu ó Dikiri gãi.

¹² A gũn ó zɛ́ vĩ ò na Ludai kũ swɛ̃̀ɛo kpatɛna a náanikɛna yãi.

¹³ Abire yãi ma wɛ́ kɛ̀áwa, àsun tó á nɛ̀sɛ yaka wari kũ matɛn kɛ á musu yãiro. Á kpetana yãimɛ.

Kirisi yenyĩ

¹⁴ Abire yãi madì kútɛ De Ludanɛ.

¹⁵ A kĩnaa a bede kũ ò kú musu kũ zĩtɛonɔ ń tɔ́ lèn ń pínki.

¹⁶ Madì wɛ́ kɛa à á gba gbãna á nɛ̀sɛɛ gũn kũ a Nini gbãnao a aruzɛkɛ gakuride lɛ́n,

¹⁷ de Kirisi vutɛ á swɛ̃̀n a náani kũ átɛn kɛ yãi, á zĩnipɛtɛna gɔ̃ gbãna yenyĩ gũn,

¹⁸ de à le à a yenyĩ yàasa kũ a gbã̀nao kũ a leio kũ a lòkotooo gbá dɔ̃ kũ Luda gbɛ̃nɔ pínki,

¹⁹ de à le à a yenyĩ kũ oni fɔ̃ ò a lɛ́ dɔ̃ pínkiro dɔ̃, Luda papana pínki pɛkɛrɛáwa.

²⁰ Luda zɔ̃kɔ̃! Ani fɔ̃ à kɛwɛrɛ de lákũ odì a wɛ́ kɛ ke odì a laasun lɛ́ nàla manamana kũ gbãna kũ àtɛn zĩ kɛ ó gũnwo.

²¹ Ògɔ̃ a tɔ́ kpá sɔsi gbɛ̃nɔ kũ Kirisi Yesuoo gũn wɛ̃̀ kũ wɛ̃̀ɛo ari gɔrɔ sĩnda pínki! Aami.