ƐFESUDENƆ 1 - Bisã Bible 2005

Gbɛ̃kɛ kũ Luda kɛ̀wɛrɛ Kirisi gũn

¹ Makũ Pɔlu, Kirisi Yesu zĩ̀rii Luda pɔyenyĩnaa gũn, makũ mɛ́ ma takada dí kɛ̃̀ Luda gbɛ̃ kũ òtɛn Kirisi Yesu náani kɛ zaa Ɛfesunɔnɛ.

² Ó De Luda kũ Dikiri Yesu Kirisio gbɛ̃kɛ kɛárɛ, à á gba aafiaa.

³ Ò Luda ó Dikiri Yesu Kirisi De sáabu kpá! Ó kunna Kirisi gũn Luda a Nini arubarika sĩnda pínki dàógu zaa musu.

⁴ À ó sɛ́ a gũn andunia katɛna ã, de ó kunna gɔ̃ denɛ adona mamberu sari. Yenyĩ gũn

⁵ à gĩnakɛ à ó dítɛ a nɛ́nɔ ũ Yesu Kirisi gãi, lákũ àtɛn wɛtɛ a pɔyenyĩnaa gũn nà,

⁶ de à tɔ́ bo a gbɛ̃kɛ gakuride kũ à kɛ̀wɛrɛ a Nɛ́ yenyĩde gũn yãi.

⁷ A gũn à ó bó kũ a aruo. À ó taarinɔ kɛ̃̀wá a gbɛ̃kɛ zɔ̃kɔ̃

⁸ kũ à kɛ̀wɛrɛ à gɛ̃̀ ɔla yãi. Ɔ̃ndɔ̃ sĩnda pínki kũ wɛ́zɛ̃ sĩnda pínkioo gũn

⁹ à tò o a pɔyenyĩna asiri dɔ̃̀, lákũ à zɛ̀o à kɛ Kirisi gãi nà.

¹⁰ Tó a pɔyenyĩnaa pì kɛgɔrɔ kà, ani pɔ́ sĩnda pínki kakara Kirisi ń Mìdenɛ, pɔ́ kũ à kú musu kũ zĩtɛo pínki.

¹¹ Luda kũ àdi yã sĩnda pínki kɛ lákũ à zɛ̀o a pɔyenyĩnaa gũn nà gĩnakɛ à ó dítɛ lákũ àtɛn wɛtɛ nà, à ó sɛ́ a pɔ́ ũ Kirisi gũn,

¹² de ókɔ̃nɔ kũ ó wɛ́ dɔ Kirisii zaa káakunɔ ògɔ̃ de a tɔ́ gakuride kpàrinɔ ũ.

¹³ Ákɔ̃nɔ sɔ̃, a yãpura yã mà, a baaru nna kũ à á sura bàa pìi sì. A gũn Luda a zĩda sèedaa kɛ̀áwa a Nini kũ à a lɛ́ sɛ̀ ũ.

¹⁴ Àkũmɛ túbi kũ óni le zɛnkpɛkɛ ũ ari Luda gɔ̃ gɛ́ a gbɛ̃nɔ bo, de ò a tɔ́ gakuride kpá yãi.

Pɔlu aduakɛna Ɛfesudenɔnɛ

¹⁵ Abire yãi zaa gɔrɔ kũ ma á Dikiri Yesu náanikɛnaa mà kũ yenyĩ kũ á vĩ kũ Luda gbɛ̃nɔ ń pínki,

¹⁶ mádi kámma bo kũ Luda sáabukpanaao á yã musuro. Á yã dìgɔ̃ dɔmagu wɛ́kɛ kũ madì kɛ Ludaaa gũn.

¹⁷ Madì wɛ́ kɛ De gakuride, ó Dikiri Yesu Kirisi Ludaa, de à á gba ɔ̃ndɔ̃, à á wɛ́ kɛ̃árɛ kũ a Nini gbãnao de à le à a dɔ̃ swáswa.

¹⁸ Madì wɛ́ kɛa à á nɛ̀sɛ wɛ̃árɛ de à le à tãmaa kũ à á sísia dɔ̃. À a túbi gakuride aruzɛkɛ pìnɔ dìtɛ a gbɛ̃nɔnɛ

¹⁹ kũ a gbãna zɔ̃kɔ̃ bonsarɛ kũ àtɛn zĩ kɛ ókɔ̃nɔ kũ odì a náani kɛnɔ gũnwo. Gbãna zɔ̃kɔ̃ɔ pì zĩ kɛ̀ Kirisi gũn

²⁰ gɔrɔ kũ Luda a vù gan, à a vùtɛ a ɔplai zaa musu.

²¹ Gwen Kirisi de kpatablerinɔ kũ ikodenɔ kũ gbãnadenɔ kũ dikirinɔla ń pínki kũ tɔ́ kũ òdi mì natɛńnɛnɔ pínki. Adi kɛ andunia tera díkĩna adonlo, kũ a pɔ́ kũ ani suomɛ dɔ.

²² Luda tò à iko vĩ pɔ́ sĩnda pínkia, akũ à a dìtɛ pɔ́ sĩnda pínki mìde ũ sɔsi gbɛ̃nɔnɛ.

²³ Sɔsi gbɛ̃ pìnɔmɛ Kirisi mɛ̀ ũ, à de Kirisi kũ àdi pɔ́ sĩnda pínki papa gu sĩnda pínkia papana ũ.