Aanlyn Bybel

EBERUNƆ 1 - Bisã Bible 2005

Luda Nɛ́ de malaikanɔla

¹ Luda yã ò ó dizinɔnɛ yã káaku annabinɔ gãi gɛ̃̀n baaakɔ̃ zɛ́nɔ gũn dasi,

² ama à yã òwɛrɛ a Nɛ́ gãi gɔrɔ kpɛde díkĩnanɔn sà. Nɛ́ pì gãin Luda andunia kɛ̀o, à dìtɛ kũ àkũ mɛ́ anigɔ̃ pɔ́ sĩnda pínki vĩ.

³ Àkũ mɛ́ à Luda gakuri tɛ́kɛna ũ, à de a kunna ũ sãnsãn. Àkũ mɛ́ à pɔ́ sĩnda pínki kũna kũ a yã'ona gbãnao. Durunnanɔ kɛ̃mmana gbɛra à vùtɛ musu Luda zɔ̃kɔ̃de ɔplai.

⁴ Lákũ tɔ́ kũ à blèe pì de malaikanɔ pɔ́la nà, lɛn a zɔ̃kɔ̃ deńla lɛ.

⁵ Luda yã dí ò malaika kenɛ yã yá? Ma Nɛ́mɛ n ũ, ma n i gbãra, Kesɔ̃: Manigɔ̃ de a De ũ, anigɔ̃ de ma Nɛ́ ũ.

⁶ Kũ Luda tò a dauduu sù andunia gũn à pì: A malaikanɔ donyĩ kɛnɛ ń pínki.

⁷ Malaikanɔ yã musu à pì: Adì a zĩ̀rinɔ li ĩa ũ, a zĩkɛrinɔ sɔ̃ tɛ́vura ũ.

⁸ A Nɛ́ yã musu sɔ̃ à pì: Luda, ĩnigɔ̃ vutɛna kíblegbaaa gɔrɔ sĩnda pínkimɛ, ndìgɔ̃ n kíkɛgo kũna yãzɛde ũ.

⁹ Ń ye yãmanakɛnaai, n zã vãnikɛna gu. Abire yãi Luda, n Luda, n ka kín, à pɔnna pìsimma de n gbɛ̃nɔla.

¹⁰ Ò pì dɔ: Dikiri, n andunia zĩni pɛ̀tɛ zaa káaku, musu bi n ɔzĩmɛ.

¹¹ Ń pínki ni gɛ̃tɛ, ama ĩnigɔ̃ kun. Oni zĩ kũ lán pɔ́kasa bà,

¹² ĩni ń koko lán uta bà, ĩni ń litɛ lán pɔ́kasa bà. Mɔkɔ̃n sɔ̃, n kuuna dìgɔ̃ dokɔ̃nɔ, n gɔrɔ lakana vĩro.

¹³ À yã dí ò malaika kenɛ yã yá? Ǹ vutɛ ma ɔplai ari màgɔ̃ n ibɛrɛnɔ kɛnnɛ n tìntin ũ.

¹⁴ Malaikanɔ bi nini zĩkɛrinɔmɛ ń pínki. Luda dì ń zĩ de ò kpá gbɛ̃ kũ oni surabana lenɔimɛ.

« Vorige

Volg ons:

Geborgde skakels

Advertensies