BONAA 1 - Bisã Bible 2005

Waridɔna Isarailanɔa Misila

¹ Isaraila nɛ́ kũ ò tà Misila kũ ń de Yakubuo, baadi kũ a bɛ gbɛ̃nɔ tɔ́n dí:

² Rubɛni, Simɛɔ, Levi, Yuda,

³ Isaka, Zɛbuluni, Biliaminu,

⁴ Dã, Nafatali, Gada kũ Asao.

⁵ Yakubu buri pìnɔ ń pínki gbɛ̃nɔn baaakɔ̃ akurimɛ. Yusufu sɔ̃ a gĩnakɛ à kú Misila kɔ̀.

⁶ Akũ Yusufu gà kũ a vĩ̀ninɔ kũ gbɛ̃ kũ ò kun a gɔrɔanɔ ń pínki.

⁷ Isarailanɔ nɛ́ ì ò kɛ̀ dasi ò kàra ò dasi kũ̀ manamana, ò dà bùsuu pìla pínki.

⁸ Kína dufu kũ à Yusufu dɔ̃ro kpata blè Misila,

⁹ akũ à pì a gbɛ̃nɔnɛ: À Isarailanɔ gwa, ò dasi kũ̀ ò dàóla.

¹⁰ Ò gɛ́ ò ɔ̃ndɔ̃ kɛńnɛ de òsun kararo yãi. Tó zĩ̀i fùtɛ, ò na ó ibɛrɛnɔa ò zĩ̀ ká kũoo ò bɔtɛ ó bùsun.

¹¹ Akũ ò gbɛ̃nɔ dìtɛńnɛ ń dikirinɔ ũ ò wɛ́ tãḿma kũ zĩ gbãna kɛnaao. Lɛmɛ ò Pitomu kũ Ramɛsɛo kàtɛ Firi'aunanɛ a pɔ́blekatɛkianɔ ũ lɛ.

¹² Ama lán òtɛn wari dɔḿma nà, lɛmɛ òdigɔ̃ kara lɛ òtɛn dagula, akũ swɛ̃̀ɛ kɛ̃̀ Misilanɔgu ń yã musu.

¹³ Akũ ò ń dá zɔ̀zĩ pãsĩn

¹⁴ ò ń pɔ yàka ò ɛ̃ zĩ gbãna dàńnɛ kũ kúnkubonaao kũ bura zĩ sĩnda pínkio. Ò zĩ pìnɔ dàńnɛ pínki pãsĩpãsĩ.

¹⁵ Akũ Misilanɔ kína Eberu nɛ́sɛtɛrinɔ sìsi, a do tɔ́n Sifira, a do Pua.

¹⁶ À pìńnɛ: Tó áni nɛ́ i Eberu nɔgbɛ̃nɔnɛ tera sa, tó gɔ̃gbɛ̃mɛ, à a dɛ. Tó nɔgbɛ̃mɛ sɔ̃, à a tó.

¹⁷ Nɔgbɛ̃ pìnɔn Luda vĩna vĩ, odi yã kũ à òńnɛ kɛro, òtɛn nɛ́gɔ̃gbɛ̃nɔ tó.

¹⁸ Akũ kína pì ń sísi à ń lá à pì: À kɛ̀ dera a kɛ̀ lɛ a nɛ́gɔ̃gbɛ̃nɔ tòo?

¹⁹ Ò wèa ò pì: Eberu nɔgbɛ̃nɔ de lán Misila nɔgbɛ̃nɔ bàro, ò wãna òdi nɛ́ i ari ògɔ̃ ká.

²⁰ Lɛmɛ Isarailanɔ tɛn kara lɛ òtɛn dasi kũ. Akũ Luda yã mana kɛ̀ nɛ́sɛtɛrii pìnɔnɛ

²¹ à ń gbá nɛ́nɔ, kũ ò a vĩna vĩ yãi.

²² Akũ Firi'auna yã dìtɛ a gbɛ̃nɔnɛ ń pínki à pì: À Eberu nɛ́gɔ̃gbɛ̃ kũ ò ń ínɔ ká Nili ín ń pínki, ama à nɛ́nɔgbɛ̃nɔ tó.