Aanlyn Bybel

AYUBA 1 - Bisã Bible 2005

Setan Ayuba yɔ̃na káaku

¹ Gɔ̃gbɛ̃ ke kú Uzu bùsun yã, a tɔ́n Ayuba. Gbɛ̃ manamɛ, àdigɔ̃ taari vĩro. À Luda vĩna vĩ akũsɔ̃ à gì yãvãnikɛnaai.

² À nɛ́gɔ̃gbɛ̃nɔ vĩ gbɛ̃nɔn suppla, nɛ́nɔgbɛ̃nɔ gbɛ̃nɔn aakɔ̃.

³ À sãnɔ vĩ dúbu suppla, lakuminɔ dúbu aakɔ̃, zùnɔ wàa sɔɔro, zaakinɔ wàa pla kpɛ́ basɔɔro, akũsɔ̃ a zĩkɛrinɔn dasi manamana. À aruzɛkɛ zɔ̃kɔ̃ de gbɛ̃ sĩnda pínki pɔ́la ifãboki kpa.

⁴ A nɛ́gɔ̃gbɛ̃nɔ dìgɔ̃ pɔnna pɔ́ble kɛkɔ̃nɛ bɛ kũ bɛo, òdi ń dãre pìnɔ sísi ò mɔ́ ò pɔ́ ble ò í mi kũńwo lɛɛlɛ.

⁵ Gɔrɔ kũ ò pɔnna pɔ́ blè ò làka pínki, Ayuba dì gbɛ̃ zĩḿma ò gbã̀ bońnɛ. Tó gu dɔ̀, àdi futɛ kɔnkɔkɔnkɔ à sa'opɔ kũ òdi ká tɛ́n à tɛ́ kũ o ń baadinɛ à pi: Òdigɔ̃ dɔ̃ro ma nɛ́nɔ durunna kɛ̀ ò dɔkɛ̀ kũ Ludao ń swɛ̃̀n gwɛɛ. Lɛn Ayuba dìgɔ̃ kɛ lɛ gɔrɔ sĩnda pínki.

⁶ Zĩkea malaikanɔ sù ò zɛ̀ Dikiri arɛ, akũsɔ̃ Setan kú ń tɛ́.

⁷ Akũ Dikiri pì Setannɛ: N bo mámɛɛ? À wèa à pì: Matɛn gɛ́ matɛn su matɛn likara andunia gũmmɛ.

⁸ Akũ Dikiri pìnɛ: N ma zɔ̀bleri Ayuba è yá? A sára kú andunia gũnlo. Gbɛ̃ manamɛ, à taari vĩro. À ma vĩna vĩ akũsɔ̃ à gì yãvãnikɛnaai.

⁹ Akũ Setan pì Dikirinɛ: Ayuba n vĩna vĩ pãn yá?

¹⁰ Mɔkɔ̃mmɛ n karaa kpà n likai kũ a bɛo kũ pɔ́ kũ à vĩnɔ pínki. N arubarikaa dà a zĩn, akũ a pɔ́nɔ kàra à dàgula.

¹¹ Ǹ ɔ bo ǹ pá a pɔ́nɔa pínki ǹ gwa, tó adi yã vãni onnɛro.

¹² Akũ Dikiri pìnɛ: Tɔ̀! Ma a pɔ́ sĩnda pínki nànnɛ n ɔĩ, ama ǹsun ɔ pá a mɛ̀ɛaro. Akũ Setan gò Dikiri arɛ.

¹³ Zĩkea Ayuba nɛ́gɔ̃gbɛ̃nɔ kũ a nɛ́nɔgbɛ̃nɔ tɛn pɔ́ ble òtɛn sèwɛ̃ mi ń vĩ̀ni bɛa.

¹⁴ Akũ gbɛ̃ke sù Ayuba kĩnaa à pì: Zùnɔ tɛn bú wí akũsɔ̃ zaakinɔ tɛn sɛ̃̀ ble ń sarɛ,

¹⁵ akũ Sɛbanɔ lɛ̀tɛḿma ò ń sɛ́tɛ ò tà kũńwo, ò ń dã̀rinɔ dɛ̀dɛ kũ fɛ̃nɛdao. Makũ mɛ́ ma bo mado ma su a baaru kpánnɛ.

¹⁶ Adi yã o à làkaro, akũ gbɛ̃ pãnde sù à pì: Sura pɛ̀tɛ n sã kpàsanɔa ò tɛ́ kũ̀, pɔ́dãrinɔ gàga. Makũ mɛ́ ma bo mado ma su a baaru kpánnɛ.

¹⁷ Adi yã o à làkaro, akũ gbɛ̃ pãnde sù à pì: Kaladianɔ kɔ̃ kpàatɛtɛ gã̀ aakɔ̃ ò sù ò lɛ̀tɛ n lakuminɔa ò ń sɛ́tɛ ò tà kũńwo, ò ń dã̀rinɔ dɛ̀dɛ kũ fɛ̃nɛdao. Makũ mɛ́ ma bo mado ma su a baaru kpánnɛ.

¹⁸ Adi yã o à làkaro, akũ gbɛ̃ pãnde sù à pì: N nɛ́gɔ̃gbɛ̃nɔ kũ n nɛ́nɔgbɛ̃nɔ tɛn pɔ́ ble òtɛn sèwɛ̃ mi ń vĩ̀ni bɛa,

¹⁹ akũ zàga'ĩa gbãna kàka à bò gbárannan à sù ń kpɛ́ kusuru siikɔ̃nɔa, akũ à lɛ̀tɛ à sì nɛ́ pìnɔa ò gàga. Makũ mɛ́ ma bo mado ma su a baaru kpánnɛ.

²⁰ Akũ Ayuba fùtɛ à a uta gà à kɛ̃̀ à a mìi bò. Akũ à wùtɛ a gbɛrɛa à donyĩ kɛ̀ Ludanɛ

²¹ à pì: Ma bo ma da gbɛrɛn ɔkori akũsɔ̃ mani ɛra mà tá ɔkori. Dikiri kpàma akũ à ɛ̀ra à sìma. Ò Dikiri sáabu kpá.

²² Yã pìnɔ gũn pínki Ayuba dí durunna kɛ à Luda taari èro.

« Vorige

Volg ons:

Geborgde skakels

Advertensies