2 TIMƆTI 1 - Bisã Bible 2005

Pɔlu tɛ́kpana Timɔtigu

¹ Makũ Pɔlu, Kirisi Yesu zĩ̀rii Luda pɔyenyĩnaa gũn wɛ̃̀ndi kũ à a lɛ́ sɛ̀ Kirisi Yesu gũn yã musu,

² makũ mɛ́ ma takada dí kɛ̃̀nnɛ, ma nɛ́ yenyĩde Timɔti. De Luda kũ ó Dikiri Kirisi Yesuo gbɛ̃kɛ kɛnnɛ kũ sùruuo, à n gba aafiaa.

³ Ma sáabu kɛ̀ ma dizinɔ Ludanɛ kũ madì doi kũ nɛ̀sɛpurao, zaakũ n yã dìgɔ̃ dɔmagu lakanaa sari ma aduakɛna gwãani kũ fãnantɛ̃oo gũn.

⁴ Tó wɛ́tɛ̃ kũ à bòmma yã dɔ̀magu, madì n bɛgɛ kɛmɛ, madìgɔ̃ ye ò wɛ́ sikɔ̃lɛ, de ma pɔnna kɛ zɔ̃kɔ̃.

⁵ N ludanaanikɛna kũ nɛ̀sɛ mɛ̀n doo yã dɔmagu. N dai Loisi kũ n da Yunisio Luda náani kɛ̀ lɛ se, akũsɔ̃ má dɔ̃ sãnsãn kũ ntɛn kɛ lɛ se.

⁶ Abire yãi matɛn dɔngu, ǹ futɛ ǹ zɛ kũ gba kũ Luda dànnɛo gɔrɔ kũ ma ɔ nàmma,

⁷ zaakũ Nini kũ àdi ó gba gbãna kũ yenyĩo kũ zĩdakũnadɔ̃naaon Luda kpàwá, adi kɛ nini vĩnadenlo.

⁸ Abire yãi ǹsun wé'i kũ kũ ó Dikiri yã onnɛnaaoro. Ǹsun wé'i kũ kũ ma yãoro, makũ kũ ò ma da kpɛ́siran Kirisi yãi. Ǹ wari kũ òdi kɛ a baaru nna kpana yãi kɛ kũmao kũ Luda gbãnao.

⁹ Àkũ mɛ́ à ó sura bà, à ó sísi o gɔ̃ a pɔ́ ũ. Adi kɛ yã kũ o kɛ̀ yãinlo, a zĩda pɔyenyĩna yãimɛ kũ gbɛ̃kɛ kũ à kɛ̀wɛrɛo zaade gɔrɔ dí naaro.

¹⁰ Gbɛ̃kɛ pìi bò gupuraa ó Surabari Kirisi Yesu pì sunaa gũn sà. À ga gbãna kàkatɛ, à wɛ̃̀ndi kũ mɛ̀vãnasarioo bòwɛrɛ gupuraa a baaru nna kũ òdi kpá gũn.

¹¹ Luda ma ditɛ a zĩ̀ri ũ, de mà baaruu pìi kpàkpa kɛ mà a yã dańnɛ.

¹² Abire yãin matɛn wari dí kɛi, ama wé'i dì ma kũro, zaakũ má gbɛ̃ kũ ma a náani kɛ̀ dɔ̃, akũsɔ̃ má dɔ̃ sãnsãn kũ ani fɔ̃ à yã kũ à nàmɛnɛ ma ɔĩ dãkpã ari a sugɔrɔ zĩ.

¹³ Ǹgɔ̃ yã kũ n mà ma lɛ́n ari a zĩniaa pì kũna yãzɛdedannɛna ágba ũ kũ ludanaanikɛnaao kũ yenyĩ kũ ó vĩ Kirisi Yesu gũnwo.

¹⁴ Ǹ yã mana kũ Luda nànnɛ n ɔĩ kũ gbãna kũ a Nini kũ à kú ó gũn gbãnao.

¹⁵ Ń dɔ̃ kũ Asia bùsudenɔ ma zukũna ń pínki. Figɛlu kũ Ɛmɔgɛnɛo kú ń tɛ́.

¹⁶ Dikiri wɛ̃nda dɔ̃ Ɔnɛsifɔru bedenɔnɛ! Zaakũ à sù à ma nɛ̀sɛ kpatɛnamɛnɛ lɛ́ vĩro, adi wé'i kũ kũ ma dana kpɛ́siran yãoro.

¹⁷ Kũ à sù Romu gɔ̃̀nɔ, à ma wɛtɛ ari à gɛ̀ɛ à bòma.

¹⁸ Dikiri wɛ̃nda dɔ̃nɛ yãkpatɛkɛgɔrɔ zĩ. Ń kpányĩ zɔ̃kɔ̃ kũ à kɛ̀mɛnɛ zaa Ɛfesu yã dɔ̃ sãnsãn.