2 TƐSALONIKADENƆ 1 - Bisã Bible 2005

Yãkpatɛkɛna Kirisi sugɔrɔa

¹ Makũ Pɔlu kũ Silasio kũ Timɔtio, ókɔ̃nɔ mɛ́ o takada díkĩna kɛ̃̀ Tɛsalonika sɔsi gbɛ̃ kũ ò kú Luda ó De kũ Dikiri Yesu Kirisioo gũnnɔnɛ.

² De Luda kũ Dikiri Yesu Kirisio gbɛ̃kɛ kɛárɛ, à á gba aafiaa.

³ Ó gbɛ̃nɔ, à kũ̀ ògɔ̃ Luda sáabu kpá á yã musu gɔrɔ sĩnda pínki, lákũ à mana nà, zaakũ á ludanaanikɛna tɛn gɛ́ arɛ manamana, akũsɔ̃ yenyĩ kũ á baadi vĩ kũ kɔ̃o tɛn kara.

⁴ Abire yãi odì lɛ́ gbɛ̃ á yã musu Luda sɔsinɔ gũn, lákũ átɛn wɛ́tãmmana kũ wari pínkio fɔ̃ nà kũ mɛnao kũ ludanaanikɛnaao.

⁵ Abire mɔ̀wɛrɛ kũ Luda dì yã gɔ̃gɔ̃ kũ gbɛ̃nɔ a zɛ́amɛ. Abire yãi a ka à gɛ̃ kpata kũ à bò Luda kĩnaa gũn kũ átɛn wari kɛ a yãi.

⁶ Luda dì yã kɛ a zɛ́amɛ. Ani wɛ́ tã gbɛ̃ kũ òtɛn wɛ́ tãáwanɔa,

⁷ ani ákɔ̃nɔ kũ òtɛni wɛ́ tãáwanɔ gba ĩampaki kũ ókɔ̃nɔ, tó Dikiri Yesu bò ludambɛ kũ a malaika gbãnanɔ

⁸ kũ tɛ́vuraao. Ani wɛ́ tã ludadɔ̃risari kũ odi ó Dikiri Yesu baaru nna síronɔa.

⁹ Kakatɛna lakanasarin Luda ni wɛ́ tãoḿma. Oni ń kpakɛ Dikiri arɛ kũ a gbãna gakurideo.

¹⁰ Tó à sù gɔrɔ pì zĩ, ani tɔ́ bo a gbɛ̃nɔ yã musu, gbasa a náanikɛrii pìnɔ a mana bo ń pínki. Anigɔ̃ kú ń tɛ́, zaakũ a yã kũ o òárɛ sì.

¹¹ Abire yãin odìgɔ̃ adua kɛárɛ baala'i, de ó Luda tó á kunna ká gwena kũ à á sísia, à yã mana kũ a zɛ kũ a kɛnaaonɔ kũ zĩ kũ átɛn kɛ a náanikɛnaa gũnnɔ pínki papaárɛ kũ a gbãnao.

¹² Dikiri Yesu tɔ́ ni bo á musu, ákɔ̃nɔ sɔ̃ á tɔ́ ni bo a musu ó Luda kũ Dikiri Yesu Kirisi pìio gbɛ̃kɛ yãi.