2 SAMUƐLI 8 - Bisã Bible 2005

Dauda zĩ̀blena buri kenɔa

¹ Abire gbɛra Dauda zĩ̀i blè Filisitininɔa à ń búsa à ń wɛ́ra Gata sìḿma.

² À zĩ̀i blè Mɔabunɔa, akũ à tò ò wùtɛ kɔ̃ sarɛ zĩtɛ. À bàa yɔ̃̀ḿma. Tó à bà pla daguraa dɛ̀dɛ, àdi bà do dagura tó bɛ̃nɛ. Akũ Mɔabunɔ gɔ̃̀ Dauda zɔ̀blerinɔ ũ, akũ òdigɔ̃ táfe bonɛ.

³ Dauda zĩ̀i blè Reobo nɛ́ Adadɛza, Zoba kínaa, gɔrɔ kũ kína pìi ɛ̀ra àtɛn gɛ́ ɔ tɔ̃ Yuflati swasarɛdenɔa.

⁴ Akũ à a sɔ̃gonɔ kũ̀kũ mɛ̀n wàa sɔɔro kũ sɔ̃godenɔ gbɛ̃nɔn dúbu suppla kũ gbɛ̃ kũ ò tɛ́ gɛ̀sɛnɔ gbɛ̃nɔn dúbu baro. Akũ à ń sɔ̃nɔ gbátĩnɔ zɔ̃̀zɔ̃ pínki, mɛ̀n basɔɔro mɛ́ ò bò.

⁵ Siria kũ ò kú Damasukunɔ sù Adadɛza leo, akũ Dauda ń gbɛ̃nɔ dɛ̀dɛ dúbu baro awɛɛpla.

⁶ À gudãkpãrinɔ dìtɛditɛ Siria bùsun, akũ ò gɔ̃̀ a zɔ̀blerinɔ ũ, òdigɔ̃ táfe bonɛ. Dikiri tò Dauda zĩ̀i blè gu kũ à gɛ̀ɛn pínki.

⁷ Dauda Adadɛza ìbanɔ wura sɛ̃gbakonɔ sɛ̀tɛ à tào Yurusalɛmu.

⁸ À mɔ̀gotɛ̃ sɛ̀tɛ dasidasi Adadɛza wɛ̃tɛ kũ òdi pi Teba kũ Berotaioo gũn.

⁹ Kũ Amata kína Tohu mà Dauda zĩ̀i blè Adadɛza zĩ̀karinɔa ń pínki,

¹⁰ akũ à a nɛ́ Adoramu zĩ̀ fɔ kpáa. À a sáabu kpà zĩ̀ kũ à blè Adadɛzaa yãi, zaakũ Tohu zĩ̀i kà kãao yã. Adoramu sù kũ wura pɔ́nɔ kũ andurufu pɔ́nɔ kũ mɔ̀gotɛ̃ pɔ́nɔ,

¹¹ akũ kína Dauda kàtɛ Dikiri pɔ́ ũ lákũ à kɛ̀ kũ buri kũ à gbãna blèḿmanɔ andurufu pɔ́nɔ kũ wura pɔ́nɔ nà pínki,

¹² Ɛdɔmunɔ kũ Mɔabunɔ kũ Amɔninɔ kũ Filisitininɔ kũ Amalɛkinɔ. Lɛn à kɛ̀ lɛ kũ pɔ́ kũ à sì Zoba kína Adadɛza, Reobo nɛ́aao.

¹³ Lɛn Dauda tɔ́ bò lɛ. Kũ à zĩ̀i blè Sirianɔa à sù, à Ɛdɔmunɔ dɛ̀dɛ Guvutɛ Wisiden gbɛ̃nɔn dúbu baro plansari.

¹⁴ Akũ à gudãkpãrinɔ dìtɛditɛ Ɛdɔmu bùsun dɔ, akũ Ɛdɔmu pìnɔ gɔ̃̀ a zɔ̀blerinɔ ũ. Gu kũ Dauda gɛ̀ɛn pínki Dikiri dì tó à zĩ̀ blemɛ.

¹⁵ Daudamɛ Isaraila buri sĩnda pínki kína ũ, à yã mana kɛ̀ a gbɛ̃nɔnɛ a zɛ́a.

¹⁶ Zeruya nɛ́ Yoabumɛ zĩ̀karinɔ gbɛ̃ zɔ̃kɔ̃ ũ. Ailudi nɛ́ Yosafatamɛ baarukpari ũ.

¹⁷ Aitubu nɛ́ Zadɔki kũ Abiata nɛ́ Aimɛlɛkioomɛ sa'orikinɔ ũ. Serayamɛ takadakɛ̃ri ũ.

¹⁸ Yoyada nɛ́ Bɛnayamɛ dogarinɔ gbɛ̃ zɔ̃kɔ̃ ũ. Dauda zĩda nɛ́gɔ̃gbɛ̃nɔmɛ a kpàasinɔ ũ.