2 SAMUƐLI 6 - Bisã Bible 2005

Suna kũ Dikiri àkpatiio Yurusalɛmu

¹ Dauda ɛ̀ra à Isaraila kũ à ń sɛ́tɛnɔ kàkara gbɛ̃nɔn dúbu baraakuri.

² Akũ à fùtɛ à dà kũńwo zɛ́n, ò gɛ̀ɛ Baala kũ à kú Yudanɔ bùsun, de ò Luda àkpati sɛ́ ò suo. Dikiri Zĩ̀karide dìgɔ̃ vutɛna kín àkpatii pì malaika dɛ̀mbɛrɛdenɔ dagura, abire yãin òdi pi a tɔ́ kúa.

³ Ò àkpatii pìi dà zùgo dufu gũn Abinadabu bɛ sĩ̀sĩi musu, akũ ò dào zɛ́n. Abinadabu nɛ́nɔ Uza kũ Ahioo mɛ́ òtɛn do zùgo pìii,

⁴ Luda àkpati kún. Ahio mɛ́ à tɛ́ arɛ,

⁵ akũ Dauda kũ Isarailanɔ tɛn ũ wã ń pínki Dikiri arɛ ń gbãna zaka lɛ́n kũ lɛ̀sinaao. Òtɛn mɔrɔ lɛ́ kũ gidigboo kũ sɛ̃gɛ̃sɛ̃gɛ̃o kũ fakao kũ sɛ̃̀gɛ̃ɛo.

⁶ Kũ ò kà Nakɔ̃ ésegbɛ̃kia, zùnɔ gɛ̃̀ɛ sì, akũ Uza ɔ bò à nà Luda àkpatiia.

⁷ Akũ Dikiri pɔ fɛ̃̀i, à a lɛ̀ a dɛ̀ àkpatii sarɛ gwe dà kũ à kɛ̀ yãi.

⁸ Dauda nɛ̀sɛɛ yàka, kũ Dikiri pɔ fɛ̃̀ Uzai yãi, akũ òdi gu pì sísi Pɔfɛ̃'uzai ari kũ a gbãrao.

⁹ Zĩ birea vĩna Dauda kũ̀ Dikiri yã musu à pì: Deran mani kɛ nà mà Dikiri àkpati sɛ́ mà táoo?

¹⁰ Akũ adi we à táo a wɛ̃tɛ gũn doro, à lìtɛ à tào Gata gbɛ̃ Ɔbɛdi Ɛdɔmu bɛa.

¹¹ Dikiri àkpati kú a bɛa ari mɔ aakɔ̃, akũ Dikiri arubarikaa dàn kũ a bedenɔ ń pínki.

¹² Ò pì kína Daudanɛ: Dikiri arubarikaa dà Ɔbɛdi Ɛdɔmu bedenɔgu kũ pɔ́ kũ à vĩnɔ pínki a àkpati yãi. Akũ Dauda gɛ̀ɛ gwe, à Luda àkpatii sɛ̀ àtɛn suo a wɛ̃tɛ gũn kũ pɔnnao.

¹³ Kũ gbɛ̃ kũ ò Dikiri àkpati sɛnanɔ gbá sɛ̀ gɛ̃̀n suddo, akũ Dauda sa ò kũ zùsaao kũ zùnɛ bɔ̀rɔ mɛ̀kpanaao.

¹⁴ Dauda sa'o'uta dana, àtɛn ũ wã Dikiri arɛ a gbãna zaka lɛ́n.

¹⁵ Àpii kũ Isarailanɔ pínki òtɛn su kũ Dikiri àkpatiio, òtɛn pɔnna wiki lɛ́ òtɛn kuru pɛ́.

¹⁶ Kũ Dikiri àkpati tɛn gɛ̃ Dauda wɛ̃tɛ gũn, akũ Solu nɛ́ Mikala tɛn zĩtɛ gwa wondoo gũn. Kũ à è kína Dauda tɛn vĩvĩ àtɛn ũ wã Dikiri arɛ, à a gya bò a swɛ̃̀ɛ gũn.

¹⁷ Kũ ò sù kũ Dikiri àkpatiio, ò dìtɛ a gbɛ̀n bizakuta kũ Dauda dɔ̀nɛɛ gũn. Akũ à sa'opɔ kũ òdi ká tɛ́n à tɛ́ kũ ò Dikiri arɛ kũ kɛnnakũkɔ̃o sa'opɔo.

¹⁸ Kũ à sa ò à làka, à sa mana ò gbɛ̃nɔnɛ kũ Dikiri Zĩ̀karide tɔ́o.

¹⁹ Akũ à burodii kpàatɛtɛ Isaraila kũ ò kakarana gwenɔnɛ kɔ̃̀nɔ dodo gɔ̃gbɛ̃nɔ kũ nɔgbɛ̃nɔ ń pínki kũ domina kàraao mɛ̀n dodo kũ geepi kàraao mɛ̀n dodo.

²⁰ Kũ Dauda tɛn su bɛ de à sa mana o a bedenɔnɛ, akũ Solu nɛ́ Mikala bò à gɛ̀ɛ à dàalɛ à pì: Mɔkɔ̃n Isarailanɔ kína, gbɛ̃ bɛ̀ɛrɛde yãn n kɛ̀ gwe gbãra yá? N n zĩda mɛ̀ɛ mɔ̀ n ìba nɔgbɛ̃ zĩkɛrinɔnɛ, lán wé'isaride dì a zĩda mɛ̀ɛ mɔńnɛ nà.

²¹ Akũ Dauda pì Mikalanɛ: Dikirin ma ũ wã̀nɛ. Dikiri mɛ́ à ma sɛ n de kũ a bedenɔ gɛ̃nɛ ũ, à ma kɛ a gbɛ̃ Isarailanɔ don'arɛde ũ.

²² Mani futa kũ de abirela, mani ma zĩda kĩa n enaa gũn, ama nɔgbɛ̃ zĩkɛri kũ ń tɛ́ḿma pìnɔ mɛ́ oni ma bɛ̀ɛrɛ dɔ̃.

²³ Akũ Solu nɛ́ Mikala dí nɛ́ iro ari à gɛ̀ɛ à gào.