Aanlyn Bybel

2 SAMUƐLI 5 - Bisã Bible 2005

Dauda kana Isarailanɔ kpatan

¹ Isarailanɔ sù ń buria ń pínki Dauda kĩnaa zaa Ɛblɔnu ò pì: Ó aru dokɔ̃nɔmɛ.

² Zaa zĩ gɔrɔ kũ Solu de ó kína ũ, mɔkɔ̃mmɛ ndì dowɛrɛ arɛ zĩ̀lan, gɛna kũ sunaao. Akũ Dikiri pìnnɛ, mɔkɔ̃mmɛ ĩnigɔ̃ de a gbɛ̃ Isarailanɔ don'arɛde ũ, ń kína ũ.

³ Kũ Isaraila gbɛ̃ zɔ̃kɔ̃nɔ sù kína Dauda kĩnaa zaa Ɛblɔnu ń pínki, gwen à lɛ́dokɔ̃nɔ kɛ̀n kũńwo Dikiri arɛ, akũ ò nísi kù a mìia ò a kà Isarailanɔ kpatan.

⁴ Dauda wɛ̃̀ baraakuri vĩ gɔrɔ kũ à nà kíblenaaa, à vùtɛ kín wɛ̃̀ bupla.

⁵ À de Yudanɔ kína ũ zaa Ɛblɔnu wɛ̃̀ suppla kũ mɔ suddoo, akũ à de Yudanɔ kũ Isarailanɔ pínki kína ũ zaa Yurusalɛmu wɛ̃̀ baraakuri awɛɛ'aakɔ̃.

⁶ Kína kũ a gbɛ̃nɔ gɛ̀ɛ Yurusalɛmu de à zĩ̀ ká kũ Yebusi kũ ò kú gwenɔ. Akũ ò ò Daudanɛ: Ĩni gɛ̃ laro, bee vĩ̀nanɔ kũ ɛrɛnɔ oni pɛ́mma. Òtɛn da Dauda ni le à gɛ̃ gwero.

⁷ Bee kũ abireo Dauda wɛ̃tɛ bĩnide kũ òdi pi dɔ Zaiɔ̃ pìi sì, akũ à gɔ̃̀ a wɛ́ra ũ.

⁸ Zĩ birea Dauda pì: Tó gbɛ̃ ye à Yebusinɔ dɛdɛ, séde à gɛ̃ ízɛ kũ ò yɔ̃̀ gbɛ̀n gũn, ani ɛrɛnɔ kũ vĩ̀naa pìnɔ le. Dauda ibɛrɛnɔmɛ. Abire yãi òdi pi, vĩ̀nanɔ kũ ɛrɛnɔ oni gɛ̃ kínabɛaro.

⁹ Akũ Dauda bɛ kũ̀ wɛ̃tɛ bĩnide pìi gũn, à a zĩda tɔ́ kpànɛ, Dauda Wɛ̃tɛ. À kpɛ́nɔ bòbo à lìkai ari gu kũ ò wɛ̀ɛɛ tàtan, òdi pi Milo.

¹⁰ Dauda gbãna tɛn kara, zaakũ Dikiri Luda Zĩ̀karide kú kãao.

¹¹ Taya kína Hiramu gbɛ̃nɔ zĩ̀ Daudaa kũ sida línɔ kũ lí'arinɔ kũ gbɛ̀'arinɔ, akũ ò bɛ bònɛ.

¹² Akũ Dauda dɔ̃̀ sà kũ Dikiri a ka Isarailanɔ kína ũmɛ, akũsɔ̃ à a kpataa kàraárɛ kũ Isarailanɔn de Dikiri gbɛ̃nɔ ũ yãi.

¹³ Dauda bona Ɛblɔnu gbɛra à ɛ̀ra à nɔ pãndenɔ sɛ̀ à kàra Yurusalɛmu dɔ kũ nɔ yìgisaridenɔ, akũ à nɛ́gɔ̃gbɛ̃nɔ kũ nɛ́nɔgbɛ̃nɔ ì kũńwo.

¹⁴ Nɛ́gɔ̃gbɛ̃ kũ à ń í Yurusalɛmu pìnɔ tɔ́n dí: Samua, Sobabu, Natã, Sulemanu,

¹⁵ Iba, Ɛlisua, Nɛfɛgi, Yafia,

¹⁶ Ɛlisama, Ɛliada kũ Ɛlifɛlɛtio.

¹⁷ Kũ Filisitininɔ mà ò Dauda kà Isarailanɔ kína ũ, akũ ò gɛ̀ɛ òtɛni a wɛtɛ ò a dɛ ń pínki. Kũ à ń baaruu mà, akũ à gɛ̀ɛ sɛ̃̀ntɛpɔrɔtu.

¹⁸ Filisitininɔ zĩ̀'ɔ pòro Rɛfaimu guvutɛn,

¹⁹ akũ Dauda gbɛ̀ka Dikiria à pì: Mà gɛ́ mà lɛ́tɛ Filisitininɔa, ĩni ń namɛnɛ ma ɔĩ yá? Akũ Dikiri wèa à pì: Ǹ gɛ́, mani ń nannɛ n ɔĩ.

²⁰ Akũ Dauda gɛ̀ɛ Baali Pɛrazimu, à zĩ̀i blèḿma gwe. Akũ à pì: Dikiri dòmɛnɛ arɛ, à bò à sù ma ibɛrɛnɔa bùi lákũ í dì gu fɔ̃ nà. Akũ à tɔ́ kpà gu pìinɛ Baali Pɛrazimu.

²¹ Filisitininɔ ń tãnanɔ tò gwe, akũ Dauda kũ a gbɛ̃nɔ sɛ̀tɛ ò tào.

²² Filisitininɔ ɛ̀ra ò sù dɔ, ò zĩ̀'ɔ pòro Rɛfaimu guvutɛn.

²³ Akũ Dauda ɛ̀ra à gbɛ̀ka Dikiria dɔ. Akũ Dikiri wèa à pì: Ǹsun gɛ́ńyĩ súsuro. Ǹ likańyĩ kpɛ kpa ǹ lɛ́tɛḿma kpɛ̃̀ líkpɛ sarɛ.

²⁴ Tó a gɛ̀sɛ kĩni mà lí pìnɔ musu, à kɛ likalika, zaakũ makũmɛ ma bo ma doárɛ arɛ gwe, de mà zĩ̀ bleárɛ Filisitini zĩ̀karinɔa yãi.

²⁵ Dauda kɛ̀ lákũ Dikiri ònɛ nà, akũ à zĩ̀i blè Filisitininɔa sɛna zaa Gibiɔ̃ ari à gɛ̀ɛ pɛ́ Gɛzaa.

« Vorige

Volg ons:

Geborgde skakels

Advertensies