2 SAMUƐLI 4 - Bisã Bible 2005

Isibosɛ dɛnaa

¹ Kũ Solu nɛ́ Isibosɛ mà Abana gà Ɛblɔnu, a kã gà, akũ Isarailanɔ gɔ̃̀ bídi gũn ń pínki.

² Solu nɛ́ pìi zĩ̀kari gbɛ̃ zɔ̃kɔ̃nɔ vĩ gbɛ̃nɔn pla, a do tɔ́n Baana, a do sɔ̃ Rekabu. Bero gbɛ̃ Rimɔ, Biliaminu buri nɛ́nɔmɛ. Ò Bero dìtɛ Biliaminu bùsu pɔ́ ũ yãmɛ,

³ zaakũ Berodenɔ bàa lɛ̀ ò tà Gitaimu ò kú gwe ari kũ a gbãrao.

⁴ Solu nɛ́ Yonatã sɔ̃ à nɛ́ vĩ ɛrɛ ũ. Gɔrɔ kũ nɛ́ pìi kà wɛ̃̀ sɔɔro, akũ Solu kũ Yonatão gana Yɛzɛrili baaruu sù. Kũ a gwàri a sɛ̀ àtɛn bàa lɛ́ kãao, a wãnaa gũnn nɛ́ pìi pìtia à lɛ̀tɛ. Abire mɛ́ à tò à ɛrɛ kũ̀. A tɔ́n Mɛfibosɛ.

⁵ Bero gbɛ̃ Rimɔ nɛ́ pìnɔ Rekabu kũ Baanao fùtɛ, ifãntɛ̃ gbãnai ò kà Isibosɛ bɛa, gɔrɔ kũ àtɛn i fãnantɛ̃ o.

⁶ Akũ Rekabu kũ a dakũna Baanao gɛ̃̀ kpɛ́n ò kɛ̀ lándɔ̃ òtɛn gɛ́ pɔ́blewɛ dã bà.

⁷ Kũ ò gɛ̃̀ kpɛ́n, Isibosɛ wutɛna a gádoa, akũ ò gɛ̃̀i kpɛ́nɛ gũn ò a zɔ̃̀ ò dɛ̀. Akũ ò a mìi zɔ̃̀ ò sɛ̀ ò tào. Ò pɛ̀tɛ Yoda sɛ̃̀n, akũ ò táa ò ari gu gɛ̀ɛ à dɔ̀o.

⁸ Ò sù Dauda kĩnaa Ɛblɔnu kũ Isibosɛ mìio ò pìnɛ: Ǹ gwa, n ibɛrɛ Solu kũ à wɛ̀tɛ à n dɛ nɛ́ Isibosɛ mìin dí. Ó dikiri kína, Dikiri fĩnaa bònnɛ Solu kũ a burinɔa gbãra.

⁹ Dauda wèḿma à pì: Dikiri kun! À ma bo ma warikɛnaa gũn pínki.

¹⁰ Kũ gbɛ̃ke sù ma kĩnaa Zikilaga yã à pì Solu gà, àtɛn da baaru nnan átɛn kpá, akũ ma a kũ̀ ma dɛ̀. A baaru àreen gwe.

¹¹ Dí deńla lákũ ákɔ̃nɔ gbɛ̃ vãninɔ a taarisaride dɛ̀ a gádoa a kpɛ́n nà. Mani a dɛna fĩna boáwa mà á wɛ̃̀ndi bo se.

¹² Akũ Dauda yã ò a gbɛ̃nɔnɛ, akũ ò ń dɛdɛ. Ò ń ɔla kũ ń gbálanɔ zɔ̃̀zɔ̃, akũ ò ń gɛ̀nɔ lòko Ɛblɔnu ítɔki sarɛ. Akũ ò Isibosɛ mìi sɛ̀ ò vĩ̀ Abana miran zaa Ɛblɔnu.