2 SAMUƐLI 21 - Bisã Bible 2005

Fĩnabona Gibiɔ̃denɔnɛ

¹ Nà kun Dauda gɔrɔa, à gìi kɛ̀ ari wɛ̃̀ aakɔ̃. Dauda Dikiri arɛ wɛ̀tɛ, akũ Dikiri pì: Solu yãimɛ. Gbɛ̃dɛyã wì a bɛ musu, kũ à Gibiɔ̃denɔ dɛ̀dɛ yãi.

² Akũ kína Gibiɔ̃denɔ sìsi à yã òńnɛ. Gibiɔ̃denɔn de Isarailanɔ ũro, Amɔri buri kũ ò gɔ̃̀nɔmɛ. Isarailanɔ la dàńnɛ yã ò pì oni ń dɛdɛro, akũ Solu wɛ̀tɛ à ń lakiti kɛ a aniakɛnaa Isarailanɔnɛ kũ Yudanɔ yãi.

³ Akũ Dauda Gibiɔ̃denɔ là à pì: Bɔ́n á ye mà kɛárɛɛ? Deran mani kútɛ kɛárɛ, de à le à Dikiri gbɛ̃nɔ sáabu kpáa?

⁴ Ò wèa ò pì: Ó zɛ́ vĩ ò andurufu ke wura gbɛka Solua ke a bedeanɔro, akũsɔ̃ ó zɛ́ vĩ ò Isaraila gbɛ̃ke dɛro. Akũ Dauda ń lá à pì: Átɛn pi deramɛɛ? Bɔ́n mani kɛárɛɛ?

⁵ Ò wèa ò pì: Gbɛ̃ kũ à ó dɛdɛ à lɛ́ kpàkũsũwái à ó láka de à le à ó buri bo Isarailanɔ gũn yãi,

⁶ tó ò a buri gɔ̃gbɛ̃ mɛ̀n supplanɔ kpáwá, óni ń loko lía Dikiri arɛ Gibɛa, kína Solu kũ Dikiri kàa pì bɛ wɛ̃tɛn. Akũ kína pì: Mani ń kpááwamɛ.

⁷ Kína dí Yonatã nɛ́ Mɛfibosɛ, Solu daikore kpáḿmaro, lɛ́ kũ ò kɛ̀ Dikiria lɛɛlɛ kũ Yonatão yãi.

⁸ À nɛ́gɔ̃gbɛ̃ gbɛ̃nɔn pla kũ Aya nɛ́nɔgbɛ̃ Rizipa ì kũ Soluoo sɛ̀. Ń tɔ́n dí: Amɔni kũ Mɛfibosɛo. À nɛ́gɔ̃gbɛ̃ gbɛ̃nɔn sɔɔro kũ Solu nɛ́nɔgbɛ̃ Mɛraba ì kũ Mɛɔla gbɛ̃ Bazilai nɛ́ Adiɛlionɔ sɛ̀ dɔ.

⁹ À ń ná Gibiɔ̃denɔnɛ ń ɔĩ, akũ ò ń loko lía sĩ̀sĩi musu Dikiri arɛ. Gbɛ̃nɔn suppla pìnɔ gà lɛɛlɛmɛ, ò ń dɛdɛ pɔ́ dúfu kɛkɛgɔrɔa.

¹⁰ Aya nɛ́ Rizipa uta kasanɔ sɛ̀ à kpàtɛ a zĩdanɛ gbɛ̀ɛa gwe. Zaa pɔ́ dúfu kɛkɛgɔrɔa ari legũ gɛ̀ɛ à gɛ̀ɛ pìnɔ gbɛ̃̀, àdigɔ̃ gí bãnɔnɛ ò diḿma fãnantɛ̃, àdigɔ̃ gí sɛ̃̀ntɛ nɔ̀bɔnɔnɛ ò nańyĩ gwãani.

¹¹ Ò yã kũ Solu nɔ yìgisaride pìi kɛ̀ɛ ò Daudanɛ,

¹² akũ à gɛ̀ɛ à Solu kũ a nɛ́ Yonatão wánɔ sɛ̀tɛ Yabɛsi Giliadadenɔ kia. À sù à lè ò ń gɛ̀nɔ sɛ̀tɛ kpãni Bɛtɛsã gãnulɛa, gu kũ Filisitininɔ ń loko bĩnia Solu dɛna Giliboa gbɛra.

¹³ Dauda tò ò ń gɛ̀wa pìnɔ sɛ̀tɛ ò tào, ò kàkara kũ gbɛ̃ kũ ò ń loko pìnɔ gɛ̀wanɔ,

¹⁴ akũ ò vĩ̀ Solu de Kisi miran Zɛla, Biliaminu burinɔ bùsun. Ò yã kũ kína dìtɛ kɛ̀ pínki, akũ Luda adua kũ ò kɛ̀ Isarailanɔ bùsu yã musu sì kũńwo.

Gbɛ̃ gbã̀nagbãnanɔ dɛdɛnaa

¹⁵ Filisitininɔ ɛ̀ra ò zĩ̀i kà kũ Isarailanɔ dɔ. Dauda kũ a gbɛ̃nɔ gɛ̀ɛ ò zĩ̀i kà kũńwo. Kũ Dauda gbãna làka,

¹⁶ akũ gbɛ̃ gbã̀nanɔ buri Isibi Bɛnɔbu pì áni Dauda dɛmɛ. A mɔ̀gotɛ̃ sári tìkisi de kiloo aakɔ̃la, à fɛ̃nɛda dufu lokona.

¹⁷ Akũ Zeruya nɛ́ Abisai kpài à Filisitini pìi dɛ̀. Akũ Dauda gbɛ̃nɔ la dànɛ ò pì: Ĩni gɛ́ kũoo zĩ̀lan doro, de ó Isarailanɔ fitila sún garo yãi.

¹⁸ Abire gbɛra òtɛn zĩ̀ ká kũ Filisitininɔ Gobu, akũ Usa gbɛ̃ Sibekai gbɛ̃ gbã̀na buri kũ òdi pinɛ Safa dɛ̀.

¹⁹ Zĩ̀i ɛ̀ra à fùtɛ kũ Filisitininɔ Gobu dɔ, akũ Bɛtilihamu gbɛ̃ Yairi nɛ́ Ɛlana Gata gbɛ̃ Gɔlaya dakũna Lami dɛ̀. Lami sári pá de lán bizatãri gòdo lí bàmɛ.

²⁰ Kũ òtɛn zĩ̀ ká kũńwo Gata dɔ, gbɛ̃ tìkisi ke kú gwe, a ɔnɛnɔ kũ a gbánɛnɔ mɛ̀n suddodomɛ, à kɛ̀ pínki baraasɔɔro donsari. Gbɛ̃ gbã̀nanɔ burimɛ dɔ.

²¹ À kùsɛɛ bìri Isarailanɔa, akũ Dauda vĩ̀ni Simɛa nɛ́ Yonatã a dɛ̀.

²² Gbɛ̃nɔn siikɔ̃ pìnɔ bi Gata gbɛ̃ gbã̀nanɔ burinɔmɛ. Dauda kũ a gbɛ̃nɔ mɛ́ ò ń dɛdɛ.