2 SAMUƐLI 19 - Bisã Bible 2005Yoabu kpãkɛ̃na Daudai 1 Ò pì Yoabunɛ: Kína tɛn ɔ́ɔ dɔ, àtɛn wɛ̃nda kɛ Abusalomu yã musu. 2 Zĩ birea zĩ̀karinɔ zĩ̀blena pɔnna lì wɛ̃ndakɛna ũ, zaakũ ò mà ò pì, kína nɛ̀sɛɛ yàka a nɛ́ yã musu. 3 Zĩ birea zĩ̀karinɔ gɛ̃̀ wɛ̃tɛn sɔrɔrɔsɔrɔrɔ lán gbɛ̃ kũ ò bàa lɛ̀ zĩ̀lan, wé'i ń kũnɔ bà. 4 Kína pɔ́ kù a ãnla, àtɛn wɛ̃nda ɔ́ɔ dɔ àtɛn pi: O'o ma nɛ́ Abusalomu! Abusalomu ma nɛ́! Ma nɛ́! 5 Akũ Yoabu gɛ̀ɛ à kína lè kpɛ́n à pì: N wé'i dà n gbɛ̃nɔa gbãra. Ò n bo gbãra kũ n nɛ́gɔ̃gbɛ̃nɔ kũ n nɛ́nɔgbɛ̃nɔ kũ n nɔnɔ kũ n nɔ yìgisaridenɔ. 6 N zãngurinɔn ń yeńyĩ, akũ ń zã n yenyĩdenɔgu. N mɔ̀wɛrɛ gbãra, ókɔ̃nɔ n zĩ̀kari gbɛ̃ zɔ̃kɔ̃nɔ kũ ó gbɛ̃nɔ ódi kánnɛ pɔ́ke ũro. Ma dɔ̃̀ sà, tó Abusalomu kun gbãra, akũ ókɔ̃nɔ o gaga ó pínki, abirekũ mɛ́ ani kɛnnɛ nna. 7 Ǹ futɛ ǹ bo sà. Ǹ gɛ́ ǹ n gbɛ̃nɔ nɛ̀sɛ kpátɛńnɛ. Ma sìnnɛ kũ Dikirio, tó ńdi gɛ́ro, ń gbɛ̃ke ni i kũnwo la gwãanialaro. Abirekũ ni kɛnnɛ vãni de yã vãni kũ à n le zaa n kɛfɛnnakɛgɔrɔa ari suna gbãrala. 8 Akũ kína fùtɛ à gɛ̀ɛ à vùtɛ bĩnilɛa. Kũ ò ò gbɛ̃nɔnɛ kína vutɛna gãnun, akũ ò sù ò zɛ̀ a arɛ ń pínki. Isarailanɔ bàa lɛ̀, baadi tà a bɛa. Dauda gbɛsɛnaa 9 Isaraila burinɔ tɛ́ pínki gbɛ̃nɔ tɛn lɛ́kpakɔ̃ana kɛ ò pì: Kína ó sí ó ibɛrɛnɔa à ó bó Filisitininɔ ɔĩ, akũ à bàa lɛ̀ à bò ó bùsun Abusalomu yãi. 10 O Abusalomu kà kpatan, akũ à gà zĩ̀lan. Bɔ́n átɛn dã kũ kína gbɛsɛnaaoo? 11 Kína Dauda gbɛ̃nɔ zĩ̀ sa'ori Zadɔkia kũ sa'ori Abiatao à pì: Yã kũ Isarailanɔ tɛn o pínki gɛ̃̀ ma sãn zaa ma kúkia la. À yã díkĩna gbɛka Yuda gbɛ̃ zɔ̃kɔ̃nɔa à pi: Bɔ́yãi a gɔ̃ kpɛ kũ ma gbɛsɛnaaoo? 12 Ma gbɛ̃nɔ, pɔ́ dokɔ̃nɔnɔn ó ũ, ó aru dokɔ̃nɔmɛ. À kɛ̀ dera a gìi kɛ̀ kũ ma gbɛsɛnaaoo? 13 Ǹ o Amasanɛ pɔ́ dokɔ̃nɔnɔn ó ũ, ó aru dokɔ̃nɔmɛ. Tó mádi tó à gɔ̃̀ ma zĩ̀karinɔ gbɛ̃ zɔ̃kɔ̃ ũ Yoabu gɛ̃nɛ ũ zaa gbãraro, Luda yã kɛmɛnɛ pãsĩpãsĩ. 14 A yã Yudanɔ swɛ̃̀ɛ blè, ń lɛ́ kɛ̀ dokɔ̃nɔ, akũ ò lɛ́gbãzã kɛ̀nɛ ò pì: Ǹ su kũ n gbɛ̃nɔ ń pínki. 15 Kína tɛn su, à kà Yodai, akũ Yudanɔ gɛ̀ɛ daalɛ zaa Giligala, de ò bikũ kãao swa pìia. 16 Gera nɛ́ Simɛi, Biliaminu buri kũ à kú Bahurimu wã̀ à gɛ́ da kína Daudalɛ kũ Yudanɔ. 17 Biliaminu burinɔn kú kãao gbɛ̃nɔn wàa sɔɔro. Solu bɛgwari Ziba gɛ̀ɛ dɔ kũ a nɛ́gɔ̃gbɛ̃ gbɛ̃nɔn gɛ̃ronɔ kũ a zĩkɛri gbɛ̃nɔn baronɔ. Ò wã̀ ò kà Yoda lɛ́a kína ã, 18 de ò le ò bikũ kũ kínabɛdenɔ, ò yã kũ ani kɛ kínanɛ nna kɛ yãi. Akũ Gera nɛ́ Simɛi wùtɛ kína arɛ ari àgɔ̃ gɛ́ bikũ Yodaa. 19 À pìnɛ: Ma dikiri, ǹsun ma taari yã daro. Yã vãni kũ makũ n zɔ̀bleri ma kɛ̀nnɛ gɔrɔ kũ n bo Yurusalɛmu sún dɔnguro. Ma dikiri kína, ǹsungɔ̃ yã pì kũna n swɛ̃̀ɛ gũnlo. 20 Makũ n zɔ̀bleri, má dɔ̃ kũ ma durunna kɛ̀. Yusufu burinɔ tɛ́ ń pínki, makũmɛ ma dońnɛ arɛ ma su danlɛ gbãra ma dikiri kína. 21 Akũ Zeruya nɛ́ Abisai pì: Simɛi kína kũ Dikiri kàa kàmɛ. Adi ká ò a dɛroo? 22 Akũ Dauda pì: Zeruya nɛ́nɔ, bɔ́n ó vĩ kɔ̃oo? Á ye à zɛ́ zɔ̃mɛnɛ gbãran yá? Óni gbɛ̃ke dɛ Isarailanɔ bùsun gbãraro, zaakũ má dɔ̃ gbãra kũ makũmɛ Isarailanɔ kína ũ. 23 Akũ kína pì Simɛinɛ: Ĩni garo. Akũ kína la dànɛ. 24 Solu daikore Mɛfibosɛ gɛ̀ɛ da kínalɛ. Zaa gɔrɔ kũ kína bò wɛ̃tɛn ari gɔrɔ kũ à sù aafia, Mɛfibosɛ dí a gbá pípiro, adi a yĩkã zɔ̃zɔ̃ro, adi a pɔ́nɔ pípiro. 25 Kũ à bò Yurusalɛmu à sù à dà kínalɛ nà, akũ kína a là à pì: Mɛfibosɛ, À kɛ̀ dera ńdi gɛ́ kũmaoroo? 26 À wèa à pì: Ma dikiri kína, ma zĩkɛri mɛ́ à ɔ̃ndɔ̃ kɛ̀mɛnɛ. Ma ònɛ à gàari yĩmɛnɛ ma zaakinɛ mà dia mà gɛ́ kũnwo, zaakũ ɛrɛɛn ma ũ. 27 Ma dikiri kína, akũ à gɛ̀ɛ à makũ n zɔ̀blerii yàka n kĩnaa. Ma dikiri kína ń de lán Luda malaika bàmɛ. Ǹ kɛ lákũ à kɛ̀nnɛ mana nà. 28 Ma dikiri kína, à de yã n ma de bedenɔ dɛ̀dɛ ń pínki, akũ n makũ n zɔ̀bleri baka kàkara kũ n gbɛ̃ kũ òdi pɔ́ ble lɛɛlɛnɔ. Má zɛ́ vĩ mà kútɛ ke kɛnnɛ doro. 29 Akũ kína pìnɛ: Yã kpaten ĩni o dɔɔ? Ma dìtɛ mɔkɔ̃n kũ Zibao, à zĩtɛ kpaatɛkɔ̃nɛmɛ. 30 Akũ Mɛfibosɛ pì kínanɛ: Ma dikiri kína, lákũ n su bɛ aafia nà, ǹ tó à sɛ́ pínki. 31 Giliada bùsu gbɛ̃ Bazilai bò Rogɛlimu à gɛ̀ɛ zɛ kínanɛ ari Yoda bara dire. 32 Bazilai zĩ kũ̀ manamana à kà wɛ̃̀ basiikɔ̃. À kína yàrii kɛ̀ gɔrɔ kũ à kú Manaimu, zaakũ aruzɛkɛde zɔ̃kɔ̃ɔmɛ. 33 Akũ kína pìnɛ: Ǹ bikũ kũmao, mani n gwa ma bɛa zaa Yurusalɛmu. 34 Bazilai wèa à pì: Wɛ̃̀ ũgba mɛ́ à gɔ̃̀mɛnɛ andunia gũn kũ mà tá kũnwo Yurusalɛmuu? 35 Ma ka wɛ̃̀ basiikɔ̃ kɔ̀. Má pɔ́ mana kũ a vãnio dɔ̃kɔ̃nɛ dɔ yá? Makũ n zɔ̀bleri mani fɔ̃ mà pɔ́ kũ ma blè ke í kũ ma mì nna ma dɔ yá? Mani gɔ̃gbɛ̃ ke nɔgbɛ̃ lɛ̀sirinɔ kòto ma dɔ yá? Ma dikiri kína, ǹ tó mà aso lagonnɛ. 36 Makũ n zɔ̀bleri óni Yoda bikũ lɛɛlɛ, mà zɛnnɛ kãnikãni gwe. À kɛ̀ dera ń ye ǹ fĩna bomɛnɛ lɛɛ? 37 Makũ n zɔ̀bleri, ǹ tó mà ɛra mà tá ma bɛ wɛ̃tɛn, de màsun ga ma de kũ ma da mirao zã̀ro yãi. Ǹ ma nɛ́ n zɔ̀bleri Kimamu gwa la. Ma dikiri kína, ǹ tó à bikũ kũnwo. Ǹ kɛnɛ lákũ à kɛ̀nnɛ mana nà. 38 Akũ kína pì: Kimamu ni bikũ kũmao. Mani yã kũ à kɛ̀nnɛ mana kɛnɛ, yã kũ n gbɛ̀kama sɔ̃ pínki mani kɛnnɛ. 39 Gbɛ̃ sĩnda pínki bikũ̀ Yodaa, akũ kína bikũ̀. Kína lɛ́ pɛ̀ Bazilaia à sa mana ònɛ, akũ Bazilai ɛ̀ra à tà bɛ. 40 Kũ kína bikũ̀ à gɛ̀ɛ Giligala, Kimamu bikũ̀ kãao. Yuda zĩ̀karinɔ ń pínki kũ Isaraila zĩ̀kari kpadonɔ kína bikũ̀. 41 Akũ Isaraila buri pínki sù ò kína lè ò pìnɛ: Bɔ́yãi ó gbɛ̃ Yudanɔ bikũ̀ kãáo kpãni, mɔkɔ̃n kũ n bedenɔ kũ n gbɛ̃nɔ pínkii? 42 Akũ Yudanɔ wèḿma ò pì: Kũ kína de ó danɛ ũ yãimɛ. Bɔ́yãi yã bire kɛ̀árɛ ĩnii? Ódi kína zàna blero, ódi a pɔ́ke sí ó pɔ́ ũro. 43 Akũ Isarailanɔ pì Yudanɔnɛ: Zaakũ ó buri lɛu kurimɛ, ó ɔ kú kũ kína Daudao de á pɔ́la. Bɔ́yãi a ó dítɛ futaa? Ókɔ̃nɔmɛ o kína gbɛsɛna yã ò káakuroo? Ama Yudanɔ wena pãsĩ de Isarailanɔ pɔ́la. |
Bisã Bible © SIM International, 2005.