2 SAMUƐLI 18 - Bisã Bible 2005

Abusalomu ganaa

¹ Dauda gbɛ̃ kũ ò kú kãaonɔ kàkara, akũ à gbɛ̃ zɔ̃kɔ̃nɔ dìtɛditɛ gbɛ̃nɔn wàa sɔsɔɔronɔnɛ kũ gbɛ̃nɔn basɔsɔɔronɔ.

² Akũ à a zĩ̀karii pìnɔ kpàatɛtɛ gã̀ aakɔ̃. À gã̀ do nà Zeruya nɛ́ Yoabunɛ a ɔĩ, a do sɔ̃ Yoabu dakũna Abisai ɔĩ, a do sɔ̃ Gata gbɛ̃ Itai ɔĩ. Akũ kína pì a zĩ̀karinɔnɛ: Makũmɛ mani doárɛ arɛ.

³ Akũ gbɛ̃nɔ pì: Ǹsun gɛ́ro. Tó o sù o bàa lɛ̀, oni ó yã daro. Bee tó ó gbɛ̃ kpadonɔ gàga, oni ó yã daro. Mɔkɔ̃n òtɛni n gwa de gbɛ̃nɔn dúbu kurinɔla. N kpanawái wɛ̃tɛ gũn mɛ́ à mana.

⁴ Akũ kína pìńnɛ: Lákũ à kɛ̀árɛ mana nàn mani kɛ. Kína gɛ̀ɛ à zɛ̀ bĩnilɛ sarɛ, akũ zĩ̀karinɔ bɔ̀tɛ gã̀ kũ gã̀ao gbɛ̃nɔn basɔsɔɔronɔ kũ gbɛ̃nɔn wàa sɔsɔɔronɔo.

⁵ Akũ kína yã dìtɛ Yoabunɛ kũ Abisaio kũ Itaio à pì: À kɛ kɛfɛnna Abusalomunɛ busɛbusɛ ma yãi. Zĩ̀karinɔ yã kũ kína dìtɛ gbɛ̃ zɔ̃kɔ̃nɔnɛ Abusalomu yã musu mà ń pínki.

⁶ Zĩ̀karinɔ bɔ̀tɛ ò gɛ̀ɛ lákpɛn, de ò zĩ̀ ká kũ Isarailanɔ, akũ ò sì kɔ̃ tɛ́ Ɛflaimu dàkon.

⁷ Dauda zĩ̀karinɔ zĩ̀i blè Isarailanɔa. Gbɛ̃ kũ ò gàga zĩ bireanɔn dasi, gbɛ̃nɔn dúbu baromɛ.

⁸ Zĩ̀i pìi dà bùsuu pìla pínki, akũ zĩ birea sɛ̃̀ntɛ gbɛ̃nɔ blè dasi de fɛ̃nɛdala.

⁹ Kũ Abusalomu kpàkũ kũ Dauda gbɛ̃nɔ, à dina baragbãsɔ̃ kpɛ. Akũ baragbãsɔ̃ pìi gɛ̀ɛ gbiri lí zɔ̃kɔ̃ gã̀nɔ gbáru, akũ a wakaa kpà lígãn gíngin, akũ a sɔ̃ pìi gɛ̃̀ zɛ́la, à gɔ̃̀ lokona lígãn gwe.

¹⁰ Kũ gbɛ̃ke a è, à gɛ̀ɛ à pì Yoabunɛ: Ma Abusalomu è lokona lígãn.

¹¹ Akũ Yoabu pì gbɛ̃ kũ à baaruu pìi kpàarɛnɛ: Bɔ́ɔɔ? N a è yá? Bɔ́yãin ńdi a lɛ́ n dɛ̀roo? De yã ma n gba andurufu kuri kũ zĩ̀ka'asaao.

¹² Akũ gbɛ̃ pìi wè Yoabua à pì: Bee tó ò andurufu wàa sɔɔro yɔ̃̀ ò kà ma ɔn, mani fɔ̃ mà ɔ pá kína nɛ́ pìiaro, zaakũ kína yã dìtɛnnɛ kũ Abisaio kũ Itaio ó sã mà, à pì ò kɛ kɛfɛnna Abusalomunɛ busɛbusɛ.

¹³ Tó ma a dɛ̀, de ma ásaru kɛ̀ ma zĩdanɛmɛ. A ke utɛna kínanɛro, mɔkɔ̃n sɔ̃ ĩni zɛ kũmaoro.

¹⁴ Yoabu pì: Mani n dã doro. Akũ à sári sɔ̃ntɛ sɛ̀ mɛ̀n aakɔ̃, à gɛ̀ɛ à Abusalomu zɔ̃̀o a swɛ̃̀n gɔrɔ kũ à lokona lígãn bɛ̃nɛ.

¹⁵ Akũ Yoabu zĩ̀kapɔnɔsɛri gbɛ̃nɔn kurinɔ lìkai ò a dɛ̀.

¹⁶ Akũ Yoabu kuru pɛ̀ à a zĩ̀karinɔ dã̀dã, akũ ò kámma bò kũ pɛtɛna Isarailanɔiio.

¹⁷ Ò Abusalomu gɛ̀ɛ sɛ̀ ò zù wɛ̀ɛ zɔ̃kɔ̃ɔ gũn lákpɛn gwe, akũ ò gbɛ̀ɛ kàkaraa, à gɔ̃̀ gbɛ̀didikɔ̃ana zɔ̃kɔ̃ ũ. Isarailanɔ sɔ̃ ò bàa lɛ̀, ń baadi tà a bɛa.

¹⁸ Gɔrɔ kũ Abusalomu kun, à gbɛ̀ɛ pɛ̀tɛ a zĩdanɛ Kína guvutɛn, zaakũ à pì á nɛ́gɔ̃gbɛ̃ vĩro, akũ á ye a tɔ́ garo. À a zĩda tɔ́ kpà gbɛ̀ kũ à pɛ̀tɛ pìinɛ, akũ òdigɔ̃ gwe sísi Abusalomu Dɔngupɔ ari kũ a gbãrao.

Dauda Abusalomu ga baarumanaa

¹⁹ Zadɔki nɛ́ Aimaza pì: Ǹ tó mà bàa lɛ́ mà gɛ́ baaru kpá kínanɛ, lákũ Dikiri yã nna kpàa nà à a bò a ibɛrɛnɔ ɔĩ.

²⁰ Akũ Yoabu pìnɛ: Ĩni le ǹ baaru kpá gbãraro, sé gɔrɔ pãnde zĩ. Gbãra pɔ́ dín ĩni kpáro, kũ kína nɛ́ gà yãi.

²¹ Akũ Yoabu pì Etiopia burinɛ: Ǹ gɛ́ ǹ yã kũ n è o kínanɛ. Akũ Etiopia buri pìi kùtɛ Yoabunɛ à fùtɛ kũ bàao.

²² Zadɔki nɛ́ Aimaza ɛ̀ra à pì Yoabunɛ: Bee deramɛɛ, ǹ tó mà bàa lɛ́ màgɔ̃ tɛ́ Etiopia buri pì kpɛ. Akũ Yoabu pìnɛ: Nɛ́, bɔ́yãi ń ye ǹ gɛ́ɛ? Baaruu pì nigɔ̃ àre vĩnnɛro.

²³ Akũ Aimaza pì: Bee deramɛɛ, má ye mà gɛ́mɛ. Akũ Yoabu pìnɛ: Ǹ gɛ́! Akũ à bàa lɛ̀ à gɛ̀ɛ à bɔ̀tɛ kũ swa sarɛ zɛ́o, à Etiopia buri pìi kɛ̃̀.

²⁴ Dauda vutɛna wɛ̃tɛ bĩnilɛ gbà mɛ̀n planɔ dagura. Gudãkpãrii dìdi bĩnia ari gãnu pìi musu. Kũ à wɛ́ zù, à gbɛ̃ke è à tɛ́ kũ bàao.

²⁵ À lɛ́ zù kínai à ònɛ. Akũ kína pì: Lákũ à tɛ́ ado nà, àtɛn su kũ baaru nnaomɛ. Kũ àtɛn su, à kà kãni.

²⁶ Akũ gudãkpãrii pì gbɛ̃ pãnde è dɔ, àtɛn bàa lɛ́. À lɛ́ zù zɛ́dãkpãriii à pì: Gbɛ̃ pãnde tɛ́ a kpɛ dire kũ bàao, àtɛn su dɔ. Akũ kína pì: Àtɛn su kũ baaru nnaomɛ dɔ se.

²⁷ Akũ gudãkpãrii pìi pì: Ma è gbɛ̃ káaku bàasina de lán Zadɔki nɛ́ Aimaza bàasinaa bà. Akũ kína pì: Gbɛ̃ manamɛ, baaru nnan àtɛn suo.

²⁸ Aimaza lɛ́ zù kínai à pì: Aafia kun! Akũ à kùtɛ kínanɛ à mìi pɛ̀tɛ zĩtɛ à pì: Ò Dikiri n Luda sáabu kpá, à gbɛ̃ kũ ò kùsɛɛ bìrimmanɔ kpàmma, ma dikiri kína.

²⁹ Akũ kína a là à pì: Kɛfɛnna Abusalomu kun kũ aafiaao yá? Aimaza wèa à pì: Kũ Yoabu tɛni n zɔ̀bleri zĩ kũ makũ n zɔ̀bleriio, ma mà zuka fùtɛ manamana, ama má dɔ̃ tó bɔ́ mɛ́ à sùro.

³⁰ Kína pì: Ǹ zɛ kpado la gĩa. Akũ à zɛ̀ gwe.

³¹ Kũ Etiopia buri sù, à pì: Ma dikiri kína, ma sunnɛ kũ baaru nnaomɛ. Dikiri yã nna kpàmma gbãra, à n bo gbɛ̃ kũ ò bò n kpɛnɔ ɔĩ.

³² Akũ kína a là à pì: Kɛfɛnna Abusalomu kun kũ aafiaao yá? Etiopia buri pìi wèa à pì: Ma dikiri kína, Luda tó n ibɛrɛnɔ kũ gbɛ̃ kũ ò fùtɛ òtɛn wari dɔmmanɔ gɔ̃ lán kɛfɛnna pìi bà.

³³ Swɛ̃̀ɛ kɛ̃̀ kínagu, à dìdi à gɛ̃̀ kpɛ́ kũ à kú gãnu pìi musu, akũ à ɔ́ɔ dɔ̀ gwe. Gɔrɔ kũ àtɛn didi gwe à pì: O'o ma nɛ́ Abusalomu! Ma nɛ́ Abusalomu! Ma gana n gɛ̃nɛ ũ sã̀na yã! Abusalomu ma nɛ́! Ma nɛ́!