Aanlyn Bybel

2 SAMUƐLI 15 - Bisã Bible 2005

Abusalomu bona Dauda kpɛ

¹ Abire gbɛra Abusalomu sɔ̃go lè a zĩdanɛ kũ sɔ̃nɔ kũ gɔ̃gbɛ̃nɔ gbɛ̃nɔn bupla akuri kũ onigɔ̃ bàa lɛ́ a arɛnɔ.

² Àdi futɛ kɔnkɔkɔnkɔ àgɔ̃ zɛna bĩnilɛ sarɛ. Tó gbɛ̃ yã vĩ kũ a gbɛ̃dakeo àtɛn gɛ́o kína kĩnaa à kɛkɛnɛ, Abusalomu dì ade sísi à pinɛ: Wɛ̃tɛ kpaten n bonn? Tó à wèa à pì: Makũ n zɔ̀bleri ma bo Isaraila buri dí gũmmɛ,

³ akũ Abusalomu dì pinɛ: N yã nnamɛ, à zɛ́ vĩ, ama kína gbɛ̃ke kun à sã kpá n yãiro.

⁴ Abusalomu dì ɛra à pi: Tó ò ma kɛ yãkpatɛkɛri ũ ó bùsun, gbɛ̃ kũ à yã vĩ ke gbɛ̃ kũ àtɛn gbɛ̃ gbɛka yãkpatɛkɛkia ń pínki anigɔ̃ su ma kĩnaa, manigɔ̃ a yã kɛkɛnɛ a zɛ́a.

⁵ Tó gbɛ̃ sù à kùtɛ a arɛ, àdi ɔ bo à ade kũ à lɛ́ pɛ́a.

⁶ Lɛn àdigɔ̃ kɛ lɛ Isaraila kũ òtɛn su yãkpatɛ kɛ kína kĩnaanɔnɛ ń pínki, akũ ń swɛ̃̀ɛ tà a kpa.

⁷ Wɛ̃̀ siikɔ̃ gbɛra à pì kínanɛ: Ǹ ma gba zɛ́ mà gɛ́ la kũ ma dà Dikirinɛ sa o zaa Ɛblɔnu.

⁸ Makũ n zɔ̀bleri ma lɛ́ pìi gbɛ̃̀nɛ gɔrɔ kũ má kú Gesuru, Siria bùsun ma pì: Tó Dikiri tò ma su Yurusalɛmu, mani sa oa Ɛblɔnumɛ.

⁹ Kína pìnɛ: Ǹ gɛ́ ǹ su aafia! Akũ à fùtɛ à gɛ̀ɛ Ɛblɔnu.

¹⁰ À gbɛ̃nɔ zĩ̀ Isaraila burinɔ kĩnaa pínki à pì: Tó a kuru'ũ mà dɔ, à pi Abusalomu mɛ́ à kí blè Ɛblɔnu.

¹¹ Gɔrɔ kũ àtɛn futɛ Yurusalɛmu à gbɛ̃nɔ sìsi gbɛ̃nɔn wàa do ò gɛ́ kãáo, akũ ò gɛ̀ɛ kũ nɛ̀sɛ mɛ̀n doo, ò yã pìi asiri dɔ̃ro.

¹² Gɔrɔ kũ àtɛn sa o, à Gilo gbɛ̃ Aitofɛli, Dauda lɛ́dammarii sìsi zaa a bɛ wɛ̃tɛn, akũ lɛ́kpakũsũna Daudai tɛn kara. Gbɛ̃ kũ ò kú kũ Abusalomuonɔ dasi tɛn kara.

Dauda bàasinaa

¹³ Baarukparii sù à pì Daudanɛ: Isarailanɔ swɛ̃̀ɛ tà Abusalomua.

¹⁴ Akũ Dauda pì a ìba kũ ò kú kãao Yurusalɛmunɔnɛ: À futɛ ò bàa lɛ́. Tó ódi kɛ lɛro, óni le ò bo Abusalomu ɔĩro. Ò kɛ likalika. Tó ódi kɛ likalikaro, ani ó le la, ani ó ásaru kɛ, ani wɛ̃tɛdenɔ dɛdɛ kũ fɛ̃nɛdao.

¹⁵ Kína ìbanɔ pìnɛ: Ó dikiri kína, yã kũ n zɛo pínki, ókɔ̃nɔ n zɔ̀blerinɔ o lakamɛ.

¹⁶ Akũ kína dà zɛ́n. A bedenɔ bò ò tɛ̀i ń pínki, ama à a nɔ yìgisaride mɛ̀n kurinɔ tò gwe ògɔ̃ bɛ gwa.

¹⁷ Kína dà zɛ́n lɛ kũ a gbɛ̃nɔ. Kũ ò kà wɛ̃tɛ kpɛ, à lìtɛ à zɛ̀.

¹⁸ Akũ a ìbanɔ pínki kũ a dogarinɔ kũ Gatadenɔ gbɛ̃nɔn wàa aakɔ̃ kũ ò tɛ́i zaa Gatanɔ gɛ̃̀tɛ ń pínki.

¹⁹ Akũ kína pì Gata gbɛ̃ Itainɛ: Bɔ́yãi ntɛn gɛ́ kũoomɛɛ? Ǹ ɛra ǹ tá ǹgɔ̃ kú kũ kína dufuo, zaakũ gbɛ̃ zĩ̀tɔɔmɛ n ũ, n bo n bùsummɛ.

²⁰ N suna dí gɔrɔ pla kɛro, akũ ń ye ǹgɔ̃ likara zɔ̃ kũoo yá? Má dɔ̃ gu kũ matɛn gɛ́nlo. Ǹ n gbɛ̃nɔ kakara ǹ tá kũńwo. Dikiri gbɛ̃kɛ kũ náani yão kɛnnɛ.

²¹ Akũ Itai wèa à pì: Ma dikiri kína, kũ Dikiri kunnaao kũ n kunnaao, gu kũ ń kun pínki, makũ n zɔ̀bleri manigɔ̃ kú gwemɛ, mani ga yá kesɔ̃ manigɔ̃ kun yá.

²² Akũ Dauda pìnɛ: Ǹ domɛnɛ arɛ ò gɛ́! Akũ Gata gbɛ̃ Itai ɛ̀ra à dà zɛ́n kũ a gbɛ̃nɔ kũ a danɛ kũ ò kú kãaonɔ ń pínki.

²³ Kũ òtɛn gɛ̃ zɛ́la ń pínki, akũ bùsudenɔ wiki lɛ̀. Kũ kína bikũ̀ Kidironua, akũ ń pínki ò gbáranna zɛ́ sɛ̀.

²⁴ Zadɔki kú gwe dɔ kũ Levinɔ ń pínki. Ò Luda bàka kunna kũńwo àkpati sɛna. Ò àkpatii pìi dìtɛ Abiata sarɛ ari gbɛ̃nɔ bɔ̀tɛ wɛ̃tɛn ò làka ń pínki.

²⁵ Akũ kína pì Zadɔkinɛ: Ǹ Luda àkpati sɛ́ ǹ gɛ̃o wɛ̃tɛ gũn. Tó ma Dikiri pɔnna lè, ani tó mà su mà wɛ́ sialɛ kũ a kúkio.

²⁶ Tó à pì ma yã dí káaguro sɔ̃, ma laka. À kɛmɛnɛ lákũ à kɛ̀arɛ mana nà.

²⁷ Akũ kína ɛ̀ra à pì sa'ori Zadɔkinɛ: Wɛ́gupu'eriimɛ n ũroo? Ǹ ɛra ǹ tá wɛ̃tɛ gũn aafia kũ n nɛ́ Aimazao kũ Abiata nɛ́ Yonatão. À tá kũ á nɛ́ gbɛ̃nɔn pla pìnɔ.

²⁸ Manigɔ̃ zɛna swabikũkia sɛ̃̀ntɛ ari mà baaru maáwa.

²⁹ Akũ Zadɔki kũ Abiatao Luda àkpatii sɛ̀ ò tào Yurusalɛmu, akũ ò gɔ̃̀ gwe.

³⁰ Dauda tɛn Kùkpɛ sĩ̀sĩ kũ àtɛn ɔ́ɔ dɔ. À pɔ́ kù a mìia, à kyate kpanaro. Gbɛ̃ kũ ò kú kãaonɔ pɔ́ kù ń mìia ń pínki, òtɛn ɔ́ɔ dɔdɔ òtɛn gɛ́o.

³¹ Kũ ò pì Daudanɛ Aitofɛli kú gbɛ̃ kũ ò zɛ̀ kũ Abusalomuonɔ tɛ́, akũ Dauda adua kɛ̀ à pì: Dikiri, ǹ tó a lɛ́damma gɔ̃ de yã fayasaride ũ.

³² Kũ Dauda kà sĩ̀sĩ mìsɔ̃ntɛa, gu kũ donyĩkɛki kún, Aki gbɛ̃ Usai sù à dàalɛ, a uta kɛ̃na akũsɔ̃ bùsu kú a mìia.

³³ Dauda pìnɛ: Tó n gɛ kũmao, ĩnigɔ̃ demɛnɛ aso ũmɛ.

³⁴ Tó n ɛra n ta wɛ̃tɛn, akũ n ò Abusalomunɛ a zɔ̀bleriimɛ n ũ sɔ̃, ĩni Aitofɛli lɛ́damma gboromɛnɛmɛ. Ǹ pinɛ a de zɔ̀bleriimɛ n ũ yã, ama tera n gɔ̃ a zɔ̀bleri ũmɛ sà.

³⁵ Sa'orinɔ Zadɔki kũ Abiatao gɔ̃ kú kũnwo gwe. Ǹ yã kũ n mà kínabɛa babańnɛ pínki.

³⁶ Ń nɛ́ gbɛ̃nɔn planɔn kú kũnwo gwe, Zadɔki nɛ́ Aimaza kũ Abiata nɛ́ Yonatão. Tó n yãke mà, ǹ nɛ́ pìnɔ zĩ ò su ò omɛnɛ.

³⁷ Akũ Dauda gbɛ̃nna Usai pìi tà, à kà Yurusalɛmu gɔrɔ kũ Abusalomu tɛn gɛ̃.

« Vorige

Volg ons:

Geborgde skakels

Advertensies